Ку́лома озкс — кода ломанесь (сэредицясь) берянь — сы лангозонзо кулома шка, сестэ ацыть столь ланкс столешник, кирвастить штатол, кармить чекамо. Чекамсто озныть истя:

Kuoleman puutarha, Hugo Simberg (1906)

Паз чанготь, нолдыть Иванонь грехенхэ-пижетензэ,
Конататьнень Иван тейнинзе мастор лангсо эрямсто,
Касы сэрень касомсто, ды якамсто-пакамсто,
Ды удомсто-аштемстэ, ды тевтеме аштемстэ, берянь тевень теемстэ.
Покштят-бабат, кулыйть-емийть, весень кулый Оська,
Виде чисэ эрицят, видень-кичкерень содыцят,
Вере паз икеле шатицят, Вере Пазнэнь озныцят,
Улезе чанстенк, максодо паро, ознодо Вере паз икеле.
Паряк, Иванонь кулома шказо эзь са,
Паряк кулома шкадонзо икеле Иван сыргась куломо.
Улиндеряй истяня, илинк сайть Иванонь оймензэ,
Кадынк Иванонь эрьва чистэ эрямо,
Мастор ланга якамо, паро тевень тееме,
Ули-паронь пурнамо, вишка эйдень кастомо,
Сыре тетянь-авань калмамо.

Коли вансызь ломанесь карми куломо, путыть вальма лангс ведь (оймеведь), веденть трокс путыть чевне. Кода лиси оймесь прок се ведесэнть экшели, юты веденть трокс чевненть ланга ды туи Вере паз икелев. Кулыця ломаненть турванзо вадьсызь медьсэ (ойме лисема шкастонть кулыця ломаненть курго потмозо, мерить, пек сэпей).

Кода карми ломанесь куломо, чевте ацавкс алонзо а кадыть. Ацавкстнэнь-тодовкснень кулыцянть алдо сайчызь, кадсызь ломаненть куломо чаво эземс. Тодов кулыця ломанть алов а кадыть, пелить тона чисэ кармавтсызь кулыцянть толгатнень ловномо. Кулындеряй ломанесь апак фатя тодов лангс, калмамсто кулыцянть картнень-пракстатьнень марто, кулыцянть судрямо сурсеманть марто ды кандолаз лаксевкснэнь марто каить калмонь перька латконтень, колмо толгат тодовстонть, кона лангс кулось ломанесь. Толгатнень каямсто озныть истя:

Покштят-бабат, кулыйть-ёмийть, васень кулый Оська, виде чисэ эрицят,
Видень — кичкерень содыцят, Вере паз икеле аштицят,
Вере пазнэнь озныцят: улезэ чанстенк, максодо паро, ознодо Вере пащ икеле!
Вана минек Иван кулось тодов ланкс.
Вана минь кандынек се толгатнеде колмо толгат.
Илинк ловновт Иванонь кедьстэ весе толгатнень, ловновтынк ансяк не колмо толгатнень!

Экшелямо витнемс

Кода ломанесь кулы, кармить экшелямонзо. Экшелямсто кулыцянть чаманзо кирдить кенкш пелев. Кулыцянть прянзо пезсызь алсо (Вере паз икеле кулызянть эйстэ илязо качадо сапонь чине). Кулыцянть прянзо судрясызь берянь судремасо. Кулыцянть экшелямо чакшонть, экшелямо веденть, судрямо сурсеманть, кулыцянть карензэ-пракстанзо, кандолаз лаксевкстнэнь кулыцянть калмамсто кандсызь калмо лангс, каясызь калмонь перька латкс (эйстэст кулома илязо ульть).

Кода кулозенть экшелить, озныть истя:

Покштят-бабат, кулыйть-ёмийть,
Васень кулый Оська, виде чисэ эрицят,
Видень-кичкерень содыцят,
Вере паз икеле аштицят,
Вере пазэнь озныцят,
Ознодо Вере паз икеле,
Улезе чанстенк, максодо паро,
Илядо коря берянь экшелямонок.
А савтовиндеряй тенек, тынсь савтынк,
Тынсь минек чарьчис, превс путодо!

Оршамонзо витнемс

Кода экшелясызь ломаненть (кулыцянть), кармить оршамонзо-карсемензэ. Оршавтыть кулыцянть лангс понкст-панарт, понкстнэнь-панартнэнь ланга оршавтыть одрат, кулыцянть кирьгава каить крёст (эрзянь койтнень коряс а кайсильть!!!). Кулыцянть пильгс карсить карть. Кулыцянть пильгензэ карсесызь мей, карьксэнзэ ёкстасызь ушо пелев (эри-ашти ломаненть карьсэ карьксэнзэ ёкстазь потмо пелев).
Улиндеряй кулыцясь цёра, стыть прязонзо коцтонь чапка. Чапканть стасызь ве суресэ: ёкстыть салмуксоньтенть кувака суре, сатозо весе чапканть стамс ды стазысь чапканть сурень апак сезть. Одраткак стыть истя: салмуксс ёкстыть кувака суре, сатозо весе одратьнень сурень апак сезть. Одрат стыть виде суре лангс.
Улиндеряй кулозесь ава, пулонзо кодасызь мей (наотмаш), прязонзо путыть панго.
Улиндеряй кулыцясь сыре баба, пангонть ланга сюлмить кулозенть прява пряспаця.
Улиндеряй кулозесь од тейтерь, пулонзо кодасызь ладс (аволь мей), пулонзо пес путыть лента, конянзо перька тейнить цецинеть (панксонь, конёвонь).

Кулозенть алов эземс путыть тикшеть, тикшетнень вельтясызь нуласо. Путсызь кулозенть тикшетнень лангс, пильгензэ сюлмасызь ленгсэ (иляст келемть), кедензэяк мештензэ лангс сюлмасызь ленгсэ чувтовомазост. Сельмензэ кулозенть сюврясызь (иляст ульть тетькезь), улонзо алов путыть коцт пуворкс (илязо ульть кургось автезь). Кулозенть карксонзо алов путыть коцт паця (тона чисэ кедь пацякс). Кода кулозенть пурнасызь-сэрнясызь, путсызь тикшетнень лангс эзем пряс, теить озкс, озныть истя:

Паз чангодть, улезе чанстеть, макст паро:
Бути Иван совась грехс-пежетьс касы сэрень касомсто,
Мастор лангсо эрямсто ды якамсто-аштемстэ, паро тевень теемстэ
Ды тевтеме эрямсто, нолдыть, Вере паз, Покш паз,
Иванонь пежетензэ, макст Иваннэнь тона чисэ паро тарка!
Покштят-бабат, кулыйть-ёмийть, васень кулый Оська,
Виде чисэ эрицят, видень-кичкерень содыцят, Вере паз икеле аштицят,
Вере пазнэнь озныцят, улезэ чанстенк, максодо паро, ознодо Вере паз икеле.
Вана минек Иван кулось, илинк кадт ёмамо-арамо,
Саинк эстенк, максодо тензэ паро тарка!


Лоткить озномодо, сайсызь вальма лангсто оймеведенть, каясызь куляцянть экшелема ведентенть, а се веденть каясызь калмонь перька латкс. Мейле кармить лайшеме:

Тетянзо авась лайши истя:
Ох, тетякай-корьмакай,
Ох, тетякай-тирякай!
Тон пурныйнем-сэрнийнем!
Тетякай, седеймарийнем,
Кота карень кодыйнем,
Уське карьксэнь поныйнем,
Лембе чубань ставтыйнем,
Чевте суманьсэ оршийнем.
Тонь куломадо мейле
Кода карман, тетякай,
Мон эрямо-аштеме
Пишти пингень пиштеме!
Ки мелявтсы, тетякай,
Минек канды лангонок?
Ки кодасынзе, тетяй,
Минек кота каренек?
Ки понасынзэ, тетяй,
Минек уське карьксэнек?
Рунгонок коряс кие
Ставты паро орчамо?
Куш ули монь лялинем
— Тонь урозке цёрынеть —
Азды козонь сон кундамс:
Сонзэ ламо тевенэ,
Каня пакся работа
Икелевгак малявтомс
Каня кудонь тев теемс,
Каня пиреть — латктвитемс.
Каня велень промксс молемс
Велень тевень тееме,
Каня кармамс эсь перька
Улинь-паронь пурнамо.
Кудонь тевесь монь лелянь
Паро вийдензэ маштсы
Велень тевесь монь лелянь
Паро превдензэ маштсы.

Сёрм. витнемс

  • Mordwinische Volsdichtung VIII.Band, c. 182—192.