Раськень Озкс

весе масторонь эриця эрзятнень ознома-пурнамо кой.
Эрзянь Раськень Озкс Штатолонь кирвастема

Раськень Озкс — те веси масторонь эриця эрзятнень ознома-пурнамо коест.

Потмокс

Раськень Озксонь домкачизэВитнемс-петнемс

Кода содатано Озкстнэ эрсить кудонь, буень, велень, сехте покшось ды сюпавось эрьмесэ, те Раськень Озксось. Адядо терявтсынек панжомо те коенть сюпавдояк–сюпав домкачинзэ, ды нама сонсь коенть лувонзо. Те Озкстонть башка лията Озкстнэ эрсить эрьва иестэ, кой-конататне натой мики знярыянь кирда иезэнзэ. Раськень Озксось ютавтневи аволь сеедьстэ, Покштятнень ёвтамост кувалма, архивсэ уликс сёрмадовкстнэнь вельде, содави, те озксось вадря эрямо пингтнестэ ютавтневиль ведьгемень иес весть, даволов-казямо, чопуда пингтнестэ, знярдо раськенек велькссэ гувныль зыянонь сультесь, Раськень Озксонть ютавтнильть седе сеедьстэ, мейле тынь чарькодьсынк, мекс истя эрсесь.

Ютась меельце Раськень Озксось, ды сонзэ Атянь Эземсэ, сехте арний-мельванома Покштятне вейсэ арсилизь косо, знярдо ютавтомс сы Раськень Озксонть. Аравтнесть Прявт-Озатя, лездыцят тензэ, ды Пазпалонь (штань, ярмаконь, ямксонь ды лия мезень пурныцят). Озкспалось, коень-коинзамга каявксось, Раськень Озксонть ютавтомга пурнавиль весе эрзянь буетнева–велетнева, эдь те вейсэнь тев.

Озксонь пурнамотне-арсематнеВитнемс-петнемс

Васняяк пурныльть састынькине шта, ярмакт, идем ракшань кедть. Штась эряви Пазштатолонь валомга, ярмактне, мезтне пурнавить букань, ревень рамамга, конатат мейле коинзась печкевить Озкспалокс, Озксонть ютавтомсто. Штатолось теевиль салава, кортыльть вирьсэ кекшезь, кияк илязо сода.

Те штатолось эрсиль 40 пондонь сталмосо. Ютазь Раськень Озксонь штатолось кадови се буентень косо ютавтозель меельце Раськень Озксось. Сонзэ кирвазтилизь Буень Озксонь ютавтомсто, ловови те штатолось канды покш вий. Покштятне ёвтнильть штатолонть кекшнилизь модапотс, ятт-душмант илизь муе, эжели мусызь ды янгасызь-коласызь те карми покш пежетекс ды канды а онкставиксшка зыян кода буентень истя весе раськентень. Озкспалонь ярмактнеяк кекшневильть ды сынь куш кодамо аразьчи, стакачи аволь уле эрямосонть, а токшевить, эдь сынь алтазь Инешкипазонтень.

Вана кадовиль вейке ие од Раськень Озксонть ютавтома чинтень. Се велентень косо эрясь Прявт Озатясь пурнавильть Эрзянь Масторонть весе буетнестэ Озксветийть, мельванома Покштят, Велень прявт, ды нама сонсь Инязорось, ютавтовиль Инекужо. Те Инекужосонть арсевильть сы Раськень Озксонть весе ёнкстнэ, аравтовильть весе буетнестэ Прявт Озксветицянтень, буень Озксветийть, брагань теицят, букань ракшань ветицят, сюронь-ямксонь, медень пурныцят, седицят ды Куломанть каршо тюрема–шаштавтома коенть киштицянть–топавтыцянть. Загодсь арсевсть сеть кевкстематне конатат кармить ванновокшномо Атянь Эземсэ, цёраксчис ды аваксчис од ломантнень совавтома коень ютавтыцят ды седи тов. Сонсь Раськень Озкс ютавтома таркась ёвтавозель, ансяк чись ёвтавиль таргодо икеле. Секс мекс иляст сода ятт-душмант, лия раськень ломантне ды сынст азардсь ушмантнэ.

Эдь седь шкатнестэ душмантнэ теке кренчт, учость кода сускомс седе тантей пелькс лия раськестэнть, ды нама Раськень Озксонь ютавтома шкастонть эдь эрзянь ушмантнэ седи ламотне якасть Озксонь ютавтоманть ванстома. Куш виде эрьва велесэнть яттнень мельга ваныцят, ды ушмант кадновильть, илязо лисе зыян.

Озкспалонь пурнамоВитнемс-петнемс

Эрьвата эрзянь буетнесэ пурнавильть ломанть, улавт, лишметне наряжавильть лентасо, баягасо, каштазсо ды сыргильть сынь буень велетнева Озкспалонь пурнамо, Раськень Озкстонть яволявтомо.

Икелев мольсь Озатя кедьсэнзэ Пазтешксэнь палмань, вакссонзо кавто од цёрат конатат пувильть торамасо. Теть молицятнень-сыцятнень эрзянь велетнестэ марилизь васолдо, ды Пазморо марто лисильть ломантне веленть куринкань ортатнес, кудотнень икеле анокстазельть моргат косо палсть кудонь-канонь штатолтнэ ды анокстазь озкспал-каявкс. Велень совама ортатнень икеле ютавтовиль а покшке озкс, кирвастевиль штатол. Озатясь пшкадиль истямо озолма марто:

Инешкипаз! Веречипаз ! Чангодть!
Вана сынек, ознопалонь пурнамо,
Велень раськенть варштамо.
Вейсэнь Озксов, Пазонь кужов,
Велень эрийтнень минь тердтяно.
Ине Чанстесь, Ине эрьмесь,
Покштянь-Сырдянь Ине лувось,
Эрзянь велесэнть свал эрязо,
Чачи сюро, ракшань-ракша,
Эйдень-эйде, Шумбра рунгот,
Валдо ойметь ды Пазчангот,
Эрзянь велесэнть свал улезэ.
Инешкипаз Чангодть! Паз Чангодть!

Эрьва канонь кудонь аватнень викшнезь пазнардамо лангсо кепедилизь верев Пазонтень алтазь кшинть ды серьгедильть «Паз Чангодть» пазморонть, сыргильть Озатянть ды озкспалонь улавонть мельга велень куринкатнева, ды тосо пурнавиль каявксось озкспалось (ямкст,алт, товт ды седи тов).

Озксонь чинть ёвтамгаВитнемс-петнемс

Мейле знярдо те весе пурнавиль ды ёвтавиль Озксонь чись. Пазонь кшитне путовильть парьс нардамонек. Озатясь ды лездыцянзо велень ортатнень икеле сюкониль модас велень эрицятне ды мериль истя:

Сюкпря ды Пазонь Чансть тенк, мельванома раськеть!
Озкспалонк вадря ды анокстазь валдо мельсэ, вейсэнь Марось
Учи эйсэнк, пачкоде ды моледе, вейсэндяводо вейс весе эрзянь раськенть марто,
Кундасынек мирём Покштятнень лемест.
Пшкадтяно вейсэнь Озолма Инешкипазонтень. Паз Чангодть!

Истя пурнавиль Озкспалось ды тердевильть эрзятне весе буетнестэ.

Сась шка велень эрийтнень эсист анокстамост Раськень Озксонтень. Раськень Озксось ютавтневи сюконьчистэ (пецясто), ансяк знярдояк ковонь прядовоманзо лангсо а ютавтневиль, те эрсиль пешксе эли од ковонь ушодовомасто.

Кундамга банятВитнемс-петнемс

Эрьва буесэнть-кансонть уштовильть Покштятнень лемест кундамга банят, ды нама эсист ломантненьгак кода оймест истя рунгост улест ванькст. Те Покшчинтень алтавильть–анокставильть од мазыйстэ викшнезь оршамопельть. Банядо икеле азораватне анокстыльть Покштянь моргат (лемест кундамга). Знярдо чись ульнесь валгоманзо лангсо, банясь аноколь, буень-канонь сехте сыре–эрний ломанесь, саиль Озкспарго, озкскескав ды сыргиль калмазырев, косо калмазь раськетне (эрзятнень ули истямо кой вейке буень-раськень ломантнень калмилизь калмазырьсэ вейке таркас, истямо коень гайтесь ули нейгак, мертяно Самара ёнксонь Пестравка буень Красная поляна рузонь велесэнть эрить 5 кудот эрзят, ансяк калмазырьсэ эрзятне калмить кулозь раськест рузтнэде башка ды эрьва канонть ули эсензэ тарказо), Покштясь ютавтыль озкске ды саиль эрьва канломаненть калмонзо лангсто коморонь–коморонь мода истямо озолма марто.( Тесэ эряви меремс седе калмазырев совамодо икеле ды тосто лисемадо мейле путневи озкспалне калмонь ортатнень икеле - те Калмонь азоронтень, ды энялдыть чумочинь нолдамга мекс сыцясь колызе эсензэ самосо Калмазыренть ды кулыцятнень сэтьмечист):

Я, Инешкипаз, чангодть!!
 Масторава-авинем,
 Масторкирди-тиринем!
 Иля тандат кеднедем,
 Иля тандат пильгедем.
 Састо нарот лутаса,
 Тикшесаннэтнень явсынь,
 Чевте модат таргаса,
 Пацине потс каяса,
 А томбаса, а правтса,
 Вейсэнь Маронть лангс кандса.
 Масторава–авинем,
 Масторкирдий-тиринем!
 Кода модань паморькстнэ
 Вейке марс вейсэндявить
 Истя эрзянь ломантне
 Кадык раськекс пурнавить!
 Инешкипаз, Чангодть!

Модань саемась ды сонзэ смустезэВитнемс-петнемс

Покштясь саиль мода мейле кудо–кардаз юртстояк. Кодамо лувозо те моданть саемась ды сонзэ вейсэнь Маарс каямось ловнодо модадо википедиянь материалсонть. Модась саезь, весе канонь ломантне шлить Покштятнень лемест кундамга банясо, тердилизь-ёвтылизь лемест сынст парямсто, тест алтавиль башка тенсть, коната а токшевиль. Оршнильть ванькс од покшчинь оршамопельсэ, парямодо мейле кадыльть банявантень лаханс ведь ды тенсть кадык сонгак ды Кардаз–Сяркоськак парить.

Кудосо аноколь лемень кундамга моргась. Кирвастевиль штатол ды ютавтовиль Инешкипазонтень ды Покштятненень озкске.

Озксонь икеле валкскесьВитнемс-петнемс

ПурноматВитнемс-петнемс

Валске, сеть кить молицят Раськень озксов велестэнть, састынькине пуромильть велень куншка кужонтень. Эрьва буесь сайнизе мартонзо буйтешксэнзэ ( те мазыйстэ керсезь палмань конань верце песэнзэ Инешкипазонь тешксэсь, коната аштесь буенть тешксэнзэ ( эрьва буенть канонть ульнесь эсензэ тешксэзэ, мертяно овтонь, чувтонь керсицянь, ривезь, письмар д.с.т.) ды ало сюлмазельть мазыйстэ викшнезь нардамот.

Ушмантнэ понгавтнилизь сялгозост, чачома масторонь кисэ тюрематнесэ чавозь ятнень пря киськест (эрзянь кельсэ ули тандавтома – «Ва, пря киськеть сайса», икеле минек ушмантнэ самай сайнилизь прякиськест ятнень ды понгавтылизь эсист сялгозост, паряк тесте саевсь–казевсь эрзятненень лем-покордамка, куломань кандыця раське – мердинас (латинэнь кельсэ), кие соды, кода ульнесь сави ансяк Покштятнень ёвтамотнестэ пурнамс пельксэнь-пелькс раськенек пингень гайтензэ содамочинть).

Се ушманось, конань сялгосонзо ульнесть сехте ламо ятонь прякиськет лововсь-яволявтовсь Маралякс. ( Теде тешкст-сёрмадовкст улить, ансяк историкенек кекшить тень, сёпить, ансяк видечись знярдо — а знярдо лисни лангс. Раськень Озксов молиця нама сайнесть мартост ярсамопель, прякат, пешть, пидезь алт , сайнесть пенчт-вакант, нардамот, буень-канонь штатолтнэнь. Кудосто лисемадост мейле кадовикс азоравась панжилинзе келес кардо ортатнень ды ведьпрясо валыль туема кист ёнов, ды мериль:


Инешкипаз Чангодть!
 Вить пильгинесэ листь сынь кудосто,
 Шумбрасто-паросто,
 Вить пильгесэст ,
 Мекев кудов соваст.
 Кода ведьпрясь стамбаро,
 Ванькстэ масторавантень сови,
 Истя кист улезэ шожда ды шумбра.
 Паз Чангодть!


Озксов молицятнень мекев велявтомазост ортатне ульнесть панжадот, кудосо кияксонть эзть тенсекшне, эзть кодакшно-сустакшно, кист илязо тапаряво.

Улавсо ардоматВитнемс-петнемс

Знярдо Раськень Озксов велестэ молицятне пурнавильть знярыя улавт, лишметне нама чирькест мазылгавтозельть нардамосо, каштазсо, велень озатясь саиль торо ды теиль кавксонь кирда черть те покш улавонть перька. Мейле обозось сыргиль Пазморонь моразь, велестэнть, гайгильть сэдильть седямо пельтне ( нудейть, гарзи, кайгат, чавомат, кальцяемат, пувамат, элекайгат (гуслят) ды с.т.) .

Кода коткудавт пурнавить пизезэст, кода мекшть ливтить нешкентень истя весе Эрзянь Масторонь ёнкстнэстэ чудезь-чудить эрзятне Раськень Озксонь ютавтома тарканть малава аштиця велетнес. Кши сал марто вастыть мельванома сыцятнень, раськетнень велень эрийтне. Эрьва кудосонть анокт максомс удома тарка, кши сал. Гай моли велетнесэ, тесэ ёвтнемат, авардемат куватьс вейкень-вейкень а неемадонть, морот, киштемат. Од цёратнень ды тейтерьтнень сельмест прок сиянь покольнеть яла леднить, паряк мусызь вечкемаст. Весе мазыйстэ–ваньксстэ оршнезь, туезь сэредицятнень ванныть содыйтне, ормань пичкавтыцятне, кинь ули мелезэ каить содамотешкст (рунат) ды ногот.

Озатянь пурнамоВитнемс-петнемс

Удома арась, велетне теевить прок покш ошокс. Ансяк аволь весе наянгалить-элякалить, моли покш анокстамо вандынь чинтень. Ламо буень Озатятне, прявтне пуромсть вейс, весе парынестэ арсить мучкить весе мезесь анок Озксонтень ( Озкспалокс ракшатне, брагась, медьарвось, коень ютавтыцятне, весе те коенть ёнкстнэнь , ютавтома пелькстнэнь тагояк арсекшнесызь-аравтнекшнесызь парынестэ.)

Пазонь штатолонь путомаВитнемс-петнемс

Знярдо чизэ валгиль ускокшнызь ды стявтокшнызь тарказонзо сонсь Ине ПАЗОНЬ ШТАТОЛОНТЬ, анокстыльть тарадт, чувт лемень кундамга ямонть пидемга, сынсь казантнень.

Чокшнень пирямо-ванстамо койВитнемс-петнемс

Веньберть Прявтозатясь сувтамо толбарго марто ( сувтавга тонол лангс каильть цяпор тикше, пичень, кузонь сельведь – ой, костязь карво пангонь почт) ды колмо од тейтерть якстере поназь суре марто ютавтыльть апародо идем эвстнеде пирямо-ванстамо кой. Икелев молиль Озатясь теиль те сувтамо паргосонть вить ёндо керш ёнов колот, тейтертне черень нолдазь якстере суренть каильть масторонть ланга, истя ютыльть Маркужонть перька теильть коло, мейле суренть сюлмилизь сисем сюлмосо. Прявтозатясь кадовиль Пазонть штатолонть ваксс валскес, сон ознось, ёвтнесь кортавтомат, энялдомат-пшкадемат, кода Инешкипазонтень, истя Покштятненень, ды Пертьпельксэнь кирдийтненень-аштийтненень.

Раськень Озксонь валскесьВитнемс-петнемс

Раськень Озксонь валске весе велетнесэ атякштнень моротнень марто гайгезевсть торамань гайтне, весе пурныть озномо. Озкспалонь букатне-ракшатне шлязельть, мазылгавтозельть цецянь каштазсо, ды сувтазельть-чанстязельть. Икелев мольсть кильдезь крандазс лишмет, конатат теке ладсо мазылгавтозельть, улавтнесэ сынь усксть партнень брага, медьарво марто, весе озкспалтнэ вачкавильть парьга. Лишметнеде мейле моразь киштезь, ветявсть букатне-ракшатне.

Озксатятнень Маркужов самосьВитнемс-петнемс

Веседе икеле мольсть эрнема-мельванома покштятне, Озатятне, кши-сал, яндавасо медьарво, штатол, ды колмо тейтерьть озкспаргосто кинть ланга каильть–почодыльть комуля. Весе озксов сыцятне прок лей пурнавильть совильть Маркужонтень, шумбракстнить ды арсить вейкень-вейкень туртов Пазчангодт. Озксветицятнень лездыцяст анокстыть–аравтнить озкспалморгатнева, туевть озкспалтнэнь.

Эрий толонь теемаВитнемс-петнемс

Вейке сырькай моли кеменьшка тейтерь марто лисьма прянтень ютавтыть ведьавантень озкске, ды кармить кантлеме ведь, лемень кундамо ямонть, кашанть пидемга ды седи тов. Озатясь карми тееме эрий тол. Саи кедезэнзэ коське лазнэть карми ёзамо эйсэст , састынькине теть лазнэтне ушодыть ченгеме. Озатясь ченгема таркатнень лангс путы коське чевте тикшень паморькс, ды ёвты истямо Озолма:

Инешкипаз, Чангодть!
 Толава, парава,
 Сырнень тюс азорава!
 Састынькине кирвазтя!
 Шождинестэ сыремтя,
 Иля уле пултыцякс,
 Иля уле чентицякс,
 Ульть миненек лездыцякс,
 Толпаргонь ушодыцякс,
 Ульт валдонь максыцякс,
 Раськень Озксонь
 Толбандянь ушодыцякс.
 Састо палт! Састо палт!!
 Састо палт! Паз, Чангодть!

Букань печкемасьВитнемс-петнемс

Озатясь сыремтьсы озксушодома штатолонть ды сырги кирвазтеме лемень кундамга ямонь-кашань пидема толбандятнень. Озатясь сувтасынзе аноксмар ракшатнень, брага, медьарво марто парьтнень, весе сень мезесь анокстазель Пазпалокс. Букань печкицятне анокстыльть букатнень. Озатясь сувтылинзе, мейле сынст ланга валовиль ведьпря ведь, эжели букатне састынькине сорнозевильть, те лововсь Инешкипазонть мельс тусь те озкспалось. Букань печкийтне анокстазь пеельтнесэ печкилизь ракшатнень, веренть нолдылизь модапотс Масторавантень, сывеленть керсилизь моргатне лангсо ды каилизь казантнева, кашань пидийтне анокстыльть ливамо ямонть.

Озксось ушодовиВитнемс-петнемс

Эрзятне совить МаркужовВитнемс-петнемс

 
Валморозей Маризь Кемаль ды Тушникова Наталь. Неень шкань теезь, алкуксонь эрзянь оршамопельсэ, конат анокстызь сынсь. Раськень Озкс, Чукал веле, Покш Игнадбуе. 2016 иень медьковонь 9 чи.

Окойники весе тораматне серьгедить эсь гайтьсэст, озксов сыцятне пуромить теить коло Инепазштатолонть перька. Маркужонть ниле ёнкстнэстэ (чилисема, чиньэле, чивалгома, пелеве) покш мазылгавтозь торо марто молить куншкас ниле цёрат, сынь панжить виень, эрьмень, эрямонь ниле ёнкстнэнь, пачкодить ды токавтсызь торотнень штатолонть велькссэ .

Инепазоньштатолонть кирвастямосьВитнемс-петнемс

Те шкастонть Озатясь лездыцянзо марто чивалгома ёндо кузи мар губорьксэнть лангс сюкони ниле ёнов, кедьсэнзэ штатолнэсь, те шкастонть кармить чавомо гангипарьс, чавомас, кальцяемас, седить нудейсэ. Озатянть колмо лездыцят кепедьсызь верев Инепазштатолонть кирвастеме, знярдо толось токи штатолонтень ниле ёнксонь панжома торотне явовить. Пазштатолтнэ валовильть анокставильть свал истя, вельксэст мольсь пувордазь кикс ёнов (спиралеобразно). Весе раськесь пижакады колмоксть: Инешкипаз Чангодть!

Весе Озксов сыцятне стить куманжа лангс, кедест кепедьсызь верев, Прявтозатясь ушодсы Ине Озолманть, конатань ёвты мельганзо весе раськесь.


Инешкипаз! Вере-Чипаз!
 Тон, марицясь, кода тикше касы!
 Тон, неицясь кода пеште панжи!
 Неимизь, марямизь,
 Сюконятано пильгезэть,
 Пшкадтяно валдо оймезэть.
 Верев кепедьсынек кеденек,
 Масторов нолдасынек сюкпрянок.
 Ознотано эрицянок кис,
 Ознотано раськенек кис,
 Ознотано эйденек кис,
 Паксясо видезенть кис,
 Кардазсо ракшанок кис.
 Инешкипаз!Макст тенек
 Сэтьме лембе пиземеть,
 Чачост-касост сюронок,
 Касост-кепедевест тяканок,
 Раштыцят, улест аванок,
 Макст Масторонтень ладямо,
 Вейкень-вейкень вечкема,
 Лисьмакс парот лисезэ,
 Леекс эрьметь чудезэ.
 Кенкшпряваяк совазо,
 Кенкшалгаяк ютазо.
 Минь Тонеть — Шумбракши!
 Тон миненек — шумбрачи!
 Ванстомизь, идемизь
 Ятонь ломанде, ормадо-тармодо,
 Апародо-зыяндо,
 Даволдо-цярахмандо.
 Вана пидинек ашо кеднесэ,
 Вана панинек шожда мельнесэ,
 Зяро кашасонть ямкстнэде,
 Зняро макст эрьвантень ули паро.
 Инешкипаз! Чангодть! Паз Чангодть!
 Паз Чангодть!

Покштятнень-Покшаватнень тердемасьВитнемс-петнемс

Весе сюконить модас. Серьгедеви Пазморо Пазчангодть. Мейле Озатясь тердьсынзе озныцятнень пшкадеме озолмасо Покштятненень-Покшаватненень, весе таго Озатядонть мейле ёвтыть те Озолманть[1].

Эрзянь Покшт-Покштинеть,
 Покштянь-Покшавинеть!
 Сырк мерезэ Покштинеть,
 Матразь-оймазь киськиненк,
 Раужо човаля модыненк.
 Вана тердтядызь Озксов
 Кши-салонок варчамо
 Пурень-Брагань корштамо.
 Ашо кедьсэ панинек
 Шожда мельсэ пидинек.
 Садо ваксозонок
 Човоряводо юткозонок
 Начтынк коське турвиненк,
 Пештинк вачонь пекиненк,
 Таньшкавтынк сэпей кургиненк.
 Кинь лемезэ кундави,
 Кинь лемезэ стувтови,
 Илядо кежиявто,
 Весе тынь — седейсэнек,
 Весе тынь — минек верьсэ.
 Минь тынк эйсэ лисинек,
 Минь тыненк велявтано.
 Садо, весе садо!
 Илязт уле ве ёндо ваныцят,
 Иляст уле сельмень сявадыцят.
 Пачкодезэ, Молезэ!
 Паз, Чангодть!
 Паз,Чангодть!
 Паз, Чангодть!


Лисить ЭземозайтнеВитнемс-петнемс

Озатясь серьгеди терди Эземозайтнень. Штатолонть малас пурнавить весе Эрзянь Раськень ды Эрзянь Масторонь, Маралятнень, Инязортнень мелест ёвтыцятне.

Васняяк лиси Тюштянь мелень ёвтыцясь–эземозаесь. Ды Тюштян оймензэ пельде пшкади эрзятненень. Мейле Озатясь серьгеди:

Пингеде–Пингес эрямо! Эрзянь Инязоронтень Тюштянень!

Весе пуромозтне серьгедить ды вачкодить видь пильгсэст модас.

-Эрямо!

Истя вейке-вейке мельга раськенть икельга ютыть весе содавикс эрний-мельванома раськетне. Меельцекс Озатясь серьгеди: Пингеде-пингес эрямо, эрзянь раськентень!

Весе:

—Эрямо! Эрямо! Эрямо!

Маронть одкстомтомгаВитнемс-петнемс

Ней сась шка Маронть одкстомтомга. Маронть маласо умок учесь сокас кильдезь ды каштазсо, эрьва тюсонь кикскесэ ды мазыйстэ викшнезь нардамосо лишме. Соканть удало од цёра ды кавто од тейтерть, лишменть ветить мар чирентень ды Пазонь штатолонть эйстэ таргавить колмо кикст, ашо, якстере, раужо тюсонь, конат сюлмавить лишмень чирькентень.

Якстере тюсось те Инешкипазонь, Чинь тюс - икелечинь эрямо, ашо тюсось те неень шкась улезэ эрямось ванькс, раужось нама сюлмави Мастораванть ды Тоначинть, Покштятнень-Покшаватнень марто. Чилисема ёндо икелев молить Прявтозатясь мельганзо кши-сал , брага марто лездыцят, мельгаст сырги лишмесь ды ушодови эрямочинь колонь теемась, сокасонть тееви модантень кикс, те киксэсь прок сонсь Эрямо Колось, конань эзга ютыть весе озксов сыця раськетне, лишменть ютамсто морави «Паз чагодть» Пазморось.

Модань каямо койВитнемс-петнемс

 
Эрзянь Раськень Озкс Модань каямсто

Окойники колось теезь. Ломантне стить вейке–вейке мельга чилисема ёндо, васенцекс нама сехте эрний ломантне ды Покштятне, теке а сезевиця рисьмекс раськетне теить коло маронть перька ды эрьвась каи паргинестэнзэ, пацине потстонзо туевть моданть эрямотаркастост. Истя тееви Ине сюлмавксось Покштятнень, Инешкипазонть, ды Пертьпельксэнь кирдийтнень марто, раськесь вейсэндяви кода вийтнень истя веси эрзянь ломантнень марто. Тееви кеме шумбра раське. Озатясь ды лездыцянзо чанстить эрьва ломаненть колонть теемадо мейле, Шумбракши палсо, ды медьарвосо. Эрьватантень Озатясь мери:

Инешкипазось Чангодезэ теть Пазонь эйкакш! Паз чангодть!

Морави «Вейсэ, эрзят, виевтяно!» моросьВитнемс-петнемс

Састынькине Марось тееви покш губорьксэкс, весе кемить раськенек виензы, ды кода кудонь- эрямонь истя оймень ванькс сюпавчись покшолгады. Моданть каицятне, конатне чанстявтозельть састынькине кундыть кедьте-кедьс, маркужосонть тееви прок шкань сюлмавиця ды знярдояк а сезевиця суре-кикс. Маронть перька теевить знярыя ломанень кикст, конатне мейле весе маркужованть кармить вейсэнь, Пазонь моро марто тееме пурдавозь ломанень кикс, конатась васня келейгады весе маркужованть, мейле пурнави вейке покш петнявксокс .

Морыть морот , кода мерезель васняяк Пазморот ды раськень велемевтема-вейсэндявома морот, мертяно «Вейсэ, эрзят, виевтяно!» моронть, кондят , эдь те морось теевсь весе эрзятненень Тешксморокс. Адядо ледстясынек те моронть.

Вирев молян, (2-ксть)
 Чувто керян, (2-ксть)
 Сока теян.
 Сока теян, (2-ксть)
 Пакся сокан (2-ксть)
 Кансть мон видян.
 Кансть мон видян, (2-ксть)
 Коцтке кодан, (2-ксть)
 Панар викшнян.
 Панар викшнян, (2-ксть)
 Кужов лисян , (2-ксть)
 Эрзят тердян.
 Садо, эрзят, (2-ксть)
 Садо, ялгат, вейсэнь моро моратано.
 Вейсэнь моро , (2-ксть)
 Моратано.
 Вейсэ, эрзят, мазыйтяно.
 Вейсэ, эрзят (2-ксть)
 Мазыйтяно,
 Вейсэ, эрзят, виевтяно!


Знярдо эрзятне пуромить покш петнявксос, весе серьгедить:

«Инешкипаз! Чангодть! Минь тонь эйдеть, минь эрзят! Минь Раське!» - ды кедест кепедьсызь верев. Мейле ломантне таго срадыть весе маркужованть.

Раськестэнть Куломанть шаштавтома-панема коесьВитнемс-петнемс

Кармить анокставомо–топавтовомо койть-илат. Ней раськеть адядо схемасо невтьсынек мезе моли Раськень Озксто, Маронть одкстомтомасонзо, те схемась невтьсы сеть а неявикст, ансяк оймесэ марявикст те коенть ёнксонзо, домкачинзэ, сюпавчинзэ.


Мейле Озатясь серьгеди – Раськеть ! Маронть одкстомтытне, Инешкипазонтень пшкадине, Покштянок-Покшаванок юткозонок тердинек:

Ней сась шка ютавтомс Раськестэнть Куломанть шаштавтома-панема коенть. Весе серьгедить —  Панема, панема сонзэ, туезэ кадоссо минек раськенть. 

Кужонтень лиси та косто апаро чамаксо, содов рудазов оршамосо сонсь куломатясь, кедьсэнзэ чакш ды пеель конасо кальдерьсь чакшонтень. Апаро вайгельсэ рангстась:

- Эрьга, те кие, ды кить терявтнить монь марто пелькстамо, монь панеме? Паряк тынь эрзятне?
Варчасынек кие седи виев. Монь чакшось коськсь верьтеме, сась шка сонзэ пештямс эрзянь 
ломанень верьсэ. Куломатясь чийни ломантнень юткова тандавтни эйсэст. 

Састынькине ломантне теить эрий коло, колонть куншкас понги куломатясь, эрзятнень кеместэ кундасть кедьте–кедьс. Куломатянтень те ломанень киксэсь а сезеви. Карми марявома чавомань ды гонгипарень гайть, куломатянтень та-косто сырги сэрей од цэра, ашо оршамопельсэ, мазый мизолдыця чамаксо ( эсеть чамась эзь мереве невтемс куломатянтень, илятанзат мейле муе удомсто так ки лангсто), кедьсэнзэ гангипарь (бубен) ды кушаксонзо тонгозь мазый пеель. Цёрась карми чавомо гангипарентень, чийнеме Куломатянть перька, ушоды киргавайгельсэ койморо, конатань кармить морамо сонзэ мельга весе раськетне:

Вай я йех, вая-ваяя ваяя, эрьга раськеть, киштетяно,
 Ваяя-ваяя, ваяя йех, ваяя йех Пазонь моро серьгедтяно,
 Куломанть минь шаштавтсынек, Куломанть минь паньсынек.
 Вейсэ эрзят виевтяно, ваяя йех, ваяя ех, Пазонь Чанстесь мартонок,
 Ваяя-ваяя, ваяя йех, киштеде-киштеде, морадо-морадо,
 Ваяя-ваяяех вить пильгсэнек тостядтяно, кеднесэнек люкштядтяно,
 Ваяя-ваяяех, тук эстенек кулома, оргодть тесте кулома, кулома.
 Ваяя-ваяяйех , кадык ули чачома, кадык ули касома, ваяяйех-ваяя,
 Эрзянь раськесь эрязо-эрязо, ваяя-ваяяя-ех, эрзянь коесь улезэ-улезэ,
 Зыян-кажось туезэ-туезэ, ваяя-ваяяйех, свал эрямо улезэ-улезэ,
 Ваяя-ваяяйех, эрьга мирём серьгедтяно, куломантень минь мертяно,
 Седи васов тук эйстэнек, иля токше тон раськенек , ваяя-ваяяех.
 Шумбрачи-Шумбрачи, од чачома, Пазчангодт, кулома стувтык корот,
 Тук эстенек седи васов, седи васов модамасторонть потмос,
 Ваяя-ваяяех , весе апаронть паньсынек, раськень ойменть вельмевтьсынек,
 Покштянок минь ледстясынек, Инешкипазонь эрьмесэнть раськенек минь
 Чанстясынек, ваяя-ваяяйех. Эрямо-эрямо, чачома-касома, Пазчангодт! Пазчангодт !
 Минь киштинек , минь морынек, куломанть эрзят изнинек ваяя-ваяяйех.
 Эрядо, морадо, ойменк свал тынь ванстадо, эрзякс свал тынь уледе,
 Ваяя-ваяяйех Инешкипазне кемеде, Шумбра раськекс, кеме раськекс,
 Свал уледе! Ваяя-ваяяйех Паз чангодть! Паз чангодть!

Неяви куломатясь тандадсь, койморонь морыцясь сонзо кундасы кутьмере ёндо, куломатянть кедьстэнзэ пры чакшозо ды пеелезэ, сон карми энялдомо мартонзо пелькстыцянть икеле, ансяк вийкоень ветицясь чалги куломатянть мештес ды серьгеди лездыцят ёртомс сонзэ маронь кужостонть. Лисить ниле цёрат конатат кедте ды пильгеде сайсызь куломатянть кандсызь толбандянть чирес, сайсызь чакшонзо-пеелензэ, ноцковтсызь лангстонзо раужо оршамопелензэ ды чамаксонзо ёртсызь толонтень, куломатянь налксицясь кекшсы чаманзо кедьсэнзэ ды састынькине оргоди. Куломатянь оршамопельтнень паломастост, карми гайгеме наяна киштема моро весе киштить морыть серьгедить Паз чангодть!

Озатясь серьгеди:

Раськеть! Адядо невтьсынек эсь прянок Инешкипазонть ды Покштятнень, Кирдийтнень-ашийтнень икеле! Ушодтано ёрокчинь ды каштанчинь пелькстамот–невтемат. 

ПелькстамотВитнемс-петнемс

Цёраксчис совавтома койВитнемс-петнемс

Пелькстамотнень ушодсызь од цёрынетне конатнень ламо иеть тонавтсть ушмодеень ды лия цёрань тевень топавтома. Од цёрынетне леднить налтсо, ёртнить торот, узерненть, ды седе тов. Мейле Инязорось, буень–велень прявтатятне ютавтыть цёраксчис совавтома кой.

Од цёрынетнень карксамост, карксавить карксо, прязост сюлмави цёраксчинь кикс, казевить тенст налт, торот , тейтерьтне казить викшнезь кедьпацинеть, килангонь кескавнеть, максовиль тенст омбоце лем, мертяно Каштан, Овтай ды седе тов . Сынь ней цёрат-ушмант, сынест те чистенть саезь мереви кинь ули мелезэ урьвакстомс, ды прячерест а нарамс. Лововсь прячертне те вий, ды эрсиль эрзянь ушмантнэнь прячерест новолилить карязост витьс сынь ансяк сюлмавильть. Сехте ёроков цёрынетненень казевильть ваксар.

Озатясь ды лездыцянзо сувтылинзе ды чанстилинзе. Весе цёрынетне стильть куманжа лангс. Озатянть кедьсё ульнесь штатол ды сувтамка сон ёвтыль истямо озолма:

Инешкипаз! Веречипаз! Покштят-Покшават!
 Марямизь-неемизь, уледе мартонок.
 Совавтсынек (ёвтавить цёрынетнень лемест)
 Цёраксчис, ванстаст ды ветяст сынь Раськенек,
 Эрямо тевтнень, улест нардекс ды нильксэкс,
 Раськенть икеле чизэнзэ. Ванстаст тиринь масторонть,
 Эрзянь коенть ды Инешкипазне кемеманть.
 Улест кеметь прок тумот, виевть прок овтот,
 Превейть прок Покштяст ды тетяст.
 Инешкипаз Чангодть! Паз Чангодть!
 (Озатясь серьгеди цёрынетненень):
 Аноктадо , тынь, улемс раськень кеме нильксэкс?
 (Цёрынетне мирём серьгедить):
 Пингеде-пингес минь аноктано!

Озатясь сувтасы эрьвейкенть ды мери:
–Ней тынь цёрат! 
Пазось чангодезэ тенк! 

Тейтерень ёрокчисьВитнемс-петнемс

Мейле сы шка невтемс эсь пряст ды ёрокчист тейтерькатненень. Тейтерьтненень эрявсь невтемс кода маштыть викшнеме, кудонь тевень топавтомо, эйдень ваномо-нурсеме. Сынь весе тусь Раськень Озксов мартост тейтерь-паргот, косо ульнесть викшневкст, эрьва кедьёнкст конатат анокставкшность сынст кедьсэст. Те ульнесь прок неень шкане невтема (выставка), маркужось пешкедиль мазычисэ. Тейтернетне невтнесть кода эряви эйденть сюлмсемс, кода лавсень моро морамс, ды седи тов. Тейтернетнень аваст ды сырькаест те чинтень анокстакшность пулайть ды тейтерь прясуре. Тейтернетнененьгак максовиль омбоце лем , мертяно сехте кодамо маштыцянтень путыльть лем Ламзурь ды седи тов. Велень Озаватне ды Прявтозатясь ютавтыльть тейтерьксчис совавтома кой. Тейтернетнень васенцеде сюлмавиль пулай ды прязост путовиль тейтерьксчинь прясуре. Те чистэнть саезь сынь анокольть улемс никс-полакс, эдь сынь авань тевтнень пек ладс маштыть топавтома.

Озатясь ёвтыль истямо Озолма:

Инешкипаз, Веречи Паз! Покштят-Покшават!
 Неемизь-марямизь! Пшкадтяно тыненк!
 Ознотано икеленк.
 Вана неинк эрзянь раськенть,
 Эрзянь ломантнень чачтыцятнень,
 Кудонь тевень топавтыцятнень,
 Толонь каштомонь мельга ваныцятнень,
 Коцтонь кодыцятнень, ведень кандыцятнень,
 Мирдень-Покштянь мелень топавтыцятнень,
 Улест (ёвтавить весе тейтерькатнень лемест)
 Пингеде–пингес, эрзянь авань тевень топавтыцякс,
 Эйкакшонь чачтыцякс-кастыцякс, кудонь лембень кирдицякс,
 Пазонь коень, Покштянь-Покшавань лувонь ванстыцякс.
 Инешкипаз Чангодть! Паз Чангодть! Паз Чангодть!
 Весе сынь сувтавить Пазштатолсо ды сувтамопельксэ.

Покш ломанень пелькстамотВитнемс-петнемс

Ней ушодсызь пелькстамотнень, ёроксчист покш ломантне, тесэ бороцямот, налтонь ды торонь нолдамот, морамот-киштемат. Инязорось ды эрний ломантне, Озатятне, кочкить ушмантнэнь ютксто сеть ушмантнэнь, конатнень торосост седе ламо ятонь прякиськеть понгавтозь.

Сеть ушмантнэнень сюлмави Маралянь мазый каркс, казеви од торо, ды шлём. Раськесь Маркужосонть моры-кишти, содыцятне пичкавтыть ормат. Окойники маряви таго торамань гайть-увт, те пурнави

Эрзянь Атянь ЭземВитнемс-петнемс

Атянь Эземс пурнавильть сехте эрний-мельванома ломантне, тесэ арсевильть ламо кевкстемат. Мертяно ладявильть буйтнень ютксо модань явома пелькстамотне, лангс ливтевильть сеть ломантне раськестэнть кие тейсь кодамояк зыян, эжели кияк салась лиятань парочи, те салыцясь аравтовиль знярыя иес важокс, сетненень кинь сон мезеяк салась, понгониль чевте тарка лангаяк кой мезень кисэ. Эдь тесэ весе мезесь ульнесь ливтезь лангс, эдь сонсь Инешкипазось, Покштятне-Сэрдятне, кирдийтне-аштийтне ульнесть озксов сыцятне марто. Ды весе мезесь арсевиль мирём. Арсевкшнесь зняро сюро, ракшань кедть эряви каямс те эли тона буень пельде Масторонь тевтнень ветямга, Масторонь ушмонть кирдемга. Те ульнесь Ине промкс, Инекужо, эдь истят покш вейсэнь промкст эрсильть чуросто, паряк тесэ кочкавильть Ушмодейтнень прявтне, Чиньазортне ды сонсь Инязорось. Тесэ кияк апак пеле кортыль седе мезе талакавтсь седеензэ, мертяно те демократиянь лув. Инжетне ёвтыльть сюкпрят те буень ломантненень косо ютавтозель те Раськень Озксось. Нама арсезевель сы Раськень Озксонь ютавтома таркась.

Лемкундамо ямось-кашасьВитнемс-петнемс

Атянь Эземесь прядовиль, сыль шка Покштятнень-Сэрдятнень лемест кундамс ды ливамс, эдь аноколь лемкундамо ямось кашась. Састынькине ломантне ацыльть викшнезь руцят ацылизь Мастораванть ланга, озыльть ды ушодовиль лемень кундамо ливамось, цёраксчис ды аваксчис совавтозь од ломантне якильть ды кайсильть лемень кундамо ямонть, кши-салонть, Озатятне, Кудонь Покштятне саилизь яндаваст штатолонть марто ды кирвазтилизь сонзэ Озкс Пазонь штатолстонть, эрьвась эсь пачканзо энялдсь Инешкипазонть икеле седе мезесь эрявсь тензэ, чизэ валгома лангсоль.

Прядомат-пурнамотВитнемс-петнемс

Састынькине Мастораванть лангсто пурнавильть руцятне, Маркужось ванськавтовиль кодамояк чукш илязо кадово. Састынькине буень-буень ломантне таго теильть кавксо колот ознозь Маронть ды Пазштатолонть перька. Озксветицятненень ды сынст лездыцятненень ёвтыльть сюкпрят казильть казнеть, путыльть каявкс Озкспаргонтень. Истя прядовиль эрзянь раськенть сехте питней ды пешксе домкачиде валдодо Озксось–коесь. Нама неень шкань эрзятненень эряви ванстамс ды вельмевтемс сырнень човалятнестэ, раськень ойместэ, вейке пельксэнть.

Раськень Озксонь ютавтома коесь вейсэнди эрзятнень, невти минек сюпав коенек, ды сралезь-стувтозь оймеёжомарямочинек. Раськень Озксось невти тагояк мерян эрзянь раськенть домка философиянзо, нама те озксось невти эрзятнень сеть шкатнестэ ульнесь вейсэньлувсо эрямонь демократиянь лув.

Те сёрмадовксонть анокстамсто тень пек лездасть Маризь Кемалянь[2] вешневксэнзэ-муевксэнзэ, ды мейсэяк а онкставиця раськень вельмевтема тевензэ, А.П. Рябов лемсэ эрзянь келень идема фондонть ломантнень Нуянь Видязонь, Кшуманцянь Пиргужонь[2], "Торама» ансамблянть морыцятнень ды сонсь ансамблянь прявтонть Йовлань Оло[2]. Вейкине Модамасторонть лангсо эрзянь раськень музеенть панжицянзо ды эрзянь раськень Пазне Ознома таркатнень ды кезэрень калмотнень ванстыцянтень Аношонь Тумайне Обранёнксонь Лукоянова ошсто. Модас сюкпря Покш Игнадбуень весе эрицятненень конатат ютавтызь 370 иень ютазь Чукалонь Эрямопандосонть 1999[2] иень Раськень Озксонть.

Нама лездасть Шахматовонь, Евсевьевень, Печорскоень сёрмадовкстнэ. Ламось марязель Покштянь пельде. Критиктне, кадык пек алсто сардт а таргсить, видечись сон а кекшеви, саты маньчемс эсь прянок, васняяк эрзятненень, минек раськесь истямо жо сюпав эрьва мейсэ кода лиятатнеяк эряви вешнемс весе паронть ды совавтомс эрямозонок, сестэ раськенть карми икеле чизэ, вельмемазо. Ансяк весе вейсэ, мирём минь эрзятне виевтяно, мазыйтяно ды Инешкипазонь Чанстесь ды Покштятнень эрямо таштавт сюпавчись кармить ветямонок валдо Икелечинтень.

Пазчангодт, тенк, Раськеть!

Морыцянь лисематВитнемс-петнемс

Зярдо прядови озномась, веси ярсыть пидезь ямдонть, ды кунсолыть покш морыцянь невтема. Эрьва кодамо иестэ морыцятне ульнесть: «Келу», «Торама», «Мерема», «Гайги вайгель», «Морденс», Глуховонь Анатолий, Рауткинэнь Виктор, Бакич Видяй[3].

ВанмотВитнемс-петнемс

Сёрм.:Витнемс-петнемс

  1. Пшкадема покштятненень-покшаватненень (эрз.)
  2. 2,0 2,1 2,2 2,3 Саберов Р. А. ЖРЕЧЕСКАЯ ТРАДИЦИЯ МОРДВЫ В XVIII–XXI ВЕКАХ(руз.)
  3. finugor.ru //Раскень Озкс на земле Эрзянь Мастор(руз.)