Ерёмина, Мария Петровна
Ерёмина Мария Петровна – эрзянь валморонь сёрмадый.
| Ерёмина, Мария Петровна | |
|---|---|
 | |
| чачома чись | ацамковонь 22 чи 1983 (40 иеть) |
| Чачома тарка | |
| Мастор |
|
| Важодема ёрокчизе | валморозей, ютавтыця, редакторсь |
Эрямо пингезэ
витнемсЧачсь 1983-це иень ацамковонь 22-це чистэ Мордовия Республикань Орданбуе ёнксонь Кеченьбие (Жабино) велесэ. Средней школань прядомадо мейле тонавтнесь Н.П.Огарёв лемсэ эрзямокшонь госуниверситетэнь филологиянь факультетэнь журналистика отделениясо. Тонавтнема шкасто уш невтизе прянзо кода ёроков сёрмадыця. А стяко тонавтнемадо мейле саизь важодеме «Сятко» журналсо публицистикань отделэнь редакторокс. Ней важоди те журналсонть ответственной секретарекс. Журналистэнь ды редакторонь тевенть марто вейсэ а кадны сёрмадомантькак. Меельце шкастонть покш мель яви эйкакштнэнь туртов сёрмадовкстнэнень.
Шкинемазо
витнемсСёрмадомо ушодсь 11 иесэ. Школасо тонавтнемстэ те тевсэнть тензэ ламо лездась Н.И. Аржаев тонавтыцязо. Николай Иванович сеске редизе тейтерькасонть сёрмадомань сяткиненть. Шнась васень изнявксонзо, невтсь асатыксэнзэ лангс. Мария варчнесь виензэ эрзянь ды рузонь кельсэяк, седе удалакшность эрзянь кельсэ произведениятне. Васенце стихотворениязо лиссь «Чилисемасо». Мейле стихотворениянзо, лирической миниатюранзо сеедьстэ кармасть максневеме «Сятко», «Чилисема» журналтнэсэ, лиссть «Финноугория» журналсо. Сёрмадовксонзо совасть «Монь вайгелем» (2005), «Эскелькс» (2008), «Эрзянь валске» (2011), «Ступени» (2012), «Тешкс» (2014), «Современная литература народов России: Поэзия / Антология» (2017) вейсэнь пусмотнес. Зярыя стихотворениянзо ютавтозельть мокшонь, рузонь, эстононь кельс. Лиссть кавто книганзо: «Ёвтаса тонеть» (2007) ды «Валдо» (2008). Омбоцесь нолдазель Таллин ошсо ниле кельсэ: эрзянь, рузонь, эстононь, англань. Кода видьксты сонсь М. Ерёмина, сёрмадомасо касомань кеме эскелькстнэнь тееме лездасть тензэ Мордовия Республикань сёрмадеень вейсэндявксонть ушодксонзо коряс ютавтневиця од литераторонь семинартнэ, эсензэ кондямо од сёрмадыця марто шкинемань пелькстамось, эрзянь виев поэттнэнь ды прозаиктнень пельде тонавтнемась. Мария свал вешнемань килангсо. Ней уш сонськак кой-кинь тонавты, витни-петни лия авторонь произведеният. Ульнесь зярыя авторонь книгань редакторокс.
Мель яви лия кельстэ ютавтомантеньгак. Ловныцятнень мельс тусть рузонь, финнэнь-угрань кельстэ ютавтозь стихензэ.
Казнензэ
витнемсМ.П. Ерёмина – И.П. Кривошеев лемсэ (2006) ды Мордовия Республикань Прявтонь (2008) литературной премиятнень лауреат.
Россиянь писателень союзонь член (2014).
Литературась
витнемс- Писатели Мордовии : библиографический справочник : в 2 т. Е. 2. Л – Я / сост. : А. И. Брыжинский, Л. П. Бойнова, Е. И. Чернов. – Саранск : Мордовское книжное издательство, 2015. – 544 с. ISBN 978 – 5 – 7595 – 1938 – 6 (т. 2)
- «Чилисема», 2016, №3, С.16