Люлякинань, Серафима Марковна
Люлякинань, Серафима Марковна (1922 иень медьковонь 29 чистэ Самарань ёнксонь Похвистневань буень Ягодное велесэ – 1993 иень якшамковонь 17 чистэ Похвистневань буень Ягодное велесэ) — эрзянь моронь ладсиця[1], сёрмадей[2].
| Люлякинань, Серафима Марковна | |
|---|---|
 | |
| чачома чись | медьковонь 29 чи 1922 |
| Чачома тарка | |
| Кулома чись | якшамковонь 17 чи 1993 (70 иеть) |
| Кулома тарка | |
| Мастор | |
| Важодема ёрокчизе | сёрмадей, рассказчик, седийсёрмадей |
.svg){kind=small}
Эстедензэ
витнемсЧачсь Самарань ёнкссонь Похвистневань буень Ягодное велесэ [3] эрзянь сокиця-видиця семиясо. Прядызе Подбельскоень ушодксонь тонавтнема тарканть, важодсь вельхозсо, кастась сисем эйкакшт. Тонавтнема шкасто уш морсесь художественной самодеятельностьсэ, варчнесь морамонь ёрокчинзэ буень, ёнксонь олимпиадатнесэ, ванмотнесэ. Сеедьстэ морсесь эсензэ морот. Морамо ды моронь складямо Серафима Люлякина ушодсть одпорасто. Сонзэ ванькс вайгелесь, моротнень гайтест, ладост пштистэ марямось редявсь весень ютксто, ды од тейтересь бойкасто, шождасто тонавтнинзе велень эрицятнень морост. Фольклоронь моротьнень Серафима бажась морамо эсь койсэ-лацо. Тенень сон васняяк тонадсь семиясонзо, косо веси пек вечксть раськень моротнень ды ёвкснень. Ялатеке сехте малавикс тонавтыцякс Серафима марковна ловсь эсинзе покшаванзо, Анисия Ефимовнань, кона эрясь сядо вете иеть, ды конань содылизь морамонь коряс Самарань губерниянть-ёнксонь келес. Нуцьканзо сон тонавть моронь складямо ды тиринь эрзянь келенть мазычинзэ марямо.
Зярыя иеть Серафима Марковна ульнесь Нижне-Ягодинской культурань кудонь прявтокс. Сонзэ моротнень сеедьстэ кунсолость аволь ансяк велень клубонь сцена лангсто, радиосто, теленевтемасояк. Сон кортась Куншкань литератортнэнь кудосо Московсо, ульнесь Эстониясо, Чехословакиясо, Финляндиясо.
С. М. Люлякина – Мордовской АССР-нь культурань заслуженной важодиця (1990 ие), МССР-нь Масторпрявтонь казнень лауреат (1992 ие), Мордовиянь Комсомолонь премиянь лауреат (1992).
1992 иестэ Серафимане Марковнанэ путыть орма «рак». 1993 иестэ, якшамковонь 17 чистэ сон туи тоначив. Калмазь тиринь велесэ Ягодное.
Числав Журавлёвонь валморозо кона ульнесь сёрмадозь Люлякинадо[4]:
Цёковонь вайгель
Серафима Марковна ЛЮЛЯКИНАНЕНЬ
Цёковонь вайгель. Перькан теле.
Тонь велькссэ аволь азор Шкась!
Штатолось ранги – солы штась.
Тон, Сима патяй, – вере-вере!
Тон тосат, косо эри Шкась!
Тонь валдо валот Моданть келес
Чивалдокс ламонь седейс прасть.
Сынь совасть морокс эрзянь велес;
Тонь превей валтнэ ломанть шнасть.
Ды оймень марязь эрзякс пеедсть;
Тонь валтнэ кандсть ды кандыть превть,
Сынь оймавтсть седейть, конат сэредсть,
Ды сыргавтсть ламо паро тевть.
Цёковонь вайгель. Перькан теле.
Штатолось ранги – солы штась…
Тон, Сима патяй, – вере-вере!
Шкинеманзо
витнемсВанмот
витнемсЛисьмапрят
витнемс- ↑ «Эрзянь Мастор», №257, САМАРА ЁНКСОНЬ СОДАВИКС ЭРЗЯТНЕ Архивировазь 13 Даволковонь 2019 иестэ.(эрз.)
- ↑ «Чилисема», №11, 2015 ТИРИНЬ КЕЛЕСЬ ДЫ ЛИТЕРАТУРАСЬ МОНЬ ЭРЯМОСО Архивировазь 14 Чадыковонь 2019 иестэ.(эрз.)
- ↑ Библиотека Мордовской литературы. Люлякина Серафима Марковна Архивировазь 28 Ожоковонь 2019 иестэ. (руз.)
- ↑ Каргонь вайгель Песональный сайт Числава Журавлёва: Цёковонь вайгель(эрз.)