Салмат

Са́лмат — пек тантей вецана ярсамопель.

Салмань каямо чись — виде-паро покшчи. Тантей ярсамопеленть анокстамсто ули мезе кундамс лездыцятненьгак. Васняяк, эряви сувтнемс почт. Ичемс калгодо чапакс (ламбамсто, оргавтомо), козонь, ведьте-ловсодо башка, чулгомс алт, каямс аламошка сал. Кевердемс эчке карькскеть, керсемс сынст палтонь-палт — салматне анокт.

Те шканьте чугунсо вадрясто уш пиевель ловажав сывель. Сонзэ таргасызь, лакиведентень каить салматнень ладсо керсезь верек модамарть, салмат, веденть одс лакамодонзо мейле чулгить алт, нолдыть тов ой марто рестазь чурькат-морковт, лият мезть вечкевить, пидить 10-15 минутат. Пиемадозт мейле пештясызь-кайсесызь ваканга-тарелкава (веденек-мезнек эли стяко), таньшкавтсызь кансёройсэ, велькссэ ды ярсыть-коршить.

Содазь, эрьва азоравась свал мезеяк теи эсинзэ ладсо. Мертянок, кой-кие каи салматнень юткс аволь верек модамарть — модарькань каша (пидезь, томбазь ды ой-велькс марто човорязь модамарть).

Тантей-паро салмат лисить, зярдо сынст ичесызь сывельнолдань-мясорубкань пачк нолдазь верек максос. Товзюронь почтто башка, чапаксонтень кайсить сюронь каша, ликша эли сюро ямксонь почт. Пидитькак эйсэст аволь свал ловажа-сывель ведьсэ.