Алашань озкс
Алашань озкс — озкс конатась алтави лишметненень, сон ютавтови кизна, озимтнень видемадо мейле, умарьковонь 31-це чистэнть, ознома латкосо, коинзамонь кавто пекшэ, пиче чувто ало. Озксонть ютавтомадо чиде икеле, пурнави озкспалокс-аноксокс ярмак, сонзэ пурныть веленек. Не ярмактнень лангс рамави: медь, пурень теемга, аноксокс ракша: реве, бука, ды лия коинзамонь ярсамопельть.
Алашань озксось аволь эрьва иень, колмо иес ютавтови весть, ансяк сеть иетнестэ, знярдо лишметне сэредить, ютавтнить кавксть–колмоксть иезэнзэ. Те озксось цёра ломанень, секскак сонзэ ютавтомо сыть эрьва кудостонть колмо цёра ломанть: покштясь, цёразо ды веженьсь нуцькабаезэ.
Озатясь, озксонть ютавтомадо чиденть икеле, аравты озксонь ютавтомга лездыця, кудораське. Лездыцятне озкс ютавтома чиде икеле чокшнэстэнть, озксчувтотнень алов ускить-кандыть пенгт, соргавкст, чакшт, ды лия кедьёнкст, конатат эрявить озксонть ютавтомга. Валське ланга, эрьва кудазоравась пани лувкши, сонзэ верьгакссо пидезь сараз алт. Озксов молицятне саить таго лия озкспалт мартост те: рестазь алт, кашат ды сал, штатол. Озкспалтнэ аравтневить руця ланга рядцек-рядцек, эрьвась кирвазти Атянь штатолстонь лувкшинзэ лангс штатол. Колмо Озксветийтне-Озатятне, сыремтьсызь эрий толсо озкс толбандянть, ды печксызь аноксокс алтавт буканть, васня сонзэ ланга каить ведь, эжели букась соракады, те вадря тешкс верде, кирдийтнень мельс тусь аноксось, веренть нолдасызь анокскевенть алов, кевесь таркастонзо а токшеви, чувить ваксозонзо ундыне ды веренть нолдамодо мейле валясызь ашо човарсо. Буканть печкемемадо икеле прявт озатясь ёвты озолма.
Инешкипаз! Вере-Чипаз!
Тон, марицясь, кода тикше касы!
Тон, неицясь кода пеште панжи!
Неимизь, марямизь,
Сюконятяно пильгезеть,
Пшкадтяно валдо оймезеть.
Верев кепедьсынек кеденек,
Масторов нолдасынек сюкпрянок.
Ознотано эрицянок кис,
Ознотано раськенек кис,
Ознотано эйденек кис,
Паксясо видезенть кис,
Кардазсо ракшанок кис.
Инешкипаз!Макст тенек
Сэтьме лембе пиземеть,
Чачост-касост сюронок,
Касост-кепедевест тяканок,
Раштыцят, улест аванок,
Макст Масторонтень ладямо,
Вейкень-вейкеь вечкема,
Лисьмакс парот лисезэ,
Леекс эрьметь чудезе.
Кенкшпряваяк совазо,
Кеншалгаяк ютазо.
Минь Тонеть- Шумбракши!
Тон миненек – шумбрачи!
Ванстомизь, идемизь
Ятонь ломанде, ормадо-тармодо,
Апародо-зыяндо,
Даволдо-цярахмандо.
Вана пидинек ашо кеднесэ,
Вана панинек шожча мельнесэ,
Зяро кашасонть ямкстнеде,
Зняро макст эрьвантень ули паро.
Инешкипаз! Чангодть! Паз Чангодть! Паз Чангодть!
Теде мейле Озатятне евтасызь Покштятнень=Сэрдятнень ливамо Ине озолманть. Веси озныцятне таго евтыть мельгаст сонзе.
Инешкипаз! Вере Чипаз!
Чангодть! Паз Чангодть!
Эрзянь Покшт-Покштинеть,
Покштянь-Покшавинеть!
Сырк мерезе Покштинеть,
Матразь-оймазь киськиненк,
Раужо човаля модыненк.
Вана тердтядызь Озксов
Кши-салонок варчамо
Пурень-Брагань корштамо.
Ашо кедьсэ панинек
Шожча мельсэ пидинек.
Садо ваксозонок
Човоряводо юткозонок
Начтынк коське турвиненк,
Пештинк вачонь пекиненк,
Таньшкавтынк сэпей кургиненк.
Кинь лемезе кундави,
Кинь лемезе стувтови,
Илядо кежиявто,
Веси тынь-седейсэнек,
Веси тынь-минек верьсэ.
Минь тынк эйсэ лисинек,
Минь тыненк велявтано.
Садо, весе садо!
Илязт уле ве ендо ваныцят,
Иляст уле сельмень сявадыцят.
Пачкодезе, Молезе! Паз, Чангодть!
Паз, Чангодть! Паз, Чангодть!
Эрьвейке озныцясь эсь пачканзо, терди озксов покштятнень-покшаватнень ( евты ливи лемест)
Ушодови Алашатнень кисэ озолмась.
Я, Паз, чангодть! Верепаз трицянок-ваныцянок, Чангодть!
Неемизь-марямизь, ознотано икелеть,
Верев кепедьсынек кеденек, масторов нолдасынек сюкпрянок.
Марик озксонок, менель алга нолдык, мастор ланга сравтык,
Чаччост касост озименек, раштаст ракшанок.
Ки а машты озномо, энялдтано: сеньгак озксонзо саик,
Эрьвантень макст Шумбрачи ды икелев моли тевть.
Ракшанькирди – Ракшапаз! Кардонь кирди - Кардо–Сярко!
Максодо минек алашатнене седейнезест-седей вий,
Пильгинезест – пильге вий,
Знярдо сынь велева ардыть, стака сельмеде,
апаронь теийде ванынк-пиринк.
Нолдык пиже тикшинес, нолдынк ашо коромнес.
Эрзянь Покштят-Покштинень, покштянь-Покавинеть,
Матразь–оймазь кискинеть, тындяк уледе ванстыцякс,
Велень-сядонь алашатнень апаро, душман ломанде,
Салыйде, ормадо-тармодо пирицякс.
Кардо-Сярко, Кардонь кирди Азорава!
Анды-симди, ванны-пири, алашанок.
Иляст понго берянь сельмс,
Иляст понго салый кедьс,
Паз Чангодть! Инешкипаз, чангодть!
Веси сюконить ды эсь мельсэст евтыть сюкпрят Инешкипазонтень, ды сонзе аравт кирдийтне, Покштятнене-Сэрдятне, озксост марямга ды алашаст ванстомга–пирямга.
Озатятне колмоксть ютасызь Шумбракшитнень, кавто кедьсэ токасызь эрьватанть ды мерить:-«Паз,чангодть!». Колмоцеде ютамсто икелев молицясь саи кедезензе пеель чакш ды эрьва Шумбракшистенть кери кшипелькс, путсы чакшонтень, мейле те чакшось валяви анокскевенть вакс мода потс.
Веси озыть ушодыть озксямонть ды брагань ярсамо–варчамо, эрьватась каи аламнешка брага ды сюкони озксчувтонтень. Цератне ярсамсто ушодыть кезерень Пазморонь морамо. Чокшнень пелев састынькине озныцятне срадыть кудова. Саить Шумбракшинь палт ды кудосо макссызь алашатнене, ды путыть Кардо-Сярконтень.