Кулдуркаев, Яков Яковлевич

Яков Кулдуркаев
Яков Кулдуркаев
чачома лем	Яков Яковлевич Кулдуркаев
чачома чись	ожоковонь 22 чи 1894
Чачома тарка	Ламбаське, Ардатовский уезд[d], Симбирская губерния[d], Россиянь империясь;
Кулома чись	медьковонь 28 чи 1966 (71 ие)
Кулома тарка	Ламбаське, Отяжеле велесь, Мордовиянь Автономной Советэнь Социалистической Республикась[d], Российянь Советэнь Федеративной Социалистической Республикась[d], Советэнь Вейсэндявкс[d];
Мастор	Россиянь империясь; Советэнь Вейсэндявкс[d];
Важодема ёрокчизе	валморозей

Яков Яковлевич Кулдуркаев (1894 ожоковонь 22 чи Ламбаське — 1966 медьковонь 28 чи Ламбаське) — эрзянь кельсэ сёрмадей ды валморонь ладсий.

Эрямозо

Чачсь, Яков Яковлевич 1894 иень ожоковонь 22 чистэ Симбирской губерниянь Ардатовской уездэнь Ламбаське (Лобаски)^[1] велесэ (Мордовиянь республикань неень Отяжбуеcэ). 1903—1906 иетнестэ сон тонавтнесь эсь велень начальной школасо. Мейле прядызе Саранской реальной училищанть (1912 ие). Зярдо эрзятне вешнесть «паро эрямо», зярыя эсь велень ломатнень марто Яков Кулдуркаев туи Сибирев, кавто иеть важоди тосо табельщикекс Амурской чугункань кинть лангсо. 1915 иестэ саизь армияв, косо стакасто ранязель. Пичкамодо мейле сон служась Якстере Армиясо. 1920 иестэ велявтсь чачома велев, стака контузиятнеде кувать сэредсть. Яковонь ульнесь покш бажамозо тонавтнемс, ды те мелесь курок топавтовсы 1923 иестэ сонзэ примизь Московсо счетоводонь курсас, конатнень прядомадо мейле кадсызь важдеме прявтошсо. Судямонзо икеле важодсь прявт бухгалтерэнь лездыцякс Ростокинской ватань теема таркасо (неень шкань ВДНХань маласо, Московсо).

Ламбаськесэ пек вечкилизь эрзянь евкстнэнь ды моротнень. Вечкилизь сынст Кулдуркаевень семиясояк. Уш вишка пингстэ Яша содась ламо евкст ды морот. Курок сонськак кармась моронь складямо. Васенце морозо тешкстазь 1910 иесэ. Творчествань тевензэ покш киява тусть, ансяк зярдо понгсь Московов ды сонзэ талантонтень фатясть тосо эриця эрзянь сёрмадейтне П.С. Глухов, Фёдор Чесноков ды Артур Моро. Сынст мельтнень коряс од валморсёрмадеесь кармась важодеме эпической покш произведения лангсо. 1928 иестэ «Якстере теште» кулялопань ожоковонь колмо номертнэсэ лиссть «Эрьмезь ды Котова» сонзэ поэмасто саевкстнэ.

«Эрьмезь» поэмась (авторось лемдизе кезэрень эрямодо ёвксокс) башка книгасо нолдазель ульнесь 1935 иестэ ды сон те шкас эзизе емавто художественной питнейчинзэ. Эрзянь литературасо «Эрьмезенть» кондямо мазый, сюпав, домка сёрмадовкс арась. Сонзэ эйсэ весе вийсэ гайгезевсь эрзянь келесь, конань мазычизэ пурьгине чирькень тюссо цитни эрьва валсто. «Эрьмезенть» ловномсто маряви, теке симат вирень лисьмапрясто: а ёвтавикс танстесь копордавксонь копордавкс валови эзгат, тон яла симат ды кодаяк а пештеват!

А. М. Моро вана мезэ ёвтась^[2]:

(эрз. 30-це иетнестэ ульнесь сёрмадозь гениальной «Эрьмезь» морокерьксэсь, конань эрявиксэсь ды питнезэ эрзянь раськеньте путови «Словом о полку Игореве» рузонь раськеньте...

Оригинальной текст (руз.)

«В тридцатые годы была создана гениальная поэма Я. Я. Кулдуркаева «Эрьмезь», которую по значимости для эрзянского народа можно сравнить только со «Словом о полку Игореве» для русского народа. Эта поэма стала сияющей вершиной мордовской поэзии и всей литературы и служит большим вкладом в сокровищницу мировой поэзии…»

Артур Моро «Яни Кулдуркаевнень» валморосонть «Эрьмезень» сёрмадыцянть невтизе покштояк покш эрзянь валморозеекс. Ды уш сестэ весе арсесть: минек поэзияс лиссь валдо, покш теште. Видеяк, лисекшнэсь алкуксонь теште, — ансяк сельмень сявадыцятне, раужо ойме ломантне путсть ламо вийть сонзэ мадстемга. Сынь сёрмалесть авторонть лангс эрьва кодат кенгелемат, ловизь «Эрьмезенть» националистической произведениякс. Неть сёрматнень-кенгелематнень коряс 1938 иень таштамковсто МВД-нь «башка совещаниясь» Я.Я.Кулдыркаевень пекставтызе тюрьмас. Тюрьматнесэ, лагертнесэ сонзэ пек чавсть — истя кармавсть лавгамо, кенгелеме эсензэ ды сонзэ ялганзо лангс. Тень кувалма шумбрачизэ пек беряньгадсь, памятеззяк лавшомгадокшнось.

Кода мейле карминек содамо, «Эрьмезень» авторось кирдевсь Коми АССР-нь, седе мейле Новгородской, Джамбульской областень лагертнесэ. Малавиксэнзэ туртов кучнось тосто зярыя сёрмат. Ёвтнесь — эри пек беряньстэ, ярсамс а мезде, энялдсь лездамс. Мик лагерьсэяк Я.Я.Кулдыркаев мукшнось шка сёрмадомсь. Роднянзо-малавиксэнзэ туртов сон сёрмасо кучнось литературной произведеният, энялдсь печатавтомс эрзянь изданиятнесэ. Нама, те киненьгак эзь тееве.

Олякстомась пачкодсь тензэ ансяк 1958 иень ацамковсто^[3]. Комсь иень ютазь эрзянь валморозееньтень ёвтасть: сон, келя, лагерьсэ аштесь чумовтомо. Зярдо Я.Я.Кулдыркаевень нолдызь лагерьстэ – лиссь истя, кадовсь ськамонзо… Яков Яковлевич сась Ламбаськев. Сонзэ нолдызе эсензэ кудос Михаил Горев атясь, кона эрясь ськамонзо.

Содатано сёрмань кучомодонзо С.Николаевнень — Мордовской АССР-нь Верховной Советэнь Президиумонь се шкань прявтонтень — веледе од произведениянь сёрмадома ды чачома таркасо эрямодо мельдензэ. Теке сёрмасонть сон вешсь лезкс тензэ кудонь путомасо. Кудось тензэ эзь стявтово сэредеманзо кувалма. Алкукскак, сестэ сон сэредсь истя пек, натой превензэяк човоргалильть. Меельце эрямо иезэ ютась пек стакасто, васоло роднятнень кудова яксезь. Ламо шка Я. Я. Кулдуркаевютавтсь пенсиянь хлопочамонтень. Козловской райсобесэсь яла вешсь пельдензэ справкат, зярдо ды кодамо лагерьсэ роботась. Арази сеть иетнестэ муевильть истят документт?!

«Эрьмезде» башка Яков Кулдыркаевень лиссь поэмазо «Андямо», эйкакштнэнень ёвксонзо «Якстере цеця»ды «Ёжов сенксь» (лись «Сяткосо» [1994 ие]]стэ).

Кулось 1966 иесте медьковонь 28 чистэ, калмазь Ламбаськесэ^[3].

Репрессировазь сёрмадейтнеде кармасть кортамо аволь пек умок. Седе икеле сындест содасть ансяк ученойтне, литературоведтнэ ды писательтне. Ней, кода кортыть, «вармась полавтызе ёнксонзо». Я.Я. Кулдуркаевень сёрмадовксонзо совавтызь тонавтнемань программас, «Масторава» вейсэндявксось тешкстызе волморозеенть чачома чинзэ. Вейксэнгеменце иетнестэ Саранскойстэ Ламбаськев сакшность ламо ннжеть. Ютксост ульнесть культурань министрась Ю.Ф. Юшкин, «Масторава» вейсэндявксонть прявтось Н.И. Чиняев, ученойть, сёрмадейть. Сынь Я.Я. Кулдуркаевень калмонзо лангс путсть од крест, каштазт.

Мейле ютавтозель покш промкс, кона алтазель поэтэнть Яков Яковлевич Кулдуркаевень лемс. 2014-це иень ожоковонь 22 чистэ сонензэ топодсть 120 иеть.

2008 иестэ ульнесь нолдазь «Поэмат ды ёвкст» пурнавксозо.

Шкинеманзо

«Эрьмезь» поэмась (авторось лемдизе кезэрень эрямодо ёвксокс) башка пусмосо нолдазель 1935 иестэ.

Ванмо

«Я. Я. Кулдыркаевень эрямонь ды шкинемань кизэ» 121 иеть чачома чистэнзэ (ванмо)

Лисьм.:

↑ «Национальная библиотека им. А.С. Пушкина Республики Мордовия»|«Эрьмезень» сёрмадыцянтень сюконямо: к 120-летию со дня рождения Я. Я. Кулдуркаева Архивировазь 11 Умарьковонь 2020 иестэ.(руз.)
↑ Выступление на VIII съезде писателей Мордовии. 23 апреля 1971
↑ ^3,0 ^3,1 Библиотека Мордовской литературы. Кулдуркаев Яков Яковлевич Архивировазь 8 Эйзюрковонь 2018 иестэ. (руз.)

https://ru.openlist.wiki/%D0%9A%D1%83%D0%BB%D0%B4%D1%8B%D1%80%D0%BA%D0%B0%D0%B5%D0%B2_%D0%AF%D0%BA%D0%BE%D0%B2_%D0%AF%D0%BA%D0%BE%D0%B2%D0%BB%D0%B5%D0%B2%D0%B8%D1%87_(1894)

[Национальная_библиотека-1] «Национальная библиотека им. А.С. Пушкина Республики Мордовия»|«Эрьмезень» сёрмадыцянтень сюконямо: к 120-летию со дня рождения Я. Я. Кулдуркаева Архивировазь 11 Умарьковонь 2020 иестэ.(руз.)

[VIII_съезд-2] Выступление на VIII съезде писателей Мордовии. 23 апреля 1971

[Библиотека_Кулдуркаев-3] 3,0 ^3,1 Библиотека Мордовской литературы. Кулдуркаев Яков Яковлевич Архивировазь 8 Эйзюрковонь 2018 иестэ. (руз.)

[1]

[2]

[3]