Майнов, Владимир Николаевич

Владимир Николаевич Ма́йнов (1845—1888) — рузонь тонавтыця, этнографось, финнэнь-угрань раськетнень содыця, географось.

Майнов, Владимир Николаевич
чачома чись	1845 эли ожоковонь 26 чи 1845(1845-10-26)
Чачома тарка	Ине-Петрань ош, Россиянь империясь
Кулома чись	даволковонь 23 чи 1888(1888-02-23) эли 1888
Кулома тарка	Ине-Петрань ош, Россиянь империясь
Важодема ёрокчизе	географ, этнограф, антрополог, сёрмадей, популяризатор науки, университетэнь тонавтыця, государственный служащий

Чачсь 1845 иестэ ожоковонь 26 чистэ (сундерьковонь 7 чистэ) Ине-Петрань ошсо дворянонь раськесэ. 1865 иестэ прядызе Александрань лемсэ тонавтнема тарканть. Теде мейле кунсолось лекцият историянь ды филологиянь факультетсэ Ине-Петрань ошонь университетсэ. Важодсь Ярмаконь Министерствасо, Тонавтнемань Министерствасо, артнесь экспедициява. Тонавтсь Гельсингфорскоень университетсэ (неень шкань Хельсинки ош Финнэнь масторсо), Ине-Петрань ошонь кадетэнь 2-це тонавтома таркасо. 1875 иестэ важодсь лиятнень марто «Рузонь Европань пельксэнь этнографиянь коряс карта» лангсо (русск. «Этнографическая карта Европейской России»). Рузонь географиянь вейсэндявксэнь (руз. Русское географическое общество (РГО)) ломань, этнографиянь ёндо секретаресь.

Истя жо содави В.Корниевский псевдоним ало. Сёрмадсь 40-де ламо историянь ды географиянь коряс научной сёрмадовкст. Калмазь Усманонь уездсэ Тамбовонь губерниясо, эсь раськень усадьбасо. Ламо сёрмадсь эрьва кодамо жанрасо: ардомашкань сёрмадовкст, содавикс ломань ланга сёрмадовкст, саемга Н.Н.Миклухо-Маклай ланга, Секе шкане ламо мель явсь правань коряс сёрмадозентень. Ульнесь «Живописная Россия» пусмонь редакторонь лездыцякс.

1871 иень ожоковсто кочказель Рузонь географиянь вейсэндявксэнь секретарекс этнографиянь ёндо. Те вейсэндявксэнь фондсо пурназель ламо кедьсэ сёрмадозь текстт. Сёрмадыцякс ульнесть картань теить, этнографт, попт. В.Н.Майнов ды Д.К.Зеленин путсть ламо вийть не сёрмадовкстнэ улевельть редактировазь. Теде мельга ульнесь нолдазь 4 томсо «Описание рукописей ученого архива ИРГО». Кедьсэ сёрмадозь фондось пек покшоль: ламо лиядсь апак нолда. Этнологиянь коряс В.Н.Майновонь содамочизэ пек покш.

1875 иестэ лиятнень марто кучозель Парижев, Французонь мастор, географонь конгрессэс. Конгрессэнтень В.Н.Майнов анокстась вадря этнографиянь коряс невтема, косо невтсь кода эрить Рузонь империясо эрьва кодамо раськень ломанть, те ульнесь этнической карта, конань анокстызе А.Ф.Риттих академикень комиссиясь. Те пек мельс тусь омбомасторонь содыдейтненень. Васенце раськеютконь форумсо мольсь кортамо Рузонь империянь этнической ёнкс ланга.

В.Н.Майнов сёрмадызе методиканть, конанть коряс эряви пурнамс раськень юридической койть-илат. Тенень сон явсь ламо мель, эрьва вадожемасо сёрмадсь теде. Истямо важодема мольсь аволь ансяк рузонь масторсо, лия масторсо пурнасть В.В.Богишич методикань коряс ды нолдасть важодемат сербэнь, немецень, французонь кельсэ. Тосо кортазель, кода эряви пурнамс славянонь раськетнень коест-иласт. В.Н.Майнов тонавтнизе В.В.Богишичень программанзо эрьва кодамо ёндо ды муинзе лавшо пельксэнзэ.

1875 иестэ В.Н.Майнов «Содамочи» (русск. «Знание») сёрмадовкспусмосо нолдызе «Юридической юрт» (руз. «Юридические корни») эсь программанзо. Тозонь совавтозельть 4 пелькст, косо ванновильть 435 кевкстемат правань коряс.

1877 иестэ В.Н.Майнов ёвтызе мелензэ Рузонь географиянь вейсэндявксэнтень молемс мокшотнень ды эрзятнень юткс тонавтнеме сынст антропологияст ды этнографияст. Вейсэндявксэсь нолдызе ды макссь ярмакт важодема лангс. 1877 иестэ «ИРГОнь кулят» (руз. «Известия ИРГО») пусмосо печатызь экспедициянь проектэнть.

Экспедияциясь ветязель Нижегородской, Самарской, Казанской, Тамбовской ды Пензенской буева. Туемадо икеле В.Н.Майнов тонавтнинзе мокшонь ды эрзянь кельтнень. Те пек лездась важодеманть топавтомсто. Кода сёрмадсь «Историянь кулялопань» (руз. «Исторический вестник») пусмонь С.Н.Шубинский редакторось: «содыдеесь пурнась ламо материалт мордовской раськенть антропологиянь коряс, этнографиянь ёндо, кемемадо, кельде, психологиядо ды натой юридической ёнксонь коряс. Сонсь В.Н.Майновось сёрмадсь, кода экспедициясь мельзэнзэ тусь, пурназель ламо эрявикс материалт». Вана кода теде сёрмады сонсь Владимир Николаевич: «пурназель истя ламо материалт, маштован хоть пелензэ ванномс ды путнемс таркава?».

1879 иестэ наукань, литературань ды политикань «Вал» пусмосо В.Н. Майнов нолдызе пурназь материалонь васенце пельксэнть. Рузонь лемесь ульнесь «Очерк юридического быта мордвы».Те ульнесь сехте сонзэ содавикс сёрмадовксось. Васенце пелькссэ содыдеесь сёрмадсь, кода мокшотне ды эрзятне саить нить-полат. кодат койтне нинь саемасто.

Те важодемасо улить истят пелькст: «Мокшэрязтнень прявт тешксэст ды полавтомат, кодат появить рузтнэнь ды татаронь марто маласо эрямсто», «Мокшэрзятнень родня марто эрямо лувост», «Нинь саема ды мирденень лисема», «Раське, кода эйкакшонь эсь ютксо прянь ветямо», «Уроз эйкакшонь мельга ваннома», «Сыретнень мельга ваннома», «Стякодо максома», «Валонь максома» ды седе тов (русск. «Основные признаки мордвы и те изменения, которые появляются ,живя рядом с русскими и татарами», «Родственные отношения мордвы», «Жениться и выходить замуж», «Семья, как совместный союз общения детей», «Присмотр за детьми-сиротами», «Присмотр за старыми людьми», «Щедрость», «Договоренность», т.д.)

Кода сёрмадсь Н.Ф.Мокшин — те васенце пурнавкс мокшэрзянь эрямодо, койтнеде. В.Н.Майнов сёрмадсь аволь ансяк мокшэрзятнеде, теде башка сёрмадрсь сетнеде, кить эрясть сынст перькава ды мезе мокшэрзятне сайсть пельдест. Истя жо пурнась валмеревкст. Эстедест пурназель ламо. Истя жо сёрмалесь, кода мерильть роднянень: «Мокшэрзянь раськетнесэ пек ламо лемть, конатнесэ лемдильть роднятнесэ, беряньстэ ваныть сень лангс, кие стувты, кода те эли тона роднясь лемдеви».

Кочксезь материалтнэ невтить, кода эрясть мокшэрзятне 19 пингестэ. В.Н.Майнов сёрмады кодат покш раськеть нейнесь мокшотнень ютксо: «Эрзятнень ютксо 7 ламо эйкакшт семиясо эзинь нее. Мокшотнень ютксо — малава 25 эйкакшт ды седе ламо. Иссассо невтнесть тень атя, конань родозо лисьнесь сокамо 21 сокасо; те раськесэнть ульнесть сон, низэ, ялаксэнзэ ды сынст цераст, церань цераст котынест ды сынст нист, весемезэ ульнесть 51 ломанть».

«Очерксэ» сёрмадыцясь яви мель сенень, кода мокшэрзятне кастыть ды тонавтыть эсь эйкакшост. «Мокшэрзятне трить-кастыть эсь эйкакшост истя, чтобу вечкильть эсь тетяст-аваст ды мель явсть сыретненень. Кие стувтынзе тетянзо-аванзо, сень сялдыть весе велесэ». В.Н.Майнов сёрмады: «Мокшэрзятне ваныть сень мельга, чтобу кудосо весе паро лувсо эрявольть. Азорось истя кирди тевсэ, што цёранзо 30 иес топодемас а каи тетянзо каршо вал, свал кунсолы».

Те важодемась ульнесь ютавтозь финнэнь кельс ды течеме чис ловови сехте вадря мокшэрзятнень ванномакс. Секень марто важодемась те шкас учи эсь тонавтнеманть-ванноманть.

Аламонь ютазь «Императоронь рузонь географиянь вейсэндявксось» (русск. «Императорское русское географическое общество») нолдынзе содыдеенть важодеманзо: «Эрзятнень антропологиянь коряс ванномат» (русск. «Результаты антропологических исследований среди мордвы-эрзи»).

«Финнэнь-угрань вейсэндявксэнь» ловномапусмось печатызе французонь кельс ютавтозенть В.Н.Майновонь сёрмадовксонзо - «Мокшэрзянь мифологиянь лиядкстнэ» (русс. «Остатки мордовской мифологии»). Теде башка В.Н.Майнов нолдась лияткак сёрмадовкст: «Куншка Рав чирень эрицятне», «Вейке чи мокшотнень ютксо», «Сёрмадовксось седе, кода ульнинь мокшэрзятнень ютксо», «Мезе неень шкане сёрмадыть мокшэрзятнеде литературасо» (русск. «Инородцы среднего Поволжья», «Один день среди мокшан», «Очерки о том, как я был среди мордвы», «Что сейчас пишут в литературе о мордве») ды лият.

Аволь весе В.Н.Майновонь сёрмадозентне ульнесть нолдазь. Апак нолда лиядсть «Мокшотнень антропологиянь ёндо ванномат», «Мокшэрзятнень эрямост рузтнэнь марто вастовома шкасто», «Мокшэрзятнень раськень психологиясь» (русск. «Антропологические исследования мордвы-мокши», «Очерк быта мордвы в момент встреч ее с русскими», «Народная психология мордвы»).

Неть сёрмадовкстнэде ёвтни С.Н.Шубинскоесь, «Историянь кулялопань» (русск. «Исторический вестник») редакторось.

Неень шкань содыдейтне ловить В.Н.Майновонь «Эрзятнень антропологиянь ёндо ванномась» сёрмадовкссонть таштамгадозь. Ансяк се шкане, зярдо сон ульнесь сёрмадозь, «Рузонь географиянь вейсэндявксось» казизе В.Н.Майновонть сырнень медальсэ. В.Н.Майнов сёрмадсь, што антропологиянь ёндо эрзятне ды терюхантнэ пек малавикст.

В.Н.Майнов явсь мель статистикань тевтненень: «Эрзятнень аволь пек ламо эйкакшост. Кевкстнезельть 26 ломанть, сынст ульнесь чачозь 165 эйкакшт, эрикс лиядсть 77, секс лиси куншкань - 5,89 эйкакшт. А эряви арсемс, што эрзятнеде кармасть аламо рузыявтомань коряс; рузыявтомань лангс апак вано, сынст чамань тюсост кадовсть эрзякс».

1889 иестэ «Финнэнь-угрань вейсэндявкс» ловномапусмось печатызе Майновонь «Мокшэрзянь мифологиянь лиядкстнэ». Се шкань самс В.Н.Майнов уж кулокшнось.

Н.Ф Мокшин эсь книгасо «Мордва лия масторсо ды омбомасторонь ломантнень вановтост» сёрмады Майновонь важодеманзо ланга. Сонзэ коряс, Майнов аволь пек видестэ сёрмады мокшэрзятнень кемемань коряс. Ялатеке этнографось тейсь покш тев: сон сёрмадсь ознома культонь ланга, явсь мель сенень, мезе рузтнэ сайсть мокшэрзятнень пельде. Сёрмадсь кереметнень ланга, явсь мель сенень, кода атятне вешнесть ознома таркат. Озноматне ютавтозельть зёлт вакссо эли вирь лисьмапря маласо, кияк илязо нее. Кода корты В.Н. Майнов, мокшэрзятне вешнесть истят таркат, косо кайсть тумот, пичеть ды килейть. Пек покш пежетекс аштесь истямо ознозь таркань кадомазо. Бути кодамо-бути тувталонь коряс таркась рудазыель, мокшэрзятне сеске мольсть урядамонзо.

Ламо этнографтнэ ловсть мокшэрзятнень идолонь озныцякс. Майнов В.Н. истя эзь лово. Сон сёрмадсь: «Мокшэрзятне зярдояк идолтнэнь эзть озно, сынь эсть озно кедьсэ теезь тевтненень. Сынь озныть сенень, мезе лиссь пертьпельксстэ». В.Н.Майновонь важодемасо пурназь ламо озномат, религиянь ды мифень коряс терминт ды седе тов. Те весе лезды историянь, келень ды фольклоронь содыдейтненень.

Сонзэ важодеманзо лисильть эрьва кодамо ловномапусмосо ды кулялопасо «Тарго» (русск. «Неделя»), «Кулят» (русск. «Новости»), «Содамочи» (русск. «Знание»), «Кезэрень ды од Рузонь мастор» (русск. «Древняя и Новая Русь»), «Киевень кезэрень шка» (русск. «Киевская старина»), «Од» (русск. «Новь») ды лия таркасояк. Сонзэ публицистиканзо учи ваннома течеме чис.

Сёрмадовксонзо

• Осударева дорога в Повенецком уезде Олонецкой губернии // Древняя и Новая Россия. 1876. Кн. 2
• Поездка в Обонежье и Корелу. — СПб., 1877
• Приоятская чудь. (Весь — Вепсы) // Древняя и Новая Россия. 1877, т. 2. № 5, с. 38—53; № 6, с. 133—143.
• Скопческий ересиарх Кондратий Селиванов (Ссылка его в Спасо-Евфимьев монастырь) // Исторический вестник. 1880, апрель, т. 1.
• Майнов В. Мёртвый городок (Из путевых заметок) Архивировазь 24 Эйзюрковонь 2016 иестэ. // Исторический вестник. 1880. Т. 3. С. 525—546.
• Майнов В. Живые покойники Архивировазь 2 Чадыковонь 2022 иестэ. // Исторический вестник. 1881. Т. 6. С. 747—772
• Вотчина Зосимы и Савватия (Соловки) // Живописная Россия. 1881. Вып. 1.
• Несторова Весь и Корельские дети. // Живописная Россия. 1881. Т I. Ч.2 стр. 493—527.
• Результаты антропологических исследований среди мордвы-эрзи / [соч.] д. чл. В. Н. Майнова. — С.-Петербург: Типография А. С. Суворина, 1883. -[2], IV, 559 с.; 23. — (Записки Русского географического общества по отделению этнографиипод ред. д. чл. В. Н. Майнова; Т. 11)
• Очерк юридического быта мордвы / [соч.] Владимира Майнова. — Санкт-Петербург: Типография Министерства внутренних дел, 1885. -X, 267, [3] с.; 24. — (Записки Императорского русского географического общества. По отделению этнографии; т. 14, вып. 1)
• Майнов В. Осударева дорога Архивировазь 2 Чадыковонь 2022 иестэ. // Олонецкий сборник: Материалы для истории, географии, статистики и этнографии Олонецкого края. Вып. 2. Петрозаводск, 1886. С. 25-34.

Литературась

• Григорьев С. В. Биографический словарь. Естествознание и техника в Карелии. — Петрозаводск, «Карелия», 1973—291 с.

Невтевкст

• Майнов, Владимир Николаевич // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
• Владимир Николаевич Майнов — публицист-этнограф, исследователь быта мордвы
• Майнов Владимир Николаевич Архивировазь 10 Сундерьковонь 2018 иестэ.