«Гайги Вайгель» морамо кужо
ЛопаПарцун:Музыка:Общие проверкиЛопаПарцун:Сортировка: по изображениям
| Гайги Вайгель | |
|---|---|
 «Гайги вайгель» раськень морамо кужось Эрзянь Раськень Озксо-2007 | |
| Основная информация | |
| Жанр | раськень морот, фолк |
| Годы | 1953[1] - неень шкас |
| Мастор |
 Россия |
| Место создания | Од Пурня веле, Мордовия |
| Кель | эрзянь |
 «Гайги Вайгель» морамо кужо | |
|
Гайги Вайгель Викиутомсо |
|---|
«Гайги Вайгель» (руз. «Звонкий голос») — эрзянь авань раськень морамо кужо, Од Пурнясто.
Кочкурбуень Од Пурня велесэ ули «Гайги вайгель» морамо кужо, сонтемензэ Мордовиясо а юты вейкеяк покшчи. Коллективесь морси кода эсензэ буесэ, истя жо республикань покш сцена лангсо, ардтни лия регионовгак. Те ансамблясонть эрьва кодамо профессиянь ломанть, иесткак, видьстэ меремс, аволь аламо. Ансяк весень сынст вейсэнди вейкесь – эрзянь моронтень певтеме вечкемась. «Гайги вайгелесь» – Мордовия Республикань Государственной премиянь лауреат, раськеютконь, весероссиянь, республикань, буень эрьва кодамо пелькстамонь ды фестивалень лауреат ды дипломант.
Те коллективесь пурназель 1953 иестэ. Васенце составонть эйстэ тосо морсить ансяк кавто ломанть. Сынь ледстнить, кода 1970 иестэ ардтнесть Московов «Мелодия» звукозаписывающей студияв, косо грампластинкас сёрмадозельть сынст морост. Ансамблясонть моронь ушодыцякс ульнесь Прасковья Кузьминична Крамойкина. Коллективсэнть а ёвтавишка путовксост Дарья Леонтьевна Антошкинань, Фёкла Ефимовна Мокейкинань. Сынсь стасть эрзянь оршамопельть, кочкасть репертуар, ледстнесть-вельмевтсть стувтозь седикелень койтнень. Весе юткошкаст алтасть вечкевикс тевентень. Ансамблясь курок теевсь райононь визитной карточкакс.
70-це иетнестэ ансамблянь ветицякс ульнесь Р.С.Зорькина. Сон парсте содасынзе эрзянь моротнень, койтнень-кирдатнень. Мельспаросо морсесь аватнень марто велень эрицятнень икеле. (Ней Раиса Сергеевна морси «Ламзурь» ансамблясо). 1983 иестэ саезь Од Пурнянь авань коллективенть кармась ветямо Мария Дмитриевна Бояркина[2](2009 иестэ казязь (руз. Почетной грамотой Республики Мордовия). Самай сестэ кочказель ансамблянть туртов виев лемеськак – «Гайги вайгель». Сон кармась эрсеме республикань культурань весе мероприятиятнесэ. Ды аволь стяко шкань ютазь ансамблянть туртов максозель раськень коллективень покш лемесь.
Пек парсте содасызь морост аволь ансяк Мордовиясо, томбалеяк - Чувашиясо, Самарань ёнксо, Петербургсояк. «Гайги вайгеленть» репертуарсо эрзянь кезэрень морот, рузонь раськень морот, частушкат, содавикс сказительницанть Серафима Люлякинань моронзо. Морыцятнень валост коряс, кезэрень моротнень сынь тонавтнесть бабаст-сырькаест пельде. Раськень моротне ютасть вейкеде-вейкес. Сынст свал морсесть весе кенярксчитнесэ, косо весе велесь пурнавиль вейс. Ансамблясь вельмевтизе «Эрзянь свадьба» коенть. Тосо улить башка морот, конатнень морсильть ансяк урьвакстомсто, кодат валт эряви ёвтамс, кона шкане авардемс, лисемс киштеме ды седе тов. Ламо вийть путыть раськеть койтнень ды озкснэнь ютавтома туртов. Ванстызь ды невтить ломантненень Покров покшчинть, Роштувань моротнень. Коллективень аватне кедьчелькевть. Сынь аволь ансяк эстест стасть костюмт, истя жо райононь лия ансамблятнень туртовгак.
2007 иестэ «Гайги вайгель» ансамблясь тердезель Санкт-Петербургов «Рождество Христово» Россиянь православной фольклорной фестивалентень. Тосо минек морыцятне невтизь «Эрзянь свадьбанть», Роштовань калядамотнень. Теде мейле ульнесть Казанень «Крутушка» Раськеютконь фестивальсэ. 2008 иестэ морамо кужонтень максозь (руз. «Лауреат Государственной премии Республики Мордовия») лем.
Башка валт эряви ёвтамс, кода аватне вастневсть минек ды омбо масторонь покш ломантнень марто. 2007 иестэ Саранскойсэ ютась «Шумбрат, Финно-Угрия!» суоминь-угрань раськень Масторлангонь I фестивалесь. Те кенярксчинтень сакшность РФ-нь Президентэсь В.В.Путин, Финляндиянь Президентэсь Т.Халонен ды Венгриянь Премьер-министрась Ф.Дьюрчань. Омбоцеде минек аватне В.В.Путинэнь вастызь 2012 иестэ, зярдо келейстэ тешкставсть эрзянь ды мокшонь раськенть Россиянь государствань лия раськетнень марто вейсэндявомань тёжа етне. Россиянь Президентэсь кадсь коллективенть туртов автограф. Неть вастовоматнестэ кадовсть ламо фотокувт.
Теде мейле «Гайги вайгелесь» Оперань ды балетэнь театрасо вастсь Франциянь содавикс киноактёронть Жерар Депардьень. Эрзянь аватне тусть васолдонь инженть мельс. А кода эно?! Вайгелест оно кодат виевть, паляст лангсто сельметькак а саевить. Сынсь чаразь чарыть Жераронь перька, казсть тензэ эрзянь панар ды эрзя-мокшонь пачпорт.
2012 иестэ Од Пурня велев сакшность Московонь инжеть. «МИР» телеканалось «Гайги вайгель» ансамблядонть снимась документальной фильма. Эрьва морыцянть аволь шожда эрямодо ёвтнесть башка, якасть тенст кудос, невтизь, кода эрить. Истя жо невтизь репетицияст, конат ютыть велень клубсо. Вейке-вейкенень лездазь, бабинетне састыне кузить сцена лангс ды ушодыть моро. Сынст валост коряс, зярдо морыть – стувтовить весе мелявкстнэ, апаротне ды орматне. Малав весе эрить ськамост, мирдетне кулость, эйкакштне сралесть масторонь келес. Печтямс ризксэв ськамочинть лездыть моротне, концерттнэ. Фильмась лиссь пек мельстуиця! Сон ули Интернетсэяк, косо ванызь 14 тёжадо ламо ломанть!
2013 иестэ якасть Чебоксары ошов «Весе минь – Россия» Весероссиянь народной творчествань фестивалев. Тосо сынь лиссть I степенень лауреатокс. 2014 иестэ максозь морамокужонтень раськень лем — (руз. «Заслуженный коллектив народного творчества»[3]) (кемекстазь Россиянь Минкультурась ацамковонь 16 чистэ 2014 иестэ).
«Гайги Вайгель»-с совицянзо
витнемс
- Агеева Роза Степановна
- Адмайкина Евдокия Герасимовна
- Адмайкина Мария Никитишна
- Адмайкина Нина Фёдоровна
- Бояркина Мария Дмитриевна
- Ведяйкина Мария Петровна
- Кромойкина Прасковья Кузьминична
- Мокейкина Фекла Ефимовна
- Потанина Валентина Фёдоровна
- Лазуткина Вера Николаевна
- Устинова Раиса Алексеевна
- Фролкина Просковья Николаевна
2003 иестэ саезь ансамблянь аккомпаниаторокс кармась Иван Ильич Фролкин, вейке морсицянть мирдезэ.
Морост
витнемсКой-кона морост:«Маштыть, авакай» (руз. «Сумела, матушка»), «Ох, авакай, чиямак» (руз. «Ох, матушка, засватай меня»), «Дованть колмо церанзо» (руз. «У вдовы трое сыновей»), Вирьга юты Машура (руз. «По лесу проходит Машура»), «Бути саемс, Ваня леляй, саемак» (руз. «Если женишься на мне, дядя Ваня, то женись»), «Пиже садсо» (руз. «Во зеленом саду»), «Вирь чиресэ эрзянь цёрась» (руз. «На опушке леса эрзянский парень»).
.svg){kind=small}