Ташто найман (Джяковица)
Джяковицасо Ташто найман (Покш найман) (алб. Pazari i vjetër në Gjakovë, серб. Стари базар) — Косовасо сехте ташто найман. Исторической таркасонть, косо ашти найманось, истя жо ашти ошонь Хадум сехте ташто мечетесь, кона стявтозель 15-це пингестэ.
Покш найманось ульнесь Джяковицань экономиканть седеекс, тесэ торговасть сеньсэ, мезе усксть маласо велетнестэ. Ташто найманось калавтозель-лондавтозель 1999-це иень Косовань войнань шкасто, мейле строязель одс.
Мечетенть перька аштить калмолангонь путовкст, конатнень лангсо скульптурной декор ды Османонь ташто кельсэ сёрмадовкст. Умонь шкасто тосо калмасть Джяковицань содавикс кудораськень ломантнень. Мечетень комплексэнтень совакшнось истя жо хамам (туркань баня), конань яжизь 2008-це иестэ, ды 1671-це иень ташто библиотекань здания (янгазь Косовань войнанть шкасто).
Ташто найманось ашти ошонь куншкакуронть вакссо Крана леенть тона чиресэ сэденть трокс 5 минутань ютамо туросо. Найманось саи малав 3,5 га покшолмасо тарка, прявт куринканзо кувалмось 1 км, сонзэ кувалт аштить малав 500 лавкат. Тосо истя жо ашти мечеть ды зярыя тюрбеть. Ташто найманонть куншкасо ашти часонь башня, кона стявтозель 1597-це иестэ. 1912-це иестэ, Балканонь войнатнень шкасто, сон янгазель, мейле одс кепедезель.
Историясь витнемс
Джяковицань Покш найманось чачсь васень мастертнэнь ды ремесленниктнень появамост марто. Те ульнесь, зярдо Джяковицась получась касабынь (вишка ошкень) статус. Васенцекс наймандонть сёрмадсь Эвлиа Челеби туркань путешественникесь, кона сакшнось Джяковицав 1662-це иестэ ды дивась сонзэ мазычинтень. Покш наймансонть ульнесть ламо эрьва кодат лавкат. Тосо торговасть кшнинь коряс мастерт, кедень тейниця мастерт, кодыцят, жестянщикть, шорникть ды истя седе тов.
Примечаният витнемс
Литературась витнемс
- Masar Rizvanolli (2009). Grand Bazaar of Gjakova. Gjakove: Association of Intellectuals.