Шоржа (Армения)

Шоржа (арм. Շորժա) — Армениянь Гехаркуник ёнксонь эрзянь веле

Веле
Шоржа
арм. Շողակաթ
40°30′06″ с. ш. 45°16′18″ в. д.
Мастор	Армения Мастор Армения Мастор
Марз	Гехаркуник
Велень-сядонь прявт	Сулико Шушанян
История ды география
Икелень лем	Надеждино
Куншкань сэресь	1915 ± 1 метр
Шкань каркс	UTC+4[d]
Эрицятне
Эрицятне	491 ломань (2010)
Официальной кель	армянонь кель
Цифрань идентификаторт
Почтань индекс	1316
{|align="center" style="background-color:inherit;width:290px" | |}

2017 иестэ веленть лемензэ лиякстомтизь, ды сон кармась Шогакат (арм. Շողակաթ). Сон Шогакат общинанть велень-сядонь тевень ветямонь куншкатарказо, козонь совить Драхтик, Агберк, Артаниш, Джил, Цапатах велетне.

Географиянь аштемазо

Севан эрькесь ашти сэрей пандо ютксо, иневедень уровененть эйстэ кавто тёжа метрань сэрьсэ. Сонзэ кувалмозо сядо вайгельпеде ламо, келезэ колоньгемень вайгельпеде ламо. Эрькенть чиресэ, пандоютконь апокшке лушмосо, сравтовсь Шоржа велесь. Велесь ашти Севан эрькенть лангсо, Артаниш пельсусиянь пелеве-чивалгома ёно. Тесэ эрить эрзят(1966).

• Малавикс эрямо таркат:
  • Чамбарак - 15 вп пелеве-чилисемаёнов
  • Севан, 44 вп пелеве-чивалгомаёнов
  • Варденис - 61 вп лембе-чилисемаёнов
  • Агберк - 3 вп пелевеёнов
  • Артаниш - 8 вп чилисемаёнов.

Кавказтомбале умок уш эрить эрзят-мокшот. Седе кортыть ламо пандопрянь, каштомлатконь ды пандоютконь таркатнень лемест. Тесэ улить истят лемть: Кандрань Тоня, Пушкаалкс, Пандонерь ды ламо лият.

Кода ды зярдо Арменияв састь эрямо эрзят ды мокшот? Кодат велень-сядонь политикань тувталт кармавтызь сынст покштяст-сыркаест кадомо чачома таркаст ды молеме эрямо Кавказ пандтнэнь томбалев?

Армения ССР-нь Куншка архивень управлениянь материалтнэ невтить, вана неть ломантне тей панезельть эрямо XIX пингень ниленьгеменце иетнестэ. Покштяст-бабаст панезельть Куншка Россиянь губерниятнестэ политикань тувталонь кисэ, бунтартельть.

Куншка Россиянь губерниятнестэ бунтарень мель марто ламо видийтнень-сокийтнень Сибирев ды Кавказтомбалев панемась ушодозель инязоронть Николай I указдонзо мейле, кона сёрмадозель 1839 иестэ. Неть васоло таркатнес политикань ёндо акемевикс видиень-сокиень панеманть ульнесть кавто целензэ.

Васенцесь — лоткавтомс видиень-сокиень волнениятнень ды бунттнэнь, конат калавтсть крепостной хозяйстванть ды инязоронь деапотической строенть. Омбоцесь — центральной губерниятнестэ Кавказтомбалев видиень-сокиень панеманть вельде, инязоронь виенькирдийтне арсесть кемекстамс тосонь оборонительной эсь пункттнэнь, конатнень лангс сеедьстэ кайсевкшнесть турецень племенатне.

Кавказтомбальксэнь видийтнень-сокийтнень пансть вийсэ, ломантнень чавность розгасо ды палкасо. Вана мезть Сятконь кореспондентрнэнь (сёрмадомань стилэнзэ коряс паряк Чувашов Михаилннэ) ёвтнесь Армения ССР-нь Красноселе буень Шоржа велень эрицясь Михаил Иванович Ларионов, конанень 1966-це иестэ кодгемень иеть ульнесть. Мерсь бодязо, келя, ёвтнекшнесь тензэ:

— Монь дедам ёвтнекшнесь тень, минек покш­тянок-бабанок панезельть тей икелень Самарской губерниянь Бугуру­сланской уездэнь Вишке Толкан велестэ. Панемадо икеле инязоронь жандарматне, урядниктне сынст а весть пек чавнокшнызь плёткасо, эрь­ва кода нарьгасть лангсост. Казеев Василиень инязоронь жандарматне истя чавизь сардо марто илеень розгасо, што рунгсонзо живой тарка арасель. Пек чавоманть эйстэ сон кулось ки лангсо.

Нарьгасть аволь ансяк цёратнень лангсо. Аволь седе аламо му­цясть аватненьгак. Се шкастонть, зярдо чавсть Василий Козеевень, сон­зэ козяйканть вензэ лангс пекстызь кельме кардс ды тень пингстэ эрь­ва мезес кемиця авантень мерсть:

— Тестэ живстэ ещё кияк эзь лисне. Тей пелеве шкане сакшны шайтян, кона повасы тезэнь пекстазь ломаненть.

Тандадоманть ды пелеманть эйстэ авась валскес шержейгадсь.

Кавказтомбалев видийть-сокийть панезельть Россиянь ламо губерниясто. Ютксост ульнесть Самара, Саратов, Пенза губерниянь эрзянь ды мокшонь зярыя велень эрицят.

Жандарматне пансть ломантнень эрямо таркастост, икелев теде апак ёвта. Секскак велень эрицятнень арасель шкаст анокстамс васоло ки лангов одежа ды ярсамопель. Шоржа велень эрицянтень Семён Павлович Ледяевнень ней 82 иеть (лецтясынек - 1966 иестэ). Сон истя ледстни эсь деданзо ёвтнематнень:

— Жандарматне апак учне мерсть бунтартненень саемс ки лангов эрявикс вещат ды нейке лисемс базаронь площадентень, косто, келя, туйтядо лия таркав эрямо. Крестьянтнэ капшазь вачкасть эсь нуласт-валаст крандаскес, эйзэст озавтнесть сыре тетяст-аваст, эйкакшост, ды молильть пурнавомань таркантень...

Эрзянь авась Ефросииия Кудряшова истя жо тешкстазель панемс. Сон те шкастонть муськиль лей лангсо. Жандарматне эзть максо тензэ кудов совамо шкаяк, витьстэ саизь базаронь площадентень, козонь пур­ назельть Закавказьяв панемс ломантне. Сынст эйстэ сехте ламотнень арасель мик шкаст простямс эсь родноест, малавиксэст марто. Бути се­ миянь члентнэнь эйстэ панемань шкастонть кие-бути арасель кудосо, сон кадовиль ськамонзо. Истя, (примеркс, Ледяев Леононь кемень иесэ цёразо Клима тетянзо-аванзо панемстэ арасель кудосо. Цёрынесь зя­ рыя шкас явовкшнось родной семиянзо эйстэ. Климентий Леонович Севан эрькенть чиресэ Шоржа велестэнть муинзе тетянзо-аванзо ансяк кемгавтово иень ютазь, зярдо сон ульнесь уш покш ломанекс.

Эсь покштяст-бабаст ёвтнемадост лецтни 58 иесэ колхозникесь Ефим Иванович Сандиков. Вана мезе сон мерсь минек марто кортнемстэ:

— Закавказьяв панезь ломантнень ды сынст обозост ильтясть жан­ дармат. Зярыя цёрат мольсть кандаласо. Ки лангсо печтясть вачочи. Оршамопелест сезневкшнесь панксонь-панкс. Муцявозь ломантнень ке­ рясть эрьва кодат ормат.

Шоржа велень 72 иесэ атясь Василий Андреевич Сандиков ёвтни:

- Монь бабам мольсь осылкав кавто эйкакш марто. Монь тетям Андрей Васильевич овсе вишка эйкакшке ульнесь. Кода-бути весть ки лангсо бабам варштась крандазтнэс, косо ульнесь эйдезэ (монь тетям) ды тандадомадонть ёжозояк маштокшнось: крандазтнэсэ -эйкакшось арасель. Эйкакшонть ёмавтызь. Весе лоткасть ды велявтсть сонзэ веш­ неме. Курок муизь сонзэ тусто тикше потсто, косо сон удось. Муцявозь эйкакшось тапарязель ташто одеяласо, сон прась крандазтнэстэ тикше потс ды эзь сыр-гозеяк... Минек покштянок Севан эрькентень Самарской губерниясто мольсть колмо иеть. Закавказьяв пачкодемадо мейле макссть тенст права коч­ камс эстест эрямо тарка. Сынь лоткасть эрямо Севан эрькенть малас. Тесэ тейсть 12 велеть.

Шоржа велень атятне Семён Павлович Ледяев, Михаил Иванович Ларионов, Ефим Иванович Сандиков ды Ион Абрамович Кудряшов ёвтнить, што Саратовской губерниясто эрзятне тейсть Саратовка веле, Севан веле организовасть мокшотне. Зярыя велесэ эриця мокшотне ды эрзятне те шкас а содыть, кодамо таркасто тей панезельть сынст покштяст-бабаст.

Эрзятне, конат лоткасть Севан эрькень северной ёнксонтень, лем­дизь эсь велест Надеждинакс (ней Шоржа). Атятнень ёвтнемаст коряс, тезэнь эрзятне панезельть Самарской губерниянь Вишка Толкан, Ми­ хайловна ды Каменка велетнестэ. Те ёвтнеманть видечинтень кемдяно сень кувалма, што Шоржа велень эрицятнень диалектэст (келест) пек моли вере ёвтазь велень эрзятнень келест ёнов ды фамилияткак неть велетнесэ истят улить.

Кавказтомбальксэнь мокшонь ды эрзянь ламо велень эрицятне ютазь 125 нетнень перть стувтызь тиринь келест, раськень оршамопелест. Вадрясто ванстызь эсь келест ды национальной коест Шоржа ве­лень эрзятне ды колмосядодо ламо семиятне, конат эрить ней Армениянь прявтошсо — Ереван ошсо.

Шоржа велесэнть кармасть эрямо эрзянь комсешка семият. Кува­ка ды стака киденть мейле нищей крестьянтнэнень пек стакаль ладямс кевень пандтнэнь ютксо эсь эрямост. Тесэ овсе аламольть вадря модат, арасель кудонь строямо-чапомо вирь. Те велень эрицятне тейсть самодо мейле землянкат. Ярсамопель ссыльнойтненень макссь Кавказтомбальксэнь сюпав пертпельксэсь. Пандтнэнь ютксо ламо ульнесть идем сеят, Севан эрькесь жо пешксель калдо. Васень шкастонть ломантне кунцесть калт, оцинясть.

Трудонь вечкиця надеждинецтнэ пандтнэнь ютксо аламонь-ала­монь кармасть соксеме-виднеме вадря мода панкстнэнь ды кастасть сюро. Пандтнэнь прява ушодсть трямо ревень, скалонь стадат. Землян­катнень таркас тейнесть кевень кудот.

Истямо ладсо Шоржа велень эрзятне эзть карма майсеме ярсамо­ пелень коряс. Оршамопельть эстест кодасть-стасть ревень понань сукнасто, лияназонь коцтсто, карсемапельть стасть апак теень кедьстэ.

Марявсь, што эсь чачома тарканть эйстэ Кавказонь пандтнэнь том­бале панезь эрзятне ушодсть спокойной эрямо. Алкуксонь тевсэ жо од таркасо эрицятненень свал грозясь целанек истожамонь опасность. Кавказтомбальксэнь армянонь ды рузонь мирной велетнень лангс сеетьстэ кай­севсть туркань раськень вооружённой бандат. Сынь кежейстэ нарь­гасть эрицятнень лангсо. Тень кувалма Шоржа велень эрзятненень савсь рамамс оружия ды ванстомс пряст. Шоржа велень эрицясь Василий Абрамович Кудряшов ёвтни:

— Минек тетянок ды деданок паксяв роботамо свал лиснесть вин­товка марто. Вейке велестэ омбоцес яксекшнильть ансяк оружия марто зярыя ломанть вейсэ. Надеждина велесэ свал эрясь казаконь пост 12 ломаньстэ. Сынст пельде те велень крестьянтнэ тонадсть леднеме ды боень ветямо.

Шоржа велень сыре ломантне ёвтнить, душманонь каявомань чит­нестэ ссыльнойтне, прок вейке семия, лисильть апак тердень «инжет­нень» каршо бороцямо. Цёратнень марто вейсэ оружия сайнильть кеде­зэст аватнеяк. Турция ёндо сазь врагонть каршо бороцямось кастсь Россиянтень эрзятнень патриотической мелест ды вечксть казацкой постонь солдаттнэнь.

Ютазь событиятнеде Василий Абрамович Сандиков, конанень 72 иеть, ёвтнесь миненек:

— 1910 иестэ карминек содамо, Азербайджанонь Акбулак ве­лестэ покш банда аноксты каявомс минек веленть лангс. Сынь арсесть, кода сеедьстэ тейнесть истя армянской велетнесэ, пансемс велень эри­цятнень, грабамс улипаронок, саемс скотинанок.

Сыре атятне мерсть велень весе ломантненень анокстамс врагонть вастомо ды теке жо шкастонть кучсть Акбулак велев старостанть записканзо марто кавто ломанть переговоронь ветямо. Старостась запис­канзо сёрмадсь: «Бути чокшнес минек ломантне а велявтыть, то пушкасо, кона минек ули, тапасынек веленк...» Переговоронь ветицятне курок велявтсть старостанть записканзо лангсо истямо сёрмадовкс марто: «Чуводо эсенк телатнень туртов покш яма, сестэ ванды сынст валясынек, а то сынь кадовить шакалтнэнень».

Те вестэнть велесь эзь удо. Ансяк пек сыретне ды эйкакштне ка­довкшность кудос. Весе лиятне, аватнеяк, лиссть врагонть эйстэ веленть ванстомо. Оборонасонть руководства ветясь Иван Качаргин, кона а умок сась армиясто. Кой-кона цёратне кандтнесть пандо пряс, кона парсте неявсь Акбулаксто, кодат-бути стака канстт.

Ашолгадоманзо марто на­блюдательной пунктстонть пачтясть, Акбулаксто появасть ламо ласте ло­манть. Сынь, пижнезь ды леднезь, ардсть Шоржа ве­ленть ёнов. Бандань розбойниктне зярдояк эзть служакшно ар­миясо, а содылизь, кода эря­ви леднемс оружиясто. Секс­ как, зярдо лисильть каршо­ зост организованной ло­манть, конат содылизь се шкань огнестрельной ору­жиянть, сынст омелчист сес­ке ёмиль. Надеждина веленть ма­лас апак пачкоде, роэбойникень шайкась вастозель вин­ товкасто дружной леднема­со. Ласте ардыцятнестэ ла­мот сеске маштозельть. Лиядозетнень ютксо истямо апак учнень «вастомась» тейсь талакадома. Самай те шкастонть пандонть прясто (конанень мейле кармасть мереме Пушка алкс), каятотсь покштояк-покш зэрть. Те зэртесь пандтнэнь ютксо кайсететсь пек кувать. Тусто ка­чамось жо, кона вельтизе весе пандонть, теевсь пелень кондямокс. Те и решизе тюреманть. Врагось кадынзе маштозь ломанензэ ды оргодсь. Штобу тандавтомс бандитнэнь, Надеждинань ломантне, пушкань таркас, пандонть прясо сезсть мазут марто порохонь боцька. Курок Акбулаксто Надеждинав састь представительть энялдома марто, штобу а леднемс Анбулаконть лангс «пушкастонть». Сынь макссть вал ды кемевтсть, што кармить те веленть марто дружамо. Аламос чатьмонемадо мейле/Василий Андреевич поладсь: — Мезть кортамс? Советской властенть самс Закавказьясо ара­сельть спокойной шкат, чить...

Надеждина велень эрзятне примасть активной участия советской властенть аравтомасо. Зярдо Закавказьясь оккупировазель английской войскасо, Надеждина велесэ салава эрясь Якстере Армиянь разведчикень группа. Крестьянтнэ лездасть тензэ эрьва мейсэ. Калонь кунды­цятне венчсэст усксесть разведчиктнень Севан эрькенть трокс ялгаст марто связень кирдеме.

Пенсионерэсь Василий Андреевич Сандиков ульнесь эсь велесэст рабоче-крестьянской комитетэнь васень председателекс. 1926 иестэ саезь 1930 иес сон важодсь велень Советэнь председате­лекс, 1931 иестэ 1940 иес — колхозонь председателекс.

Ней Шоржа велесэ живот­новодческой покш колхоз. Пан­до прянь лугатнень ланга ва­новить курдючной ревень покш стадат. Артелесь строи обще­ственной ламо од зданият. Ве­лень эрицятне Семён Павло­вич Ледяев, Михаил Иванович Ларионов, Исай Осипов Соловьев ды лият лововить форелень кунцемань коряс покш мастерэкс, конат роботасть Армянской ССР-нь «Рыботрестсэ». Семён Павлович Ледяев вадря роботанть кис казезь Ленинэнь орденсэ.

Соловьев Михаил Иванович, Юртаев Василий Абрамович ды Соловьев Давид Иванович стройкасо роботыть крановщикекс. Василий Абрамович Кудряшов те­ евсь телевизоронь ды радиоприёмникень коряс техникекс, Михаил Мат­ веевич Чиндин— тепловой двигателень коряс механик, Василий Матве­евич Юртаев — строи заводт, фабрикат, од кудот. Шоржань эрзятнестэ ламот трудить слесарекс, электросварщикекс, шоферэкс, шахтёрокс ды лия тевсэ.

Шоржань весе эрзятне, эсь тиринь кельдест башка, парсте кортыть армянонь, рузонь ды азербайджанонь кельтнесэ.