Промкс
Промксось — эрзяраськень кочкавиця тёкш ветикурось. Промксось пурнавкшны 5 иес весть, бути Эрзянь Масторсонть олячисэ важодить эрзянь ветямкоень койкурот, вейсэндявкст, раськеломанень вейс пурнавкст, ды кодаткак кардавкст сынст важодемантень арасть. Промксонть ютавтома таркась-чись яволявтови Инязоронь башка Меремасо, бути жо Инязорось кодамояк тувталонь коряс а карми, сестэ Атянь Эземень башка мельпутомасо.
Инязорось кемексты Промксонь пурнавома чинть умарьковонь колмоце таргочистэнть, меельце Промксонь ютавтома чиденть мейле 5 иетнень ютазь. Инязоронтень эряви нолдамс Промксонть ютавтома чиденть Мерема. Те тевконёвось нолдави Промксонть ютавтома чиденть пельиеде икеле. Васенце Промксонть ютавтома чинть путсы Инязорось, тень кисэ сон аравты 6 ковт промксонтень анокстамс.
Зярдо Инязорось путсы эсь Мереманзо Промксонь ютавтоманть коряс ломантнень сельме икелев И-вальмасонзо, ковонь ютазь Атянь Эзементень эряви пурнамс Кочкамо куро, козонь кармить совамо колмо ломанть, конат аштемаст-улемаст коряс вейкеть Промксонь делегаттнэнь марто. Кочкамо куронь промксось ловови важодицякс, зярдо эйсэнзэ кармить улеме кавто ломанде аволь седе аламо. Кочкамо куронть мельпутоматне кемекставить вайгелень ламочисэнть ды путовить протоколонь парцунсо, конанть тешкстасызь (эсь кедьчелькесэт) ансяк сеть Кочкамо курос совицятне, конат ульнесть промкссонть.
Карминдеряйть Эрзянь Масторонь модатнень лангсо юридикань эли политикань (полициянь) кардамот эли амеремат эрзяраськень койкуротнень ды эрзянь вейсэндявкстнэнь туртов – Инязорось нолды башка Мерема, конаньсэнть яволявты Промксонть а тердемадонть ды неть тувталтнэде. Зярдо истямо Меремась лиси, Промксонть таркас карми важодеме Атянь Эземесь семс, зярс Инязорось од Меремасонзо а яволявты седикеле ледстязь кардамотнень-амерематнень арасьчидест.
Промксонть арась кемекстазь делегатонь ламоксчизэ. Кочказь ломантнень ламоксчись кемекстави делегаттнэнь лемлувтнень коряс, конатне максовить Кочкамо курос кочкамо пелькстнэсэ.
Промксонь кочказь ломанекс мереви улемс ломанентень, конантень топодсть 18 иеть ды конась а сёпи эрзянь ломанекс улемачинзэ.
Промксонь кочкавиця делегатокс витнемс
Промксонь кочкавиця делегатокс ловови: – эрзянь ветямкоень койкуро, ломанень вейсэндявкс, веле-сядонь куро, паро тевень куро (седе тов – эрзятнень вейсэндявкс), кона ютызе тешкстамо тевенть (регистрациянть) эсь масторсо; – эрзяломанень куро, конасонть 30-де аволь седе аламо ломанть (седе тов – эрзятнень куро), конат вейсэндявить Промксос эсь делегатонь (кочказь ломанень) кочкамос;
Эрзянь ломанень куротненень мереви кочкамс Промксос вейке делегат эрьва колоньгемень ломантнень ютксто.
Промксос делегатонь кочкамось эрзянь ломанень куротнень пельде путови протоколс, конань сёрмадсты куронь прявтось (ветиесь) ды кона кемексты сонзэ путоматешксэ. Протоколось поладови куронть лемрисьмесэнзэ, кочкамо квотанть а коламонзо мельсэ кирдезь.
Делегатонь Промксос кочкамось эрзяломанень куронь пельде путови протоколс, конась кемекстави (эсь кедьчелькесэнь путозь) те куронтень весе совицятнес.
Делегатонь кочкиця пелькстнэ кочкить эсь делегатост эсь мелест коряс: панжадо эли салава вайгелень максома вельде.
Делегатонь кочкамодо протоколтнэ максовить кемекстамонь кис Кочкамо курос Промксонть ютавтома чинзэ 2 ковтнеде икеле.
Ансяк Промксонь топавтома тевтнес совить витнемс
Ансяк Промксонь топавтома тевтнес совить: – эрзянь раськемолеманть тёкшмельтнень ды тевпутовкстнэнь, конатнень сави топавтомс Атянь Эзементень ды Инязоронтень, кочкамось ды аравтомась-яволявтомась;
– те Койлувонтень полавтомань теемась;
– Инязоронть таркастонзо айгемась;
– Атянь Эзементь нолдамось;
– Видекуронть нолдамось;
– Эрзя Масторонь буйкикстнэнь кемекстамось.
Промксонть важодеманзо вети Инязорось эли сонзэ мельсэ аравтозь Чирязось. Промксонь ветицясь аравтни ды максни Промксонтень кемекстамс ванновиця кевкстематнень, мельпутовксонь арсевкстнэнь, максни ды а максни вал делегаттнэнень, бути кияк терявты коламо Промксонь ютавтома лувонть.
Промксонть мельпутоматне кемекставить делегаттнэнь вайгелень ламочисэнть. Те Койлувонть сёрмадовкстнэнь полавтомадо Промксонть мельпутоматне кемекставить делегаттнэнь 2/3 пелькстнэде вайгельтнесэ. Промксонть мельпутоманзо путовить ломанень сельме икелев Инязоронть И-вальмазонзо. Промкссонть важодема келекс ловови эрзянсесь.