Ульянов, Григорий Карпович

Григо́рий Ка́рпович Улья́нов (чачсь 1864 иень таштамковонь 25 чистэ — кулось 1943 иень якшамковонь 23 чистэ) — тонавтыця, эсер, эрзятнень просветитель, I тердемань Рузонь империянь Вийкирдиень Думань депутат Саратов губерниянь пельде. Эрзя .

Ульянов, Григорий Карпович
чачома чись	таштамковонь 25 чи 1864(1864-09-25)
Чачома тарка	Кулясово[d], Кузнецкий уезд[d], Саратовская губерния[d], Россиянь империясь
Кулома чись	якшамковонь 23 чи 1943(1943-01-23) (78 иеть)
Кулома тарка	Климовск[d], Московонь ёнкс, Российянь Советэнь Федеративной Социалистической Республикась[d], Советэнь Вейсэндявкс[d]
Мастор	Россиянь империясь  Советэнь Вейсэндявкс[d]
Важодема ёрокчизе	вийкирдий-ветий

Эрямопингезэ

Чачсь Саратов губерниянь Кузнецкой уездэнь Кулясово велень сокиця-видиця раськесэ (неень шкане — ЛопаПарцун:МР Пензенской области).

Эйкакшпингстэ ульнесь стадань ды эйкакшонь ваныцякс, секе шкане тонавтнесь Д.В,Желубовской тонавтыцянть кедьсэ. Прядсь Камешкирэнь земской школа. 1874 иестэ, сёкстня, М.В.Золотов - раськень тонавтнема таркатнень инспекторось - ускизе прявий ды весеменень мельявиця цёраэйкакшонть Кузнецк ошов, косо Григорий прядызе тонавтнеманзо.

В.М.Золотов анокстызе сонзэ Вольскоень тонавтыцянь семинарияс поступамос. 1885 иестэ семинариянь прядомадо мейле кармась важодеме Саратов губерниянь Наскафтым эрзянь ды мокшонь велесэ. 1889 иестэ раськень просвещениянь министрань мереманзо коряс Г.К.Ульяновонь важодемазо ульнесь кардазь политикань тувталонь кувалт (руз. «по политической неблагонадёжности»), а 1889 иень медьковсто саезь нельгезэль тонавтомань ды седе тов тонавтнемань правазо.

1890 иень таштамковсто саезь важодсь ваннома управлениясо Тамбов-Саратов ды Баскунчак чугункань кинь лангсо, косо пурнась политикань ды литературань ловномань куро.

1891 иестэ тусь эрямо Саратовав, косо макснесь кудова урокт, важодсь чугункань ки лангсо, кулялопатнесэ. 1901 иестэ саезь важодсь Саратов ошонь земской управань статистикекс. Кармась сёрмалеме публицистика. 1902 иестэ ульнесь арестовазь кавксть. Ульнесь вейке зярыя ломантнеде, конатне тейсть Раськень тонавтыцятненень лездамо вейсэндявкс, сонсь ульнесь тосо секретарекс. Саратов ошсо теевсь содавиксэкс Н. Е. Каронин-Петропавловский сёрмадыцянь марто ды В. Г. Богораз-Тан этнограф ды кельссодый марто. Пек ялгаксчизэ ульнесь М. А. Натансон (Бобров) марто, конась ульнесь Саратов ошсо ссылкасо. М. А. Натансон (Бобров) ульнесь вейке зярыя ютксо "Мода ды олячи" (руз.«Земли и воли») куронь теицякс.

1902 иестэ саезь ловови активной эсерэнь партиянь ломанекс. Лездась Весе Россиянь сокицянь-видицянь вейсэндяксонь (руз. Всероссийский крестьянский союз) тееманень ды секень марто Саратовань социалист-революционерэнь партиянь важодеманень. Ветясь революциянь агитация ды пропаганды сокиця-видицятнень юткова. 1905 иестэ таштамковсто арестовизь ды кучизь Сибирень чиньстямо ёнов кода Саратов ошонь комитетэнь социалист-революционер.

Ладязель Вийкирдиень Думань кочкицякс Саратов ошонь "Важодицянь вейсэндявксонь" (руз. «Союз трудящихся») инициативань кувалт. 1906 иень чадыковонь 14 чистэ ульнесь кочксезь арайстэнзэ I тердемань Рузонь империянь Вийкирдиень Думас Саратов губерниянь кочксемань промкссто. Се шкасто Ульянов пачкодсь Тюменень тюрьмас, косо кармась содамао эсь прянь депутатокс кочксемадо, тень кувалт велявтозель мекев. Камешкирской волостень сокицятне-видицятне тензэ наказасть: «Минек арасть виенок седе тов эрямс не койтнень коряс, наказатанак тыненк, Григорий Карпович, гайтевстэ кортамс Думасо тень коряс ды идемс минек вешеманок. Мерьтянок аштемс кисэнк мештесэ».

Совась Важодицянь кужос (руз. Трудовая группа), тосо лововсь сехте керш ёнксонь кирдицякс. Совиль аграрной комиссияс ды чиновникень апаро тевень ваннома комиссияс. Сёрмадстыце «33-цетнень» коень пусмонть, конась вешсь частной кедьсэ модань кирдемань лоткавтоманть ды модань тевс нолдамонь вейкетьксчинь коряс, истя жо сёрмадстызе яволявтоманть комиссиянь пурнамодо, конась ванноволь администрациянь аволь закононь коряс тевтнеде ды «35-цетнень» модань комитетэнь теемадо проектонть.

1906—1910 иетнесэ ульнесь Эсер партиянь Прявткомитетсэ. Эсь кортамосо ды сёрмадовкссо сон тешкстась: Кирдивиень Думасо паро важодема законтнэнь лангсо а ули. Васеньцесь, мезе топавтома, максомс властенть раськентень, Кирдивиень Думась улезэ вейке зярыя кедьёнкссто, конась сыргавты раськенть революциянь кис туреме.

1906 иестэ саезь ульнесь "Раськень тевесь " (руз. «Дело народа») социал-революционной легальной кулялопанть прявт витницякс. Кулялопасо зярыя сёрмадовкстнэнь коряс, тувака Грузиянь масторонь Гуриянь сокицянь-видицянь айгеманть лепштямодо, Ине-Петра ошонь судонь нупалесь пшкадсь Думас каявтомс Григорий Ульянов лангсто депутатонь атокшемачинть. Вийкирдиень Думась аволькстнесь. Атокшемачинть кадызь. Тень коряс кортамосо сайнесть вал С. В. Аникин, Н. Н. Миклашевский, В. В. Недоносков, Д. Д. Протопопов, Н. И. Семёнов ды лият.

1906 иестэ медьковонь 10 чистэ Выборг ошсо сёрмадстызе "Выборгонь тердема" (руз. «Выборгское воззвание»), тень коряс судс эзь понго, секс мекс 1917 иень видс эрясь эмиграциясо.

Думань кардомодо мейле тусь салава эрямо лангс. 1906 иень медьковонь-ожоковонь перть совиль керш сёлмонь Важодема кужонь Революциянь комитетс, конась прыль социал-демократт марто вемельс - эряви теемс восстания. Сень лангс апак вано, што эрясь салава, артнизе пропаганда марто Обрань ошонь ёнксонть, Казань, Самара ды Пенза ёнкстонть, агитировась ламо мокшонь ды эрзянь велетнева.

1907 иестэ совась Важодема Куронь Прявткомитетс. II тердемань Рузонь империянь Вийкирдиень Думань кардомадо мейле Г. К. Ульяновнэнь савсь полавтомс кой-кодат эсь мельть-арсемат. Сон лиссь Важодема Куронь Прявткомитетстэ, секс мекс эзь соглася 1907 иень Важодема Куронь медьковонь конференциянь мельяволявтома марто - молемс III тердемань Рузонь империянь Вийкирдиень Думань кочксемас. Вейке лисьмапрятнень коряс - тусь эрямо Италияс 1907 иестэ, лиятнень коряс — эмиграциязо ушодовсь ансяк 1908 иестэ, кизна.

1908 иень сундерьковсто саезь эрясь Парижсэ ды Женевасо. Тонавтнесь сонсь, макснесь урокт, ваннось раськень образованиянь историянзо, тейнесь политикань коряс важодема. Важодсь социалист-революционерэнь эмигрантонь вейсэндявкссо Иван Деревенский псевдомин ало. Сёрмалесь те псевдоним ало. Эсь сёрмадовкссо тердсь виев революциянь туреманень царень каршо; Учредительной пурнавксонь тердеманень весемень кочксемань правань коряс; кртитиковась вийкирдийсэ ды 4-це Думань важодемасо.

Васенце Весе масторонь ойнань шкане ульнесь интернационалистэкс.

1915 иестэ путсь вийть Интеллектуальной лездамонь комитетэнь теемстэ, конась лездась рузонь армиянь пленс понгозетненень.

1916 иестэ Власов псевдоним ало кучозель эсерень партиянь керш сёлмонь пельде Раськеютконь Кинталень конференцияс. Нолдась Женева ошсо "Омбомасторсо" (рузкс "Ну чужбине") ловномапусмо. 1917 иень чадыковсто в пломбированном вагоне велявтсь Россияв, важодсь Саратовонь губерниянь земской важодематаркава. Ульнесь яволявтозь Учредительной пурнамонь кандидатокс Москов ошонть пельде эсер партиянть вельде, кочксезель Учредительной пурнамос Саратовонь кочксемань куросо №12 спискань коряс (эсерт ды Сокиця-Видицянь депутатонь Совет).

1917 иень ожоковонь ютазь совась Керш ёнксонь социалист-революционертнэнь партияс. Лездась советэнь виень касоманень Кузнецкой уездсэ.

1918 иестэ ульнесь Весе российской масторонь керш ёнксонь социалист-революционерэнь партиянь депутатокс (руз.Партия левых социалистов-революционеров). В. Мирбахонь, немецень посолонь чавомадо мейле 1918 иень медьковсто те партиястонть лиссь..

1918 иень аштемковсто кармась Раськень Просвещениянь Комиссариатонь важодицякс. Важодсь Авольшколань отделсэ, косо прявтокс ульнесь Н. К. Крупская. 1918 иестэ саезь ульнесь ответственный секретарекс эрьва недля лисниця "Раськень просвещения" ловномапусмонь, конась ульнесь Наркомпросонь официальной органокс.

1919 иестэ редакциясь кучизе Рав ланга эрицятнень лангс вачтамо: Саратовонь ды Пензань губернияс, те ардоманть сон сёрмадызе "Ки лангсто сёрмат" цикласо. Ульнесь Рузаевкасо, Пензасо, Кузнецкойсэ. Эрзянь ды мокшонь велетнева якамось-артнемась макссь тензэ ламо содамочи, конась лездась эрьва ёндо ванноманень мокшонь ды эрзянь раськетнень тевтнень революция мейлень шкасто. Сёрмалеманзо лисить "Раськетнень эрямось" (руз.«Жизнь национальностей»), «Коммунистическое просвещение», «Просвещение национальностей» ловномапусмотнесэ; лецнеманзо лиссть «Каторга и ссылка» ловномапусмосо.

1919 иестэ ульнесь I Весе рузонь масторонь совещаниясо раськетнень просвещениянь коряс.

1920 иестэ — Весе рузонь масторонь раськетнень съездэнь делегат.

1919—1924 иетнестэ ульнесь Советэнь апокш раськень тонавтомань Эрзянь ды мокшонь отделэнь прявтокс (руз.Мордовский отдел Совета по просвещению национальных меньшинств).

1919 иестэ яволявтсь Наркомпросонь мокшонь ды эрзянь подотделонь теемадо ды содамочинь келейсэ сравтомадо мокшонь ды эрзянь ломантнень ютксо.

Чадыковонь 1920 иестэ пшкадсь "Раськетнень эрямо" (руз.«Жизнь национальностей») кулялопантень сёрма марто, конась алтазель мокшонь ды эрзянь тонавтыцятненень. Каясь яволявтома вейсэньгавтомс раськень подотделтнэнь, конатне аштесть Наркомпроссо, Раськень Просвещениянь Советс (Совнацмен). Ульяновонь аравтызь Совнацменэнь Мордовской бюронь прявтокс, косо важодсь 1924 иень видс. Текень марто ульнесь Совнацменэнь печатамонь бюронь прявтокс. Кода Совнацменень прявт артнесь эрьва кодамо раськень, секень марто эрзянь ды мокшонь, Поволжьень буетнева лездамо вачошкатнева голодающим. Сонсь усксь малава 40 эйкакшт, тейнесь тенст эйкакшонь кудот.

Аштесь содавикс таркасо мокшотнень ды эрзятнень тонавтома системань путомасо-кепедемасо: мокшэрзянь раськень школань путыця-кепедиця; «Тундонь чи» васенце эрзянь букварень (1923) теиця лия марто. Путсь вийть 1-це Весе российской мокшонь ды эрзянь тонавтомань съездэнь (1924) пурнамосо.

1924—1926 иетнестэ важодсь Наркомпросонь инспекторокс, ладизе весе эрзянь ды мокшонь эйкакштнэнь тонавтнема лувонть.

1930—1931 иетнестэ тердезель Мордовской автономной областев, косо Школасо тонавтнема методонь институтонь меремань коряс ютавтсь Мордовиява этнокелень ситуациянь коряс исследования, раськень тонавтомань аштемадо-молемадо, велень культурадо, се таркатнева косо тевс нолдавить кавто кельть: рузонь ды эрзянь, рузонь-мокшонь. Тень кувалт ульнесь ламо эрзянь велесэ Атяшовань, Ицялонь, Кочкур ды Саранскоень буетнева.

Ине Отечественной Ойнань ушодомсто ульнесь эвакуировазь Москвосто Московонь областень Климовск ошс. Кулось Климовск ошсо 1943 иень якмашковонь 23 чистэ.

Сёрмадовксонзо

• К моим избирателям: Из писем бывшего депутата 1-й ГД. М., 1907;
• Иван Деревенский. Письмо на родину депутата-трудовика Первой Государственной думы. Париж, 1911.
• Какие цели ставили и ставят себе французские народные университеты. СПб., 1913 (в соавторстве с С. Е. Фортунатовой);
• Обзор литературы по вопросам культуры и просвещения народов СССР. М., 1930.

Литературась

• Государственная дума Российской империи: 1906—1917. Б. Ю. Иванов, А. А. Комзолова, И. С. Ряховская. Москва. РОССПЭН. 2008. С. 636—637.
• Боиович М. М. Члены Государственной думы (Портреты и биографии). Первый созыв. М.: Тип. Товарищества И. Д. Сытина. 1906 С. 315.
• Первая Государственная Дума. Алфавитный список и подробные биографии и характеристики членов Государственной Думы. — М.: Тип. Товарищества И. Д. Сытина, 1906. — 175 с.
• s:Файл:Государственная дума первого призыва (1906).pdf Государственная Дума первого призыва. Портреты, краткие биографии и характеристики депутатов. — Москва: «Возрождение», 1906. C. 53.
• Бибин М., Оссовский Е. Г. К. Ульянов // Просветители и педагоги мордовского народа. Саранск, 1986;
• Колесниченко Д. А. Состав Трудовой группы в I и II Государственных думах: Сводная таблица членов фракции. М., 1988. С. 52-56;
• Политические партии России. Конец XIX первая треть XX века: Энциклопедия. М, 1996];
• Мордовия: Энциклопедия. Саранск, 2004. Том 2.
• Российский государственный исторический архив. Фонд 1278. Опись 1 (1-й созыв). Дело 40. Лист 19; Фонд 1327. Опись 1. 1905 год. Дело 141. Лист 100 оборот −101; Дело 143. Лист 120 оборот.