Тюштянь пазчангот
Тюштянь пазчангот — те валонзо икеле эриця эрзятнене Эрзянь Инязорнь Тюштянь.
Мон кадан тыненк эсинь торомам. Сон лезды тыненк вейсендявксомс, коли лиси мезеньгак зыян эрзянтнень ютксо. Седядо торомасо, мон марятызь тынк, ды сан тыненк лездамо.
Цитни ведесь лейтнесэ, мизолдыть минек лисьмапрятне…
Те аволь ансяк ведь, те кезэрь покштянок верест.
Лаймонь мазый цецятне — те минек сазоронок,
Виев овтось, превей верьгизэсь ды ёндол карциганось — лелянок.
Жольни ведесь — те тетянь вайгелезэ, чуди лейтне — патянок.
Сиянь ведьсэ симдить сынь эйденек.
Покштянь лемтне эрить минек мельсэ, минь кундситяно сынст репештясо.
Эрьва тикшесь корты Пазонь кельсэ.
Аволь весе раськетне чарькодить минек эрямонь лувонть,
Сынст туртов весе таркатне вейкеть.
Теке ят ломанть, коннат яксить веть,
Саить моданть пельде, мезе тенст эряви.
Модась сыненст аволь малавикс ломань — каршо тюриця.
Зярдо изнясызь, нарьгасызь, туить седе тов.
Сынь шождасто кадыть тетянь калмотнень,
Салыть моданть шумбрачинзэ эйдест кедьстэ, ды а талныть.
Модась ды менелесь сынст туртов, теке ули-паро,
Кона микшневи, рамсеви, салави, кода ревесь эли суликань эрьгетне.
Сынь топодема а содыть. Анокт нилеме весементь…
Мельгаст — чувар паксят…
Миненек эряви чевте вармань тошкамо,
Пиземень каштордома, ды лопань тантей качадома.
Ракшатне, чувтотне, ломантне весе лексить коштсо.
Коштось миненек пек питней, сонтемензэ арась Эрямо.
Кить минь ракшавтомо, нармуньтеме, конат эрить пертьпельганок?
Мезе тееви ракшатнень марто, се лиси ломантнень мартояк.
Вармань зэхелесь, конаньсэ васенцеде лексесь покштянок,
Маринзе сонзэ меельсе лекстямонтькак.
Минек кезэрень моротне теке суреть сюлмить эйсэнек покштянок марто.
Минь кортатано эйденек туртов: сынст пильгест ало — покштянок рунго челькест.
Модантень — сюконямо, ванстома…
Модась — Аванок, мезе тееви Мастораванть марто — се лиси эйдензэ мартояк.
Зярдо ломанесь кольсти моданть, сон теи зыян эстензэ ды эйденстэнь.
Сон колы покштянь койтнень.
Весемесь, мезе эри моданть лангсо, лиссь ве куросто.
Аволь ломанесь кодызе эрямонь коцтонть.
Сон – сонськак ансяк суре эйсэнзэ.
Мезе теи коцтонтень — сень теи эстензэ.
Пазось Мастор лангсо вейке. Сон вечксы Мастораванть.
Кие теи зыян Масторавантень, се а кунсолы Инешкипазонть.
Зярдо меельце Эрзясь ды Мокшось ёмии те Мастор лангсто
Ды сулей ладсо туи моданзо велькска, эрзянь ды мокшонь раськетьнень оймест
Ялатеке карми эрямо неть вирьтнесэ, неть лейтнень чиресэ.
Сон зярдояк а стувтсынзе тиринь моданзо конань вечксы, кода пиже тякинесь —
Вечксы аванзо седеень токноманть.
Вечкеде Мастораванть, кода минь вечкинек сонзэ.
Ванстодо Мастораванть, кода минь ванстынек сонзэ.
Ванстодо мельсэнк, превсэнк весементь, мезе максть тенк покштятне,
Койтнень, кирдатнень, моротнень, ёвкстнэнь.
Весе вийсэнк, весе оймесэнк бажадо максомо эсь раськень мазычинть эйденк туртов.
Вечкеде сонзэ, кода Инешкипазось вечки весень.
Сон теизе Мастораванть весенень.
Минек Инешкипазось — весень Паз.
Сон вечки ды мелявты Масторонть кис.
Паряк, монь раськем а ёми…
Вансынек…
Кунсолодо "Тюштянь пазчангот" тесе: Rpod, седямось: Буянкинэнь Юриень, "Тюштянь пазчангот" ютавтызь: Алёшкин Андрей, Маризь Кемаль саезь "Минек эрямось кадовсь тевтнесэ" седямо кирькстенть
Сынь тесэ: http://www.torama.ru/erziana/index.php?section=prose&id=49 Архивировазь 7 Даволковонь 2009 иестэ.