Глаголонть наклонениянзо

Кармавтомань наклонениясь

Сонзэ суффиксэнзэ истят:

Лиця	Объектт ды суффикст
Лиця	монь	минек	сонзэ	сынст
тон	-мак	-мизь	-к	-ть
тынь	-мизь	-мизь	-нк	-нк

Монь, минек кужонь форматне теевить инфинитивенть гласной лувстонзо:

тон монь тонавто-мак тон минек пурна-мизь тынь монь/минек ливте-мизь	(тонавто-мс) (пурна-мс) (ливте-мс)

Сонзэ, сынст кужонь форматне теевить инфинитивенть согласной лувстонзо. Лувось ды объектэнь невтиця суффикстнэ сюлмавить вейкест-вейкест марто и/ы гласной гайттнесэ:

тон сонзэ кепед-и-к (кепед-емс) тон сынст кород-ы-ть (кород-омс) тынь сонзэ/сынст каван-и-нк (каван-ямс)

Глаголонь полавтнемань невтевкс: оршамс, карсемс, тавадомс.

Лиця	Вейкень числа	Ламонь числа
	Монь кужось
2-це	орша-мак карсе-мак тавадо-мак	орша-мизь карсе-мизь тавадо-мизь
	Минек кужось
2-це	орша-мизь карсе-мизь тавадо-мизь	орша-мизь карсе-мизь тавадо-мизь
	Сонзэ кужось
2-це	орши-к карси-к тавады-к	орши-нк карси-нк тавады-нк
	Сынст кужось
2-це	орши-ть карси-ть тавады-ть	орши-нк карси-нк тавады-нк

Кармавтомань наклонениясо глаголтнэнь арасьчинь формаст

Сынь теевить иля арасьчинь глаголонть вельде, кона саи кармавтомань наклонениянь объектэнь невтиця суффикст ды ары прявт глаголонть гласной лувонзо икелев. Тень пингстэ прявт глаголонть кармавтомань форматнестэ лицянь-числань суффикстнэ керявить.

Иля глаголонть меельце гайтензэ таркас тынь сонзэ, тон/тынь сынст кужотнесэ путови и гласноесь.

Глаголонь полавтнемань невтевкс: пувта (пувта-мс), стувто (стувто-мс), эшке (эшке-мс).

Лиця	Вейкень числа	Ламонь числа
	Монь кужось
2-це	илямак пувта илямак стувто илямак эшке	илямизь пувта илямизь стувто илямизь эшке
	Минек кужось
2-це	илямизь пувта илямизь стувто илямизь эшке	илямизь пувта илямизь стувто илямизь эшке
	Сонзэ кужось
2-це	иляк пувта иляк стувто иляк эшке	илинк пувта илинк стувто илинк эшке
	Сынст кужось
2-це	илить пувта илить стувто илить эшке	илинк пувта илинк стувто илинк эшке

Кармавтомань суффикстнэнь ды форматнень улить истят башка тешксэст.

1. Кавто суффикст теить формат-омонимть: -мизь суффиксэсь ливти колмо истят формат, -нк суффиксэсь – кавто:

-мизь	-нк
тон минек сае-мизь тынь монь -//- тынь минек -//-	тынь сонзэ саи-нк тынь сынст -//-

2. Васенце лицясь (кортыцясь) кармавты омбоце лицянть/лицятнень тевень топавтомо. Тевесь кандовкшны: а) васенце лицянтень/лицятненень (тон монь ильтямак, тон/тынь минек ильтямизь), б) колмоце лицянтень/лицятненень (тон сонзэ ильтик, тон/тынь сынст ильтинк).

3. Тевтеемась пачтявкшны омбоце лицянтень/лицятненень, ансяк тень пингстэ глаголось саеви колмоце лицянь формасо ды мартонзо седе сеедьстэ тевс нолдавить эсь прят, эсенк прянк валонь сюлмавкстнэ: тон эсь прят оршик-карсик, тынь эсь прянк андынк-симдинк.

Валрисьмесэ невтевкст: 1. Прядык школат ды врачокс тонавтнеме мольть, цёрынем. Кунсоломак, левкскем… (Ч. Журавлёв). 2. Китне керявксокс Монень марявить. Яла энялдан: «Ломанть, жалямизь, Толсо, бензинсэ Мекс монь валымизь?» (Ч. Журавлёв). 3. «Учомак … нейке оршнян», – мерсь цёрась, зярдо Лиза уш панжизе кенкшенть (А. Брыжинский). 4. Зярдо эйкакштне кармасть туеме, пшкадсь (атясь): «Илямизь стувтне, сакшнодо…» (Т. Разгуляева).

Побудительной наклонениясь

Побудительной наклонениянть объектэнь невтиця форматнестэ неень шкань кельсэнть седе сеедьстэ вастовить сеть, конатнень тевтеицяст сон, сынь, объектэст тонь, тынк местоимениятне. (Неть форматненень явови мель те важодемасонть.)

Сынь теевить ало максозь суффикстнэнь вельде.

Лицят	Объектт ды суффикс
	тонь	тынк
сон	-нзат	-с-тадызь
сынь	-с-тадызь	-с-тадызь

Теемань лувокс саеви инфинитивенть гласной валлувозо.

Глаголонь полавтнемань невтевкс: тря-мс, сае-мс, яво-мс.

Лиця	Вейкень числа	Ламонь числа
	Тонь кужось
3-це	тря-нзат сае-нзат яво-нзат		тря-с-тадызь сае-с-тадызь яво-с-тадызь
	Тынк кужось
3-це	тря-с-тадызь сае-с-тадызь яво-с-тадызь		тря-с-тадызь сае-с-тадызь яво-с-тадызь

Кода неяви, -нзат суффиксэсь теи форма, кона кандови вейке тевтеицяс ды вейке объектс: сон тонь; -стадызь суффиксэнь сюлмавксось ливти колмо формат-омонимть, конатне саевить кавто тевтеиця ды кавто объект марто: сон тынк, сынь тынк, сынь тонь.

Побудительной наклонениясо глаголтнэнь арасьчинь формаст

Неть форматне теевить иля арасьчинь глаголонть тевс нолдазь. Сон саи побудительной наклонениянь объектэнь невтиця суффикст ды ары прявт глаголонть гласной лувонзо икелев. Тень пингстэ прявт глаголонть формастонзо объектэнь-лицянь-числань суффикстнэ керявить.

Глаголонь полавтнемань невтевкс:

Лиця	Вейкень числа	Ламонь числа
	Тонь кужось
3-це	илянзат тря -//- сае -//- яво		илястадызь тря -//- сае -//- яво
	Тынк кужось
3-це	илястадызь тря -//- сае -//- яво		илястадызь тря -//- сае -//- яво

Побудительной наклонениянь форматне муевить кемекставозь валсюлмавкссо: стака морось саензат, апаро морось саензат, мор саензат, прах/прахось саензат. Таргась (фокусникесь) газета, васоньпеельть, ярмаконть тапардызе газетанть потс, кармась керсемензэ. «Э-э, кыш саензат, минь истя эзинек ладя!» – киштезевсь натой таркасонзо Эмель (А. Доронин).

Сослагательной наклонениясь

Сонзэ форманзо теевить истя: объекттэме сослагательной наклонениясо валлувонтень (пидевл’-) поладовить объектэнь – ютазь шкань панжиця суффикстнэ, икелест путови и гласноесь (пидевл-и-зе).

Глаголонь полавтнемань невтевкс: ветямс, кастомс.

Лиця	Вейкень числа	Ламонь числа
	Монь кужось
1-це	–	–
2-це	ветявл-и-мик кастовл-и-мик	ветявл-и-мизь кастовл-и-мизь
3-це	ветявл-и-мим кастовл-и-мим	ветявл-и-мизь кастовл-и-мизь
	Тонь кужось
1-це	ветявл-и-тинь кастовл-и-тинь	ветявл-и-дизь кастовл-и-дизь
2-це	–	–
3-це	ветявл-и-нзить кастовл-и-нзить	ветявл-и-дизь кастовл-и-дизь
	Сонзэ кужось
1-це	ветявл-и-я кастовл-и-я	ветявл-и-нек кастовл-и-нек
2-це	ветявл-и-к кастовл-и-к	ветявл-и-нк кастовл-и-нк
3-це	ветявл-и-зе кастовл-и-зе	ветявл-и-зь кастовл-и-зь
	Минек кужось
1-це	–	–
2-це	ветявл-и-мизь кастовл-и-мизь	ветявл-и-мизь кастовл-и-мизь
3-це	ветявл-и-мизь кастовл-и-мизь	ветявл-и-мизь кастовл-и-мизь
	Тынк кужось
1-це	ветявл-и-дизь кастовл-и-дизь	ветявл-и-дизь кастовл-и-дизь
2-це	–	–
3-це	ветявл-и-дизь кастовл-и-дизь	ветявл-и-дизь кастовл-и-дизь
	Сынст кужось
1-це	Ветявл-и-нь кастовл-и-нь	ветявл-и-нек кастовл-и-нек
2-це	ветявл-и-ть кастовл-и-ть	ветявл-и-нк кастовл-и-нк
3-це	ветявл-и-нзе кастовл-и-нзе	ветявл-и-зь кастовл-и-зь

Сослагательной наклонениясо глаголтнэнь арасьчинь формаст

Сынь теевить кавто ладсо:

а) а арасьчинь частицанть вельде, кона апак полавтово ары сослагательной форманть икелев. Невтемга:

а ветявлимик а ветявлимим а ветявлитинь	а кастовлия а кастовлинзить а кастовлик	а учовлизе а учовлимизь а учовлидизь

б) аволь арасьчинь валонть вельде, кона саи сослагательной наклонениясо объектэнь невтиця суффикст ды ары прявт глаголонть гласной лувонзо икелев. Тень пингстэ прявт глаголонть форматнестэ объектэнь невтиця суффикстнэ керявить.

Глаголонь полавтнемань невтевкс: ветя-мс, касто-мс, кузте-мс.

Лиця	Вейкень числа	Ламонь числа
	Монь кужось
1-це	–	–
2-це	аволимик ветя -//- касто -//- кузте	аволимизь ветя -//- касто -//- кузте
3-це	аволимим ветя -//- касто -//- кузте	-//- ветя -//- касто -//- кузте
	Тонь кужось
1-це	аволитинь ветя -//- касто -//- кузте	аволидизь ветя -//- касто -//- кузте
2-це	–	–
3-це	аволинзить ветя -//- касто -//- кузте	-//- ветя -//- касто -//- кузте
	Сонзэ кужось
1-це	аволия ветя -//- касто -//- кузте	аволинек ветя -//- касто -//- кузте
2-це	аволик ветя -//- касто -//- кузте	аволинк ветя -//- касто -//- кузте
3-це	аволизе ветя -//- касто -//- кузте	аволизь ветя -//- касто -//- кузте
	Минек кужось
1-це	–	–
2-це	аволимизь ветя -//- касто -//- кузте	аволимизь ветя -//- касто -//- кузте
3-це	-//- ветя -//- касто -//- кузте	-//- ветя -//- касто -//- кузте
	Тынк кужось
1-це	аволидизь ветя -//- касто -//- кузте	аволидизь ветя -//- касто -//- кузте
2-це	–	–
3-це	-//- ветя -//- касто -//- кузте	-//- ветя -//- касто -//- кузте
	Сынст кужось
1-це	аволинь ветя -//- касто -//- кузте	аволинек ветя -//- касто -//- кузте
2-це	аволить ветя -//- касто -//- кузте	аволинк ветя -//- касто -//- кузте
3-це	аволинзе ветя -//- касто -//- кузте	аволизь ветя -//- касто -//- кузте

Сослагательной наклонениянь ды ютазь шкань изъявительной наклонениянь форматнень объектэнь невтиця суффиксэст вейкеть. Секскак се, мезе икеле ютазь шкадонть ёвтазель: а) суффикстнэнь смустест коряс кавто кужова явомась; ламо смустень ды омонимичной форматнень улемась; б) кортамонь ситуациянть ды сюлмавозь текстэнть смустень явомасо лезэст, – кандови сослагательной наклонениянтеньгак.

Валрисьмесэ невтевкст: 1. Мон а истя бу печтявлия Суранть, а истя бу вановлия Суранть мелензэ (Н. Эркай). 2. «Вирь» валонть марязь, мон энялдынь тетянень: «Тетяй, саемак мартот, виренть вановлия» (Т. Разгуляева). 3. Сонсь (бабинесь) сэрьс начко, нать, пиземе алов понгсь, ванат, зяро рудаз кандсь мельганзо, апаро морось саевлизе… (А. Доронин.) 4. Весе вечкицятнень ведрук вейкест-вейкест марто вейсэндявлинзеяк (Пазось), эрямось мазый тюсонзо ёмавтовлизе (А. Брыжинский). 5. Ды ведь иля стувтне (Витя): тон ней – оянок… Бути а молевлить мартонок, миньгак эсь ломанекс икелепелев аволидизь лово, явовольть кинек (А. Брыжинский). 6. «Сеске истя костявлинекак тикшенть ледемадонзо мейле, седе паро коромось улевель», – каясь вал…цыганонь кондямо раужо черь цёрась (А. Брыжинский).

Условной наклонениясь

Условной наклонениянть объектэнь невтиця суффиксэнзэ вейкеть изъявительной наклонениянь неень (сыця) шкань объектэнсетнень марто. Сынь поладовить формань теиця кавто лувс:

1) тонь, тынк, сонзэ, сынст объекттнэнь марто саеви объекттэме полавтнемань условной наклонениясо ламонь числасо лувось: ливтин-деря-, содын-деря-;

2) монь, минек объекттнэнь марто вере невтезь лувонтень поладови -са суффиксэсь: ливтин-деря-са-, содын-деря-са-.

Глаголонь полавтнемань невтевкс: ливтемс, содамс.

Лиця	Вейкень числа	Ламонь числа
	Монь кужось
1-це	–	–
2-це	ливтин-деряса-мак содын-деряса-мак	ливтин-деряса-мизь содын-деряса-мизь
3-це	ливтин-деряса-мам содын-деряса-мам	ливтин-деряса-мизь содын-деряса-мизь
	Тонь кужось
1-це	ливтин-деря-тан содын-деря-тан	ливтин-деря-тадызь содын-деря-тадызь
2-це	–	–
3-це	ливтин-деря-танзат содын-деря-танзат	ливтин-деря-тадызь содын-деря-тадызь
	Сонзэ кужось
1-це	ливтин-деря-са содын-деря-са	ливтин-деря-сынек содын-деря-сынек
2-це	ливтин-деря-сак содын-деря-сак	ливтин-деря-сынк содын-деря-сынк
3-це	ливтин-деря-сы содын-деря-сы	ливтин-деря-сызь содын-деря-сызь
	Минек кужось
1-це	–	–
2-це	ливтин-деряса-мизь содын-деряса-мизь	ливтин-деряса-мизь содын-деряса-мизь
3-це	ливтин-деряса-мизь содын-деряса-мизь	ливтин-деряса-мизь содын-деряса-мизь
	Тынк кужось
1-це	ливтин-деря-тадызь содын-деря-тадызь	ливтин-деря-тадызь содын-деря-тадызь
2-це	–	–
3-це	ливтин-деря-тадызь содын-деря-тадызь	ливтин-деря-тадызь содын-деря-тадызь
	Сынст кужось
1-це	ливтин-деря-сынь содын-деря-сынь	ливтин-деря-сынек содын-деря-сынек
2-це	ливтин-деря-сыть содын-деря-сыть	ливтин-деря-сынк содын-деря-сынк
3-це	ливтин-деря-сынзе содын-деря-сынзе	ливтин-деря-сызь содын-деря-сызь

Условной наклонениясо глаголтнэнь арасьчинь формаст

Сынь теевить а частицанть вельде, кона апак полавтово путови условной наклонениянь форманть икелев. Невтемга:

а шнындерясамак а шнындерятадызь	а шнындерясынь а шнындерясынк
а шнындерясамизь а шнындерясызь	а шнындерясынзе а шнындерясы

Истя теевить лия форматнеяк.

Условной наклонениянь ды неень (сыця) шкань изъявительной наклонениянь форматнень объектэнь панжиця суффиксэст вейкеть. Секскак се, мезе икеле ёвтазель неень (сыця) шкадонть: а) суффикстнэнь смустест коряс кавто кужова явомась; ламо смустень ды омонимичной форматнень улемась; б) кортамонь ситуациянть ды сюлмавозь текстэнть смустень явомасо лезэст, – кандови условной наклонениянтеньгак.

Валрисьмесэ невтевскт: 1. Кильдиндерятан (ававтось одирьванть) корневойкс, Чирьке велькска иля вант; Кильдиндерятан пристяжкас, Иля тарга кинь пелев (М. Евсевьев). 2. «Сестэ эно сыргак, сюпавчинь кастыця (Витя)… – пшкадсь тейтересь. – Ней уш арсян, кучат тень куля эсь тусто виртнестэ. Нама, а пориндерятанзат реве ладсо верьгиз директорось…» (А. Доронин.) 3. «Велев самом кувалма велявтсь эйстэнь (Петядо) вечкевиксэм»… – «Вечкиндерятанзат – сы. Московось, нать, пирявкс?» (А. Брыжинский.)

Условно-сослагательной наклонениясь

Те наклонениянть форманзо теевить истя: условной наклонениясо валлувонтень (саиндеря-) поладовить сослагательной наклонениянь -вл’- ды объектэнь-ютазь шкань невтиця суффикстнэ; меельцетнень икелев ары -и- сюлмиця гласноесь (саиндеря-вл-и-тинь).

Глаголонь полавтнемань невтевкс: ваномс, муемс.

Лиця	Вейкень числа	Ламонь числа
	Монь кужось
1-це	–	–
2-це	ванын-деря-вл-и-мик муин-деря-вл-и-мик	ванын-деря-вл-и-мизь муин-деря-вл-и-мизь
3-це	ванын-деря-вл-и-мим муин-деря-вл-и-мим	ванын-деря-вл-и-мизь муин-деря-вл-и-мизь
	Тонь кужось
1-це	ванын-деря-вл-и-тинь муин-деря-вл-и-тинь	ванын-деря-вл-и-дизь муин-деря-вл-и-дизь
2-це	–	–
3-це	ванын-деря-вл-и-нзить муин-деря-вл-и-нзить	ванын-деря-вл-и-дизь муин-деря-вл-и-дизь
	Сонзэ кужось
1-це	ванын-деря-вл-и-я муин-деря-вл-и-я	ванын-деря-вл-и-нек муин-деря-вл-и-нек
2-це	ванын-деря-вл-и-к муин-деря-вл-и-к	ванын-деря-вл-и-нк муин-деря-вл-и-нк
3-це	ванын-деря-вл-и-зе муин-деря-вл-и-зе	ванын-деря-вл-и-зь муин-деря-вл-и-зь
	Минек кужось
1-це	–	–
2-це	ванын-деря-вл-и-мизь муин-деря-вл-и-мизь	ванын-деря-вл-и-мизь муин-деря-вл-и-мизь
3-це	ванын-деря-вл-и-мизь муин-деря-вл-и-мизь	ванын-деря-вл-и-мизь муин-деря-вл-и-мизь
	Тынк кужось
1-це	ванын-деря-вл-и-дизь муин-деря-вл-и-дизь	ванын-деря-вл-и-дизь муин-деря-вл-и-дизь
2-це	–	–
3-це	ванын-деря-вл-и-дизь муин-деря-вл-и-дизь	ванын-деря-вл-и-дизь муин-деря-вл-и-дизь
	Сынст кужось
1-це	ванын-деря-вл-и-нь муин-деря-вл-и-нь	ванын-деря-вл-и-нек муин-деря-вл-и-нек
2-це	ванын-деря-вл-и-ть муин-деря-вл-и-ть	ванын-деря-вл-и-нк муин-деря-вл-и-нк
3-це	ванын-деря-вл-и-нзе муин-деря-вл-и-нзе	ванын-деря-вл-и-зь муин-деря-вл-и-зь

Условно-сослагательной наклонениясо глаголтнэнь арасьчинь формаст

Неть глаголтнэнь арасьчинь формаст теевить кавто ладсо: 1) а арасьчинь частицанть вельде; 2) аволь арасьчинь глаголонть тевс нолдазь.

1) А частицась апак полавтово ары условно-сослагательной форматнень икелев. Невтемга:

а кадындерявлимик а кадындерявлимим	а кадындерявлидизь а кадындерявлинь
а кадындерявлитинь а кадындерявлимизь	а кадындерявлинзе а кадындерявлизь

Истя теевить лия форматнеяк.

2) Аволь арасьчинь глаголось полавтневи ютазь шкань объектэнь невтиця суффикс марто ды путови прявт глаголонть икелев. Меельцесь саеви условной наклонениянь валлувонть формасо, объектэнь невтиця суффикстэме: кадындеря- (кадомс), сасындеря- (сасамс). Невтемга:

Лиця	Вейкень числа	Ламонь числа
	Монь кужось
1-це	–	–
2-це	аволимик кадындеря -//- ливтиндеря	аволимизь кадындеря -//- ливтиндеря
3-це	аволимим кадындеря -//- ливтиндеря	-//- кадындеря -//- ливтиндеря
	Тонь кужось
1-це	аволитинь кадындеря -//- ливтиндеря	аволидизь кадындеря -//- ливтиндеря
2-це	–	–
3-це	аволинзить кадындеря -//- ливтиндеря	-//- кадындеря -//- ливтиндеря
	Сонзэ кужось
1-це	аволия кадындеря -//- ливтиндеря	аволинек кадындеря -//- ливтиндеря
2-це	аволик кадындеря -//- ливтиндеря	аволинк кадындеря -//- ливтиндеря
3-це	аволизе кадындеря -//- ливтиндеря	аволизь кадындеря -//- ливтиндеря
	Минек кужось
1-це	–	–
2-це	аволимизь кадындеря -//- ливтиндеря	аволимизь кадындеря -//- ливтиндеря
3-це	-//- кадындеря -//- ливтиндеря	-//- кадындеря -//- ливтиндеря
	Тынк кужось
1-це	аволидизь кадындеря -//- ливтиндеря	аволидизь кадындеря -//- ливтиндеря
2-це	–	–
3-це	-//- кадындеря -//- ливтиндеря	-//- кадындеря -//- ливтиндеря
	Сынст кужось
1-це	аволинь кадындеря -//- ливтиндеря	аволинек кадындеря -//- ливтиндеря
2-це	аволить кадындеря -//- ливтиндеря	аволинк кадындеря -//- ливтиндеря
3-це	аволинзе кадындеря -//- ливтиндеря	аволизь кадындеря -//- ливтиндеря

Валрисьмесэ невтевкст: 1. Саиндерявлимик мартот, тевесь седе шождасто лисевель. 2. Валнындерявлинк пандятнень эрявикс шкасто, эмежтне седе вадрят улевельть. 3. А содындерявлизь ломаненть, мейс сынь молевельть тензэ? – Нать, содылизь.

Стакалгавтозь (сложной) валрисьмесэ малав свал условно-сослагательной форматнень марто вейсэ саевить сослагательной наклонениянь формасо лия глаголт.

Неень шкань эрзянь кельсэнть условно-сослагательной наклонениясо глаголтнэнь смустест сеедьстэ ёвтавить бути союзонть марто кандовиця (придаточной) валрисьмесэ. Невтемга: Вай, Саша, кодамо покш касыть, вастындерявлитинь ававтомот, аволитинь содаяк. – Вай, Саша, кодамо покш касыть, бути вастовлитинь ававтомот, аволитинь содаяк.

Условно-сослагательной наклонениянь ды ютазь шкань изъявительной наклонениянь форматнень объектэнь невтиця суффиксэст вейкеть. Секскак се, мезе икеле ёвтазель ютазь шкадонть: а) суффикстнэнь смустест коряс кавто кужова явомась; ламо смустень ды омонимичной форматнень улемась; б) кортамонь ситуациянть ды сюлмавозь текстэнть смустень явомасо лезэст, – кандови условно-сослагательной наклонениянтеньгак.

Бажамонь наклонениясь

Форманзо теевить истя:

1) саеви объекттэме полавтнемасо бажамонь наклонениясо лицянь-числань лувось: полавтыксэль-, кирдиксэль-;

2) вере невтезь лувонтень поладовить ютазь шкань объектэнь панжиця суффикстнэ; лувось ды суффикстнэ сюлмавить и гласной гайтенть вельде: полавтыксэл-и-мик, кирдиксэл-и-мик.

Глаголонь полавтнемань невтевкс: кардамс, неемс.

Лиця	Вейкень числа	Ламонь числа
	Монь кужось
1-це	–	–
2-це	кардыксэл-и-мик неиксэл-и-мик	кардыксэл-и-мизь неиксэл-и-мизь
3-це	кардыксэл-и-мим неиксэл-и-мим	кардыксэл-и-мизь неиксэл-и-мизь
	Тонь кужось
1-це	кардыксэл-и-тинь неиксэл-и-тинь	кардыксэл-и-дизь неиксэл-и-дизь
2-це	–	–
3-це	кардыксэл-и-нзить неиксэл-и-нзить	кардыксэл-и-дизь неиксэл-и-дизь
	Сонзэ кужось
1-це	кардыксэл-и-я неиксэл-и-я	кардыксэл-и-нек неиксэл-и-нек
2-це	кардыксэл-и-к неиксэл-и-к	кардыксэл-и-нк неиксэл-и-нк
3-це	кардыксэл-и-зе неиксэл-и-зе	кардыксэл-и-зь неиксэл-и-зь
	Минек кужось
1-це	–	–
2-це	кардыксэл-и-мизь неиксэл-и-мизь	кардыксэл-и-мизь неиксэл-и-мизь
3-це	кардыксэл-и-мизь неиксэл-и-мизь	кардыксэл-и-мизь неиксэл-и-мизь
	Тынк кужось
1-це	кардыксэл-и-дизь неиксэл-и-дизь	кардыксэл-и-дизь неиксэл-и-дизь
2-це	–	–
3-це	кардыксэл-и-дизь неиксэл-и-дизь	кардыксэл-и-дизь неиксэл-и-дизь
	Сынст кужось
1-це	кардыксэл-и-нь неиксэл-и-нь	кардыксэл-и-нек неиксэл-и-нек
2-це	кардыксэл-и-ть неиксэл-и-ть	кардыксэл-и-нк неиксэл-и-нк
3-це	кардыксэл-и-нзе неиксэл-и-нзе	кардыксэл-и-зь неиксэл-и-зь

Бажамонь наклонениясо глаголтнэнь арасьчинь формаст

Сынь теевить а арасьчинь частицанть вельде, кона апак полавтово путови бажамонь наклонениясо форматнень икелев. Невтемга:

а саиксэлимик	а ветиксэлимим
а саиксэлизе а саиксэлимизь а саиксэлить	а ветиксэлизь а ветиксэлинк а ветиксэлик

Истя теевить лия форматнеяк.

Бажамонь наклонениянь ды ютазь шкань изъявительной наклонениянь форматнень объектэнь невтиця суффиксэст вейкеть. Секскак се, мезе икеле ёвтазель ютазь шкадонть: а) суффикстнэнь смустест коряс кавто кужова явомась, ламо смустень ды омонимичной форматнень улемась; б) кортамонь ситуациянть ды сюлмавозь текстэнть смустень явомасо лезэст, – кандови бажамонь наклонениянтеньгак.

Валрисьмесэ невтевкст: 1. Кулясовнень ледстявсь эйкакшпоразо, зярдо муиксэлизь се тарканть, козонь нежеди пиземечирькесь (А. Брыжинский). 2. Минь ардынек валаня паксянть ланга ды сасыксэлинек зыянонь кандыцятнень (браконьертнэнь) (Ч. Журавлёв). 3. Исяк туемадот мейле Захар Данилыч совсесь, охотав саиксэлинзить (Трофимень) (А. Доронин).

Сёрм.

Мария ИМАЙКИНА, филологиянь наукань кандидат, доцент

Саезь: "СЯТКО", №8 (718), 2017