Ладямо

Ладямо — те эрзянь полань саемань койстэнть васень пелькс.

Зярдо кочкить вечкевикс тейтерь, урьвакстыцянть (женихенть) аванзо-тетянзо «шождыне» чистэ (таргочи, вастаньчи, калоньчи) тердить малавикс раськест, ёвтасызь тенст кочказь поланть, кевкстясызь, содыть - а содыть сынь берянь ёнкст те тейтеренть эйстэ. Весе тентнень парсте кортнезь, кармить озномо вешить лезкс Верешки Пазонть, кудонь кирдинть ды покштятнень-бабатнень пельде. Ознома шкасто пазава икеле кирвазтеви штатол, столь лангс путови кшить-салт. Озномсто ваныть — кенкшесь, вальматне, турбась ды мик уштомась улевельть пекстазь, авольть сова раужо вийть ды аволизь кола ушодозь тевенть.

Озномадо мейле кшинть ды салонть путсызь кошельс ды туить невестантень. Бути кортамотне удаласть, кшись ды салось полавтовить кши-сал лангс невестанть кудосто. Сэвевить сынь омбоце чистэ. Тень кисэ пурнавить весе малавикстнэ. Теде мейле невестанть тетязо пурны эсензэ роднянзо, ды ушодыть озномо. Озномась юты истя жо, кода урьвакстыцянть кудосо — вешить паро уцяска одтнэнень.

Каванямот

Сваттнэ каванить весень эсест винасо. Каванямо шкасто невестась ялганзо марто ашти цюлансо. Каванямодо мейле урьвакстыцянть тетязо ды мартонзо сазь малавикстнэ молить цюланс невестанть ваномо ды тешкс путомо. Сыненст пирясызь кинть урьваля ават: вешить нолдамост кис питне. Женихенть роднянзо каить стопкас вина ды нолдыть эйзэнзэ ярмак.

Цюлансо невестанть пирясызь ялгатне. Женихенть-урьвакстыцянть тетязо энялды тейтертненень невтемс невестанть. Ялгатне вешить тень кис пандома. Атявтось ды ававтось, бути васенцеде несызь невестанть, парстине вансызь, ды теить эсест «тешкс», лиякс меремс, казить тензэ: вина марто стопкас каить сиянь ярмак. Невестась аламошка копорды ды макссы ялгатненень. Мейле сайсы ярмаконть, стопканть макссы мекев атявтонтень. Истя жо атявтось казьсынзе ялгатнень.

Ававтось кази невестантень паця, пилекст, суркске ды кедькс. Тень пингстэ моры:

Вана казян тенть паця
Превев-содавксов ультяя,
Пилезэть путан мон пилекст
Кунсолыця ультяя,
Сурозот тонган сырнень суркс
Кедь челькевне ультяя,
Кедезэть тонган сиянь кедькс -
Кедь виевне ультяя.

Мейле урьванзо икеле ёвтнесы, мезекс саи сонзэ:

Ох, урьвинем-эеднем!
Цёран кувалт какамат!
Сайтян мон тонть, эеднем,
Чокшнэ кувать аштицякс,
Валське толонь пувицякс.
Кудос пенгень кандыцякс,
Начко ведрань кирди
Ваньксстэ кудонь теицякс,
Чевте таркань ацыцякс,
Сэрей прялксонь путыцякс,
Раужо палянь саицякс,
Ашо палянь максыцякс, 
Калгодо мушконь томбицякс,
Кувака коцтонь кодыцякс,
Кучт-киява молицякс,
Эрьва козонь кундыцякс,
Якинь-пакинь вастыцякс,
Тусь ломанень ильтицякс.

Невестанть аванзо икеле ававтось моры:

Иях, иях, ия-ях,
Иё, ваёх, ва-я-ёх!
Ох, свахинем-матушка!
Чешкстазь кадан умарина,
Кружазь кадан умарь чувто.
Сыть кучозень мельганзо.
Сырнесэ сынь сявтасызь
Масторонь келес корёнонзо,
Сиясо сынь сыргавтсызь
Менелень келес тарадонзо.
Иляк сорновтт, свахинем,
Раужо човаля моданзо,
Илить синде, матушкам,
Мазыйстэ цвети тарадонзо.
Кода кадса шумбрасто,
Истя максык вадрясто.

Невестанть анокстоманзо-казензэ

Невестась аноксты женихентень ды сонзэ роднятненень казнеть: женихентень викшневкс марто паця, ве паця пентень сюлми сиянь ярмак, омбоце пентень — сиянь суркс, атявтонтень понкст, ававтонтень викшнезь панар, женихенть крестнантень — викшнезь кокошник, сазортнэнень ды ялакстнэнень-дугатненень — пацят, лия роднятненень пракстат ды суркст. Невестанть роднянзо казнетнень максомсто морыть:

Ох, сватушка
Ох, свахине-матушка!
Илядоя пеняця
Седе покшке казнинес:
Пиже дугам парыям
- (Али сазором)
- Эзь содакшно аштема,
Тетненк казнеть анокстась,
Чокшнэ куватьс аштекшнесь,
Валське рана стякшнокшнось.
Эзь чийнекшне ульцява,
Эзь яксекшне кужова.

Кить сайсть казнеть, невестантень максыть ярмакт. Теде мейле аватне ды тейтертне моразь ильтить инжетнень кудо видьс. Атявтонь кудосо макссызь казненть женихентень. Тень пингстэ атявтонть икеле морыть:

Иях, иях, ия-ях, 
Иё, ваёх, ва-я-нь! 
Идика, сват, идика,  
Рамика, сват, рамика,
Каяка, сват, каяка 
Ниле пева ниль алтоть,  
Куншказонзо ветеце.
Тесэ оянок тусозо,
Тесэ ялганок чамазо,
Гостинецекс кучсынек,
Гостинецекс макссынек,  
Радошнасто саессэ,
Вечкезь-кельгезь улезэ.

Атявтось рамасы патянть. Мейле тейтертне морыть женихенть икеле:

Пиже дугай,а Сёма!
Мазы Дугай,а Сёма!
Минь туинек гостинець,
Лиця мазы пацязо;
Тесэ сэрьзэ, рунгозо,
Тесэ тюссо-поназо.
Туи а туи мелезэть,
Туи а туи превезэть?

Сёрм.:

• Тиринь вал, Литературань коряс хрестоматия эрзянь школань 8-це класстнэнень, Морд. кн. изд., Саранск, 1993, с. 255
• Евсевьев, М. Е. Мордовская Свадьба, 1931, сс 21-23