Мекшень кирдема

Мекшень кирдема— кезэрень эрзя раськень кой. Касомстонзо сон ютась колмо кить: бортничества, кандосо мекшень кирдема ды нешке пирень тейнема. Минек эрань I тёжтиестэнть эрзятне, кода теде икелень пингетнестэяк, пурнасть се меденть, конань кандтнесть чувтонь ундотнес идем мекшетне. Те меденть ды штанть нолдасть тевс эсест кудоютксо ды полавтнесть эрьва мезе лангс, микшнесть.

Минек эрань I тёжтиень ушодомсто чувтнэс ундотненнь-борттнень ушодость тейнеме сынсь ломантне – мекштнень ламолгавтомаст кисэ. Тень туртов сесэнь кузнецтне анокстыльть бортень узереть – кувакат (40-шка сантиметрань кувалмосо), теине оржакс марто курсякс мендязь узереть. Теде башка, теильть бортень пелемат (долотат), пеельть.
Бортенть карамодо мейле пурнылизь-сэрнилизь потмонзо. Сырьксэнь таркас, кода ней, кедьсэ сеезь те ундонтень башка койсэ кеместыльть илёвт. «Азгондиця», кудовтомо мекш пувозонть манямга путытльть бортентень эли сюлмильть борть марто чувтонтень медь, керязпал эли шта, конань эйстэ ялатеке молиль медь чине.

Те тевенть вечксть ды тейсть пек ламо. Ульнесть натой пек покш «бортной уходайть» - вирьсэ таркат, косо эрьва маштовикс чувтосонть – седее эчкетнесэ – теезельть бортть. Лиятнесэ мик кавто, колмо. Неть борттне лововсть сонсензэ теицянть, секс мекштнень теезь-каразь ундо марто чувттнэ тешкставильть бортникенть эсензэ тешкссэнзэ. Эсь мелензэ коряс сон эли миилизе, эли казилизе киненьгак те «бортной ухожаенть».

XVI пингестэ саезь появить кандонь некшть. Сынст путнесть кода вирь кужос, исят кудо маласкак. Нешкеть карыльть кавто-колмо сэльсэ (метрашка эчкесэ) ды кавтошка метрань сэрьсэ кандос. Сестэ минек виртне пешксельть истямо чувтодо, конатнень эчкест ульнесть зярыя сэльть. Верде те нешкесь вельтявиль пекшее керень латосо. Кандонть куншка видьсэензэ теезель мекшень совсема варясь. Сеедьстэ те нешкенть паролксозо – икельце пельксэзэ – мазылгавтовиль Нишке пазонть керязь арцтсо . Нишке пазось, эрзятнень пазонь кемемасо сехте покш пазось, ульнесь мекшень кирдийтнень туротов лездыцякс-ванстыцякскак. Ней истямо кезэрень нешке неят ансяк Саранскойсэ республикань краеведческой музейсэ. Ды бути ванстовсь киньгак эсензэ нешкепиресэ, зярдо мекш мельга якамо ёрокоськак, весе эрявикс кедьёнксоськак ютыть ве сыместэ омбоцес.

Чарькодеви, кезэрень шкане нешкетне каравильть кандосто, аволь пурнавильть башка лаз пестэ, кода ней – теде корты нешке парь валоськак, кона ули эрзянь кельсэ. Кой-кона велетнесэ те валось ванстовсь минек шкас. Неть велетнесэ парь мерить аволь куш кодамо паренть эйстэ, истя лемдить ансяк сень, кона каразь эчке кандосто.

Олясто эрямось макссь кирдемс покш нешкепиреть. Кой-конатнестэ нешкетнеде ульнесть а вейке сядот. Сеедьстэ вастневсть весесядодо ламо нешке мартот. Медесь ды штась ламочист кувалма ульнесть пек дёшоват, ды ламонь-ламонь усксесть эйстэст микшнеме. Иоганн Кильбургер шведэсь, кона сакшнось минек ёнкстнэс рамсеме-микшнеме, 1674 иестэ тешкстызе:

«Куш тесэ ды тосо Московсо добавить ламо медь… но Мордва провинциясонть пурныть ялатеке сехте паронть, ды сон весе ютавтови масторсонть».

«Борьтной ухажайтне» ульнесть покш сюпавчикс, ды, кода уш меринек, путовиль каявкс кода соксевиця модатьннеь, «локсеень кундсема таркатьнень» ды «миянь гонтэнь» лангскак.
XVII пингестэ, зярдо Карго Масторонть, кода эрзятьне мерсть эсест тиринь ёнксонтень, саизе эстензэ Московиясь, олясто эрямось прядовсь. Ушодсть керямо кезерень виртнень – тейсть поташ ды мисть омбо масторов, сюпалгавтсть апештявикс казнанть. Инязорось явшесь модатьнень эсь малавиксэнзэ туртов. Олясто эрямонтеньгак, борничествантеньгак сась пе. Сон кадовкшнось ансяк сеть таркатнестэ, косо педе пев эзть истожавкшно виртне. Мейле аламонь-аламонь тосояк ёмась.
Видичинзэ кисэ лецтясынек, неень Маордовиясо сехте меельце бортникенть – Кижапкин Дмитрий Васильевичень, Атюрьева ёнксонь мокшонть – XX пингень 80-це иетнестэ ульнесть 20 бортензэ. Сонзэ куломадо мейле бортничестваськак, паряк, допрок кулось-ёмась.

Сёрм:

Брыжинский М. Пингень гайть: Эссе. – Саранск: Мордовской книжной издательствась, 2004. – 224 с. – Мордов.-эрзя яз. ISBN 5–7595–1566–7 стр. 99