Свадьба цёрань кудосо

Свадьба цёрань кудосо — те эрзянь полань саемань койстэнть колмоце пелькс.

Прякань панема чи

Чапаксоньтеема

Женихенть кудосо свадьбась ушодови прякань панемасо. Родня ютксто тердить кавто-колмо ава чапаксонь тееме. Неть аватненень мерить стряпчейть. Сынь аштить женихенть кудосо свадьбанть прядома видьс.

Чапаксонь теемантень явови башка мель: цюлансто чапаксонь паренть ливтсызь кудо куншкас, стряпчейтне арыть перьканзо. Тесэ жо женихенть авазо ды лия ават. Вейкесь эйстэст паренть потмова ютавты палыця чев (сувтасы), штобу панемс раужо вийтнень, омбоцесь теде мейле каи ведь, колмоцесь пкты товт, нилецесь човори. Весе тень теезь, аватне моразь колмоксть ютыть паренть перька. Икеле моли кирвастезь чев марто стряпчеесь, мельганзо остаткатне. Эрьва ютамсто човорицясь човори чапаксонть. Те шкане стряпчейтне морыть:
Вай, пасчангот, пасчангот!
Лиси Чипаз чантянок,
Валги Ковпаз чантянок.
Кона Пазось Сёмань( женихенть лемезе) максызе,
Секе Пазось чантямизь
Норовавань тееме.
Вай, удалак, удалак,
Норовава, матушка!
Сёмань полас тейтядызь,
Сёмань полас сыргавттадызь.
Аволь сусик прясто саидизь,
Аволь сусик потмаксто таргидизь;
Аволь сусик пряксонок,
Аволь сусик потмаксонят.
Аволь мода пулеват,
Аволь крыша челькеват,
Сусик куншкасто саезят,
Сусик седейстэ саезят.
Монь шичинем, алинем,
Монь шичинем, лелинем,
Покш каявтонь каиця,
Покш оброконь пандыця,
Ламо модань сокиця,
Ламо сюронь видиця.
Норовава, матушка!
Норовава, сияка!
Козо, козо видезят?
Козо, козо чачозят?
Пойма паксяс — од модас,
Раужо човаля од модас.
Сисем сокасо сокидизь,
Сисем изасо изыдизь;
Парт боярт тонть сокидизь,
Сыре бояр видинзить,
Бояронь тейтерть нуидиз.
Прякань панеме ентнема

Свадьбань васенце чистэ женихесь эсензэ роднясто терди тейтерь, штобу кучомс сынст велева тердемс народонть свадьбас -прякань панеме. Тейтертне сыть свадьбас наряжазь. Стряпчейтне андыть сынст пачалксесэ ды рестазь алдо, мейле моразь кучсызь якамо велева ломанень тердеме.

Велева якамодо мейле тейтертне сыть женихенть кудонть ваксс ды морыть:
Боярават-стряпухат!
Азорават-стряпчават!
Лиседеяк каршозонок,
Лиседеяк вастомонок.
Тынк наказнэ аштинек,
Тынк приказнэ аштинек,
Велень кругом ютынек,
Велень ломанть тердинек,
Ве кудояк эзнек кадт,
Ве ломаньгак эзнек стувт,
Сыренек-однэк тердинек.
Сыретнень минь тердинек
Садовойде ярсамо,
Медовойде симеме.
Седе одтнэнь тердинек
Стака канцтонь кандомо,
Одтнэнь-одтнэнь, эйкакштнень-
Мазы свадьбань ваномо.
Вай, якинек, якинек,
Веленть кругом ютынек.
Покш ульцяванть ютамсто,
Неинек минь киштицят,
Неинек минь морыцят.
Веленть вере песэнзэ
Од цёратне-бояртнэ
Седить мазы седямсо;
Велесть ало песэнзэ
Боярават-тейтертне
Морыть мазы моросо.
Эзнек лотксе ваксозост,
Эзнек вано лангозост,
Эзнек печтя минь шканок,
Эзнек ютавт поранок:
Минь капшинек - ёвтнинек,
Минь капшинек - тердинек
Карксамова веднева ( Бути тельня, тейтертне морыть: «Карксамова ловнева эзнек совсек эжнеме»)
Кумажава рудазга.

Стряпчейтне лисить вастомост пуре марто, каванить эйсэст ды морыть:
Вай, пасиба, пасиба,
Тейтерть-бояравинеть!
Вай, пасиба, пасиба,
Тейтерть- азоравинеть!
Ламо труда неиде,
Ламо нужа примиде,
Эзиде пель пиземде,
Эзиде пель вармадо.
Вай, совадо, совадо,
Эзем пиряс озадо.

Свахань ускома ды кудань пурнамо

Зярс пурнави народось, женихесь пари банясо, пурны-сэрни, карсемстэ кочкарятнень алов путы сиянь ярмакт. Вейкень эйстэст казьсы низанянстэнь, омбоценть — невестантень.

Пурнамодо-сэрнямодо мейле женихесь арды сваханть мельга. Свахакс эрси крестной авась. Свахась аноксты курник ды орешкат.
Женихенть марто сваханть мельга якить од аватне ды тей тертне. Туемстэ аватне ды тёйтертне морыть:
Кудонь кирди, корьминець,
Керень чочконь пас, матушка!
Иля тандадт шумдонок,
Иля срастянт криктенек:
Аволь тонть срастямс таргинек,
Аволь тонть тандавтомс нолдынек.
Мазынзэ кие таргинек,
Паронзо кис нолдынек.
Миша леляй, лелякай!
Миша леляй, корьмакай!
Тонть кедьстэ превнеть кевкстянок,
Тонть кедьстэ превнеть вештянок:
Мерят а мерят, лелякай,
Сваха мельга молемде,
Кудава мельга туемде?
Бути мерят лелякай.
Сваха мельга мельтянок,
Кудава мельга туйтянок
Кильдень-поводень лишмесэ,
Камбрастонь-панстонь ракшасо.
Кува, кува мольтянок?
Кува, кува ардтанок?
Москов улиця юткова,
Ростов порядкань кувалма,
Кшнисэ сэдязь сэдь ланга,
Пижень баляса юткова,
Штадо пазава икельга,
Кирвастень свеча валдова,
Ладан качамо чинева.
Серойть, буройть лишменек,
Чопода-сивойть ракшанок,
Чопода кардсо кирдьсынек,
Чукань виште андсынек,
Лембе ведте симдьсынек.(кизна-кельме ведте симдьсынек)
Киштезь киштить сынст пильгест,
Ветькс юмболдыть лангинест,
Юдмакс юводыть пулынест,
Штердезь штердить сельминест,
Васоньбеельть пилинест,
Таргань парсейть гривинест,
Щипедьс а понгить сынст понаст,
Хрустальной стопкат сынст кенжест.
Коське таркава молемстэ,
Лисьма прят лисить пильгалдост,
ф3 Начко таркава молемстэ
Толт верьгедить пильгалдост.

Свахань ортатнень икеле морыть: Ану патянь кардазонь кирдизэ,
Ану патянь кардо сяркозо!
Иля тандадт шумдонок,
Иля срастявт увттонок,
Аволь тонть тандавтомс таргинек,
Аволь тонть срастямс нлдынек.
Патянь кардазонь кирдизэ,
Патянь кардо сяркозо!
Бути улят тон мадезь
Озакая озадо,
Бути улят озадо,
Стякаяк тон пильге лангс,
Ризат оршить лангозот,
Крёстот каик кирьгазот,
Кадилат саик кедезэть.
Ризат эйсэ вельтямизь,
Крёстот эйсэ пирямизь,
Кадилаёот сувтамизь.

Велень кувалт ютынек,
Порядкань кувалт ардынек,
Кудонь-кудонь ловнынек,
Кавтонь-кавтонь цётынек.
Кода минь пачкодинек
Ану патянь орта лангс,
Ортазо паижозь келейстэ,
Крышазо кепедезь сэрейстэ.
Минь ортадонзояк келейтянк,
Крышадонзояк сэрейтянк.
Ану патяй, патякай!
Ану патяй, корьмакай!
Бути учат эйсэнек,
Листяятя каршонок.

Свахась лиси крыльця лангс, совавтсынзе инжетненъ кудос. Свахась моры атявтонть ды ававтонть икеле.
Зярдо пачкодить женихень кудонтень, вастомо лиси женихенть авазо, совавтсы сваханть кудос. Свахась ерты суркс, кудыкеле моры:
Ох, лелякай-кумушкам!
Б ути монь эйсэ,
Кенкшеть панжик келейстэ,
Косякот кепедик сэрейстэ.
Кедьсэнь чачи норовом,
Вереть-алот кувонзо,
Кемгавтово лувокзо,
Москов нарядт лангсонзо —
Кенкшедеттяк келейне.
Косяктоткак сэрейне.
Бути седьсэть тон учат,
Поровтот велькска эскельдян,
Кудос сэрень совавтсан.
Сэрь совамодон икеле,
Сия валдо кевердян,
Сия валдо совазо.


Кеверди сурксонть. Кудосо моры:
Лелянь кудонь кирдизэ!
Лелянь кудонь ванызэ!
Иля тандадт шумнедень,
Иля тандадт вайгельдень:
Аволь беряньс нолдыя,
Аволь а парс таргия,—
Покш радостес нолдыя.
Покш эрьгедьмас таргия.
Кудонь кирди, матушка,
Козонь седееть рожомтса? Лелянь эзем прясонзо
Путозь таргань столезэ.
Се столенть куншкасо
Сиянь блидя аравтозь,
Се блидиненть лангсо
Колмо садовой яблочкат,
Колмо медовой пряничкат,
Сезэ седееть рожомтьтк,
Сезэ седесть оймавтык.

Пшкади кудазоравантень:
Ох, а патякай-тиринем
Сакая малазон.
Кедьстэнь норовом саика,
Пешкее берюмам чамдыка.

Женихенть авазо сваханть кедьсэ сайсы пряканть ды зярсмейс кекшсы цюланс. Свахась моры:
А лелякай а Илё!
А патякай а Ану!
Коли сайсамизь покш цислас.
Коли сайсамизь покш эрьгас,
Козо тень тарка невттядо?
Козо тарка макеттадо?
Коли сайсамизь покш цислас,
Коли сайсамизь покш эрьгас,
Монь озавтомизь покш таркас.

Кудазортнэ невтить тенээ тарка икельце уголсо. Сон сюкони ды озы невтезь таркантень. Те шкасто сон тееви свадьбань ветицякс кедьстэ сайсы пряканть ды зярс.

Инжень симдема-андома

Кармить пурнамо инжеть канст марто: покш вакан товт, чи- рева путневить алт, зяро кельгить, ансяк штобу улевельть аволь четнойть. Ваканонть куншкас путневи скал ой или тулевкс. Канст марто сьтть аватне, цёратне мельгаст — чаво кедть. Аволь четнойчислась невти, што кудосо а саты ломань.

Инжетнень каванить винасо ды икелест морыть:
Туйдай, туйдай, туйдайдай.
Туйдо, ваёх, ваяёх.
Косо, косо те туйдайсь?
Косо, косо ваяёхсь?
Колоньгемень лаз потсо,
Ниленьгемень пинкс экшсэ.
Яло симеде, симеде,
Канды мекшкеть, симеде,
Стакинестэ кандыде,
Бойкинестэ чииде.
Монь лелинем-алинем
Эрьва мезе анокстась,
Ули мезде тынк симдемс,
Ули мезде каванямс:
Кавто варт пия сон пидесь,
Кавто мацтка путынзе,
Дестерик вина сон рамась,
Кавто утомга путынзе.
Минь кемень — комсь иеть
Те чинесэнть учинек,
Кемень — комсь иеть
Те чинесэнть эрьвинек.
Васня ловинек минь читнень-
Кемень комсь - чить тополесть,
Мейле ловинек минь ковтнень-
Кемень — комсь ковт тополесть,
Мейле ловинек иетнень –
Кемень — комсь иеть тополесть.
Аволинь симе винадо,
Аволинь симе пиядо —
Вечкан паро роднядо,
Вечкан паро раськеде.
Кечесь мери: кандомак.
Пойлась мери: симемак.
Козонь чачнесь Комолявась?
Козонь каснесь Комолявась?
Начко таркас — каль пулос,
Летьке таркас чеядавкскес.
Рукшнат-рукшнат лопинензэ,
Мокшнат – мокшнат шишкинензе.
Прась кельминесь чавокшнынде,
Лиси чинесь костякшнызе,
Пуви вармась пувакшнызе,
Вить межинес кандокшнызе.
Вить межасонть Норовава,
Норовава-боярава.
Норов-Комлят сынь здорякшность,
Норонт-Комлят сынь пелькстакшность.
Норовось мери: мон здорован,
Комлясь мери: моя виеван.
-Ёвтык, Норов, здоровчинеть.
-Ёвтык, Комля, виевчинеть.
-Давай, Норов, мирятанок.
- Давай, Комля, ладятанок.
Превеень потс минь пратанок
Морокс, валнэкс аратанок.
Дураконь потс минь пратанок,
Турикс, сёвныкс аратанок.

Прякань панема

Зярдо пуромить инжетне, стряпицятне ушодыть прякань панеме (прякатне эрсить вете, сисем или вейксэ).

Эрьва прякась канды эсензэ лем:

Васенцесь — сехте покшось — лувонь кши. Начинкас 12 слойть: 1— суронь каша, 2 — топо, З — алонь, 4 — таго каша, 5 — топо ды истя седе тов. Лувонь кшисъ кадовкшны сватонть столь лангс невестанть таркас.

Омбоцесь — совамо пряка. Сон шождыньгавты невестань кудос совамонть.
Колмоцесь — ава ловцо. Анокстави те прякась ванькс ойстэ. Сонзэ макссызь невестань авантень.
Нилецесь — ванькс таркань пряка. Те пряканть марто невестась туемадо икеле ванькс таркасо корты кулозь покштянзо-бабанзо марто. Ветецесь — той пряка. Невестанть кудосо лангсонзо озныть. Прякатнень пецькас путомадо икеле стряпицятне морыть:
Каштом кирди, матушка!
Каштом кирди, сияка!
Пидить-панить мазыстэ,
Мельс туишкакс тон теить.
Илить пулта тон лангост,
Илить чентя тон алксост:
Васолонь таркас саимат,
Кельгезень таркас саимат
Ломань пря марто спорямо,
Ломань пря марто пелькстамо.

Зярдо прякатне улить анокт, стряпиця койментень понгавтыть зярыя баягинеть, вейсэ кундыть койментень ды морыть:
Каштом ава-матушка!
Каштомонь кирди, сияка!
Максыть минек пряканок,
Нолдыть минек пряканок
И шумбрасто, паросто,
И маэыстэ, вадрясто.
Иляст яжавт сынст кувост,
Иляст скирянт сынст чирест.

Прякатнень путсызь столь лангс ды морыть:
Цярмун нелень атятне,
Цярмун велень бабатне!
Цислань содамодо колттадо.
Вадрянь содамодо бойкатад (о).
Эрьга ванынка, ванынка.
Кодамо панинек лувонь кшинть.
Кодамо пидинек той пряканть,
Туи а туи мелезэнк,
Педи а педи седейзэнк. -

Инжетне шныть прякатнень, ушодови ознома. Столь лангс прякатнень ваксс путыть каша чакш, салт, ведра пуре ды бутылка вина; пазаватнень икеле кирвастить штатол. Бабинетне ловныть молитва ды энялдыть Пазонть икеле, штобу свадьбась ютаволь вадрясто, штобу ванстомс женихенть апаро ойме марто ломанде.

Озномадо мейле инжетнень каванить.

Кудань столь

Пуромить кудатне. Эрьвась сы кши марто. Зярдо весе пуро- мить, свахась карми капшавтомо. Туемадо икеле кудатнень андыть. Столь экшс васняяк озы свахась, ваксозонзо женихесь, жени- хенть ваксс озы покш кудась, мейле кадовикс кудатне. Уредевесь озы столенть омбоце пес. Истямо мельга мельцек молемась ванстови весе свадьбань перть.
Уредевесь вансты женихенть ды весе кудатнень раужо вийде. Азоркшни столь экшсэ. Мельганзо моли покш кудась. Сонзэ кедьсэ азоронь казнась. Обедамсто стряпчейтне ды тейтертне морыть.
Свахась азортнэнь икеле моры:

Вай, баславамизь, нолдамизь
Васолонь таркас мольменень,
Асодазь таркас мольменень.
Ваславамизь шумбрасто,
Тынь кучомизь паросто.
Кода кучеамизь паросто,
Истя парсте сазданок.
Синдить кавто пильгензэ!

Женихенть тетянзо-аванзо баславить поездэнть: тетясь саи ке- деээнзэ пазава кирвастезь штатол марто, авась — кши-сал марто, арыть кудо куншкас. Васня баславасызь женихенть, мейле сваханть, уредевенть, покш куданть ды седе тов.

Кудань ильтема

Кудань туеметэ тейтертне морыть:
Ков карей наряжась,
Ков карей урядась,
Пиле пильгень вачкодезь,
Меште грудень кепедезь?
Штатолкс палыть сельмензэ,
Ёндолкс налксить пилензэ,
Пурдань сюлгам ашкозо,
Пижень кетькске чирькезэ,
Мишарань плетявкст шлеянзо,
Пурдань уськеть ождянзо.
Карей пурнась мазынь кис,
Карей пурнась паронь кис.
Карей ракша-корьмакай,
Карей ракша-тирякай!
Иля капша икелев,
Иля кадонт удалов,
Ардт куншка виднесэ,
Ардт мазы таркасо.
Анна кази пацине,
Се лангозот шлеинекс.
Анна кази сюлгамне,
Се кирьгазот ашкинекс;
Анна кази тенть суркеке,
Се чирькезэть колицькакс.
Анна кази тенть кетькске,
Се пиьгалот подковинекс.

Зярдо поеэдэеь сырги, сынь морыть:
Ардодо, кудат, ардодо!
Ардодо, андат, ардодо!
Киява молезь, кинь колазь,
Кивтеме молезь, кинь теезь.
Мадезь тикшенть стявтодо,
Стядо тикшенть мадстеде.
Паронь каршо щемешка,
Апаронь каршо —шучавшка.
Дикой степка ардомсто
Тикшень-тикшень тынь ловинк,
Кавтонь-кавтонь тынь цётынк.
Кова тикшесь ськамнензэ,
Кона тикшесь лишнойне,
Нурдо прязонк тынь путынк,
Кудов-кардазов тынь ускинк.
Покш вирень трокс ардомсто
Чувтонь, кавтонь тынь ловинк,
Кавтонь-кавтонь тынь цётынк,
Кона чувтось ськамнензэ,
Кова чувтось лишнойне,
Нурдо прязонк тынь путынк,
Кудов-кардазов тынь ускинк.
Цярмун велес совамсто
Кудонь-кудонь тынь ловинк.
Кавтонь-кавтонь тынь цётинк..
Кона кудось ськамонзо,
Кона кудось лишнойне.
Се кудонтень совадо!
Се кудосонть ломантнень
Вейте-вейте тынь ловинк.
Кавтонь-кавтонь тынь цётынк.
Кона ломанесь лишнойне,
Кона ломанесь ськамонзо.
Нурдо прязонк озавтынк,
Кудов-кардазов тынь ускинк
Пизэнь-ашконь пурнамо.
Левксэнь-эйдень ливтеме.

Ушосо свахась моры:
Кардазонь кирди, корьминець,
Кардо сярко-матушка!
Кода листянок шумбрасто,
Истя сазданок вадрясто.
Велень-сядонь пас, матушка,
Велень кирди, корьминець!
Аштек берянь арсиде,
Ваномизь лихой ломанде.
Верьга ливти лихоенть
Синдить кавто сёлмонзо,
Алга юты беряненть
Синдить кавто пильгензэ!

Кудатнень туемстэ пуромить бабинеть. Сынь лисить ушов эрьва кодамо ярсамопель марто: пачалксеть, алт, прякат, вина, пива. Тикше лангс ацыть столешник, путсызь весе ярсамопельтнень ды ушодьтть чилисема ёнов озномо.

Вейке бабинесь энялды покштятнень—бабатнень икеле, штобу сынь ванстовлизь кудатнень чопода вийстэ ды зыянов ломанде. Эрьва ярсамопеленть эйетэ яви покольне ды путы мода лангс по- кштятнень-бабатнень туртов, валы аламонь-аламонь вина ды пива.

Сёрм.:

• Тиринь вал, Литературань коряс хрестоматия эрзянь школань 8-це класстнэнень, Морд. кн. изд., Саранск, 1993, с. 255
• Евсевьев, М. Е. Мордовская Свадьба, 1931, сс 21-23