Причастият эрзянь кельсэ
Причастиянть глаголонть ды прилагательноенть марто сюлмавомазо витнемс
Причастиянть улить глаголонь ды прилагательноень ёнксонзо.
Глаголонть марто сонзэ вейсэндить истят тешкст.
1. Вейке валлувонь улемась, секс мекс причастиятне теевить глаголсто ‑и/-ы, -ий/-ый, -иця/-ыця, -икс, -зь, -нь, -вт/-вть, -ма/-мо суффикстнэнь вельде.
2. Ютыцянь – аволь ютыцянь смустесь. Невтемга, ютыцянь смусть марто глаголт ды причастият: симд-емс – симд-иця, анд-омс – анд-ыця, салт-омс – салто-зь, виде-мс – виде-зь; аволь ютыцянь смусть марто глаголт ды причастият: кас-омс – кас-ыця, кенер-мс – кенер-иця, коське-мс – коське-зь, кома-мс – кома-зь.
3. Шкань смустесь: эрсить неень ды ютазь шкань причастият. Невтемга: 1. Садпиресэ эземне лангсо ашти ловныця тейтерне (ловныця причастиясь неень шкань).2. Ледезь тикшестэнть качады цецячине (ледезь причастиясь ютазь шкань).
4. Видэнь смустесь. Причастиясь невти ёнксонь-тевтеемань ушодома, весть теевема, ламоксть эрсема, кувать молема. Невтемга: ушодомань ды векирдань видэнь глаголт ды причастият: пейдезевемс – пейдезевиця пакша, совамс – кенкшка совиця ломань, ёртомс – ёртозь умарь, порксамс –порксазь пеште, вайкстамс – вайкстамо вайгель; ламокирдань ды кувать молемань видэнь глаголт ды причастият: морсемс – морсиця нармунь, ризнэкшнэмс – ризнэкшныця ава, чольнемс – чольниця ведь, колсемс – колсезь кедьгеть, пракшномс – пракшнозь лопат.
5. Залогонь смустесь. Эрзянь причастиянть кавто залогонзо: действительной ды страдательной. Невтемга: 1. Ков а варштан – лембе вармасо элякалиця пакся (А. Доронин). Элякалиця – действительной залогонь причастия. 2. Бабам венстиль тенек салсо почодозь лембе рошксень печтть ды плошкасо ловсо (Т. Разгуляева). Почодозь–страдательной залогонь причастия.
6. Наречия марто сюлмавомась. Кода глаголонтькак, причастиянть чарькодевти наречиясь. Невтемга: 1. Розенть эйстэ моли лембе зэхель, цють марявиця колозчине. 2. Ортянь Осипень вальмалксось зярдо-бути пирязель мазый пирявкссо. 3. Чокшнень сундерьксэсь сэтьместэ копачась кудотнень ды вальмалга касыця кальтнень (Весе валрисьметне К. Абрамовонь). 4. Вана Сёга эрькеськак … Теке ведьсэ склень пештязь кувака келей очко (А. Доронин).
Прилагательноенть марто причастиянть вейсэндить истят ёнкст.
1. Предметэнь ёнксонь невтемась. Сыненст максови кодамо? кевкстемась: виев пиземесь – виемезь пиземесь, салов ям – салтозь ям, чевте мода – чевтемгавтозь мода; якстере умарь – якстердиця умарь, пси ведь – лаки/лакиця ведь.
2. Падежга, числава аполавтневемась. Причастиясь, кода прилагательноеськак, валтнэнь марто, конатненень кандови, сюлмави нежедема (примыкания) вельде. Невтемга:
Им. чудиця ведь артозь паця
чудиця ведть артозь пацят
Род. чудиця ведень артозь пацянь
Дат. чудиця веднень артозь пацянень
Отл. чудиця ведте артозь пацядо
Мест. чудиця ведьсэ артозь пацясо
Исх. чудиця ведьстэ артозь пацясто
Внос. чудиця ведьс артозь пацяс
Напр. – –
Перем. чудиця ведьга артозь пацява
Превр. чудиця ведекс артозь пацякс
Сравн. чудиця ведьшка артозь пацяшка
Изъят. чудиця ведтеме артозь пацявтомо
3. Валрисьмесэ определениякс улемась. Невтемга: 1. Лисни (Ферапонт Нилыч) садс чоподанеяк, зярдо леенть тона ёно, пичевирьсэнть, кукордыть кукот – пертьпельксэнть вечкевикс ялганзо (А. Доронин). 2. Вечкса минек Саранскоенть Кенярдстыця касоманзо,Сонзэ виенть, сонзэ коенть, Мазый гайтьсэ гайгеманзо (А. Мартынов). 3. Ансяк сулеень прамо таркава неявсть апак цивтёрдояк сэнеждиця ведьсельметь (А. Куторкин). 4. Сась чапозь од промкс кудонть кепедема шкаськак (А. Куторкин).
4. Причастиясь, кода глаголось ды прилагательноесь, валрисьмесэ топавты сказуемоень тев, тень пингстэ сон саекшни числань, лицянь ды шкань суффикст.
Невтемга: 1. Вай, авакай, эрзянь мастором, Вай, корьмакай, тиринем – ванынем! Сював олго лангс чачозят, Вешки вармасо лемдезят (Д. Надькин). Чачозят, лемдезят сказуемойтне – ютазь шкань 2-це лицясо вейкень числасо формат. 2. Мекс нармунтне важодицят? Важодицят ды морыцят? – Левксэст-пакшаст сынь ливтить, Пекест пештямс сынст андыть, Эрьва мезес кенерить. Тень кувалма кенярдыть (Эрзянь моросто). Важодицят, морыцят сказуемойтне – неень шкань 3-це лицясо ламонь числасо формат. 3. Садпирень раужкадозь лугинесь ацазель умаринань ожо лопасо (К. Абрамов). Ацазель сказуемоесь – ютазь шкань 3-це лицясо вейкень числасо форма. 4. … Тия-тува ашолдсть вейкине пельть, чивалгома ёно чирест артозельть якстересэ … (К. Абрамов). Артозельть сказуемоесь – ютазь шкань 3-це лицясо ламонь числасо форма.
Причастиянь форматнень смустест ды теевемаст витнемс
Эрзянь причастиятнень, кода ёвтазель, улить залогонь смустест. Залогтнеде кавто: действительной ды страдательной. Прявт явовомась ютксост сюлмазь сень марто: кие эли мезесь ливти се ёнксонть, конань невти причастиясь.
Действительной залогонь причастиятне витнемс
Действительной залогонь причастиясь тешксты предметэнть истямо ёнксонзо, конань сонсь (те предметэсь) ливти.
Невтемга: Тувор лангсо ашти палыця штатол. Палыця – те штатолонть ёнксозо; палы штатолось сонсь, тень пингстэ теи эсензэ ёнксонзо. Вальма вакссо озадо ловныця эйкакш. Предметэсь (лицясь) топавты тев – ловны, теи ловныця ёнкс, кона кандови эстензэ.
Действительной залогонь причастиятне теевить -и/-ы, -ий/-ый, -иця/-ыця, -зь суффикстнэнь вельде. Сынь эрсить неень ды ютазь шкань формасо.
Действительной залогонь неень шкань причастиятне витнемс
Теевить глаголонть согласной лувстонзо -и/-ы, -ий/-ый, -иця/-ыця суффикстнэнь вельде.
Суффикстнэнь вариантост глаголонь лувтненень поладовить истя:
а) и гайтенть марто варианттнэ саевить, прядовиндеряй лувось:
‒ чевте согласнойсэ: кольн-емс – кольн-и(кольни эйкакшось а оймавтови),цитн-емс – цитн-и (цитни тештесь цитнезэ, мазый ковось пейдезэ), нувс-емс – нувс-ий (чинзэ чоп нувсий бабине),вет-ямс – вет-ий (ветий кедесь ветятанзат), вид-емс – вид-иця, каз-емс – каз-иця, пел-емс – пел-иця, мар-ямс – мар-иця, кец-ямс –кец-иця, ту-емс[туй-эмс] – ту-иця [туй-иця];
‒ калгодо апак кавонза согласнойсэ: гайг-емс – гайг-и (гайги моросо вастомс), сок-амс – сок-и (соки, види ломань весе народонть анды), сов-амс – сов-иця, ком-амс – ком-иця, сёп-омс – сёп-иця;
б) ы гайтенть марто варианттнэ тевс нолдавить, прядовиндеряй глаголонь лувось калгодо кавонзазь согласнойсэ: канд-омс –канд-ыця, пез-эмс – пез-ыця, ван-омс – ван-ыця, ванст-омс – ванст-ыця, ац-амс – ац-ыця, пал-омс – пал-ы (палы тол палы), мор-амс – мор-ы (моры письмарнэ моры), макс-омс – макс-ый (превень максый покштя),сал-амс – сал-ый (алонь салый варака);
в) ж,ш,ч согласнойсэ прядовиця лувтнень мельга ёвтави ы гайтесь, сёрмадови и буквась: баж-амс – баж-иця, веш-емс – веш-иця, чач-омс – чач-и (чачи эйкакшот улезэ).
Неень шкань действительной залогонь причастиятне невтить апак прядово ёнксонь улема-аштема. Валрисьмесэ сынь тешкстыть:
а) ёнкст, конат предметсэнть улить глаголонть тевтееманзо марто ве шкане. Невтемга: 1. Прыця ловось новоли ашо кесакокс алов, пры састо, шождынестэ … (К. Абрамов);
б) ёнкст, конат предметсэнть ульнесть глаголонть тевтеемадонзо икеле. Невтемга: 1. Налксиця эйкакшонь вайгельтне ней эзть маряво. 2. Комсьветее иес човине, чей ёнов молиця тарадкетнестэ кепететсть кавто кудонь сэрьсэ килейть (А. Доронин);
в) шка марто апак сюлма ёнкст. Невтемга: 1. Валскень зорянть валдозо инзейведекс валовсь … садтнэнь прява, кирьвазтсь эйсэст виздиця тейтерень чамакс (К. Абрамов); 2. Ардынекминь, даволось налксесь, кольниця пакшакс невтнесь пря (А. Мартынов).
Неень шкань кельсэнть сехте вастневицят -иця/-ыця суффиксэнть марто причастиятне. Ялатеке лия суффикс мартотнеяк марявкшныть кортамосо ды муевить художественной текстнэсэяк.
Невтемга: 1. Сокиця ломаненть весе кемемазо чачи сюронтень. 2 . Сонзэ (валдонть) вастыть паксянь нармунтне гайги моросо, тикшетне – сияросань цитнемасо, цецятне – мазы лопань келемтезь. 3. Алонь салый варакатне ды сезякатне чинзэ чоп ливтнить веле малава, вешнить ярсамопель (Весе валрисьметне К. Абрамовонь). 4. «Ёвтака, килейне, Косто саить кумбрят?» – «Те – ловкандытелесь Пряван мазыть каясь…» (И. Кривошеев). 5. Цветий садсонть шумбра эйднеть налксить луганть элесэ, мазый моросо моравить, Палы зоринекс зорявить, Васов вайгелест марявить (И. Кривошеев). 6. Лисьмапрякс пиже килей Пургси нурьгий тарадсонзо (С. Вечканов). 7. А сон (тундось), прок кольни эйкакш, яходи сэнь менелькс пацясонзо, сыргозевти чувто, бажи чатакавтомс лията (Н. Эркай).
Действительной залогонь ютазь шкань причастиятне витнемс
Ютазь шкань причастиятне теевить -зь суффиксэнть вельде а ютыця смусть марто глаголтнэнь гласной лувстост. Невтемга: пужо-зь лопа (пужо-мс), кенере-зь кстый (кенере-мс), сиве-зь чувто (сиве-мс), мерькаво-зь панар (мерькаво-мс), сыреде-зь ломань (сыреде-мс).
Неть причастиятне малав свал невтить тевтеемат-ёнкст, конат ульнесть предметсэнть кортамо шкадонть икеле. Невтемга: 1. Аволь пакся сравтовсь – кенерезь лёмзёркссо почодозь келейчи (А. Доронин). 2. Медьсэ качадыцясь (умаринась) сеедьстэ сэреди ды, кода ормалгадозь эйкакш, вечки мельганзо якамот (А. Доронин). 3. Кинть чирева тикшенть потмова сяткинекс цитнесть васень панжовозь цецятне. 4. Нешкепирень полянанть велькссэ бизнэзевсть васень мекшетне, пельслопиязь тарадтнэнь пева цитнезевсть пиземепетнявкстнэ. 5. Садтнэва умок уш кенерсть … умартне, пракшность пужозь ды тюжалгадозь лопатне (Весе валрисьметне К. Абрамовонь). 6. Пиди, кали верде чизэ, А маряви гайть. Рипакадозь цецяв кизэнть Берёмазот сайть (А. Мартынов).
Седе чуросто, ялатеке эрси, зярдо причастиясо невтезь ёнксось лиси эли а лиси кортамо шкадонть мейле: Палт, седей! Иля сода сизема. Палт чинь-чоп тон а мадиця толокс. Аволь эй, Аволь кельме пиземе Илидизь тее мадезь тонолокс (П. Любаев).
Страдательной залогонь причастиятне витнемс
Страдательной залогонь причастиятне невтить истямо ёнкс, конань ливти-теи вейке предметэсь, кандови сон омбоценень. Лиякс меремс, неть форматне панжить сень, мезе кие-бути, мезесь-бути теи объектэнть марто.Невтемга: Вешкеземсэ аштить авань паневть пачалксензэ. Паневть – те пачалксетнень ёнксост, теизь сонзэаволь пачалксетне, теицясь – лия предмет (лиця) – авась. Валрисьмесэ алкуксонь объектэсь (пачалксензэ) – подлежащей, алкуксонь тевтеицясь (авань) – дополнения. Тевтеицясь ёнксонть ливтизе, объектэсь сонзэ саизе.
Страдательной залогонь причастиятне теевить -икс, -ма/-мо, -зь, -нь,
-вт/-вть суффикстнэнь вельде. Эрсить неень ды ютазь шкань формасо.
Страдательной залогонь неень шкань причастиятне витнемс
Неть причастиятне теевить -икс, -ма/-мо суффикстнэнь вельде ютыця ды аволь ютыця смустень глаголсто.
Форматне теевить истя:
-икс суффиксэсь поладови -в- суффикс марто глаголтнэнь согласной лувозост: ловнов-икс сёрма (ловнов-омс), ютав-икс ки (ютав-омс), учов-икс ялга (учов-омс), топавтов-икс тев (топавтов-омс);
-ма/-мо суффиксэсь поладови глаголонть гласной лувонстэнь: вечке-ма чама (вечке-мс), лотка-мо тарка (лотка-мс), мора-мо вайгель (мора-мс).
Неть причастиятне глаголонть-сказуемоенть марто шкасо сюлмавить истя.
Седе сеедьстэ сынь невтить свалшкань ёнкст ды кандовить эрьва кодамо шкас. Невтемга: 1. Зяро вастнекшнян вечкевикс Чивалгомат, валскень стямот! (Е. Пятаев). 2. Велявтсь (Вечканов войнасто), одов кундась вечкевикс тевезэнзэ – сюронь кастомо… (А. Доронин). 3.Пижелдыця лугатне, кенериця сюротне, опаня чокшнесь, чевте вармась – весе те кутморясь тейтеренть ды пештясь седеензэ аёвтавикс кенярдомасо, эрямонь вечкемасо (А. Лукьянов).
Эрси истяяк, зярдо причастиянть ёнксозо лиси глаголонть тевтеемадонзо мейле; Аволь Митричнень сави кастомс … сонзэ (Алёшкань) се видьс, зярдо сон сонсь карми эрявикс покш тевень тееме (Н. Эркай).
Страдательной залогонь ютазь шкань причастиятне витнемс
Сынь теевить ютыця глаголонь гласной лувсто -зь, -нь, -вт/-вть суффикстнэнь вельде:
-зь: иза-зь мода (иза-мс), касто-зь сюро (касто-мс), леде-зь тикше (леде-мс), пезэ-зь пря (пезэ-мс);
-нь: чапавто-нь умарть (чапавто-мс), салто-нь кал (салто-мс), реста-нь сывель (реста-мс);
-вт/-вть:кучо-вт сёрма (кучо-мс), чаво-вт, кельмесэ чавовт эмежть (чаво-мс), лака-вт ведь (лака-мс), чова-вт, пштистэ човавт пеель (чова-мс), синде-вть чувтыне (синде-мс).
Шкань коряс неть причастиятне малав свал невтить ёнкс, конань предметэсь саизе глаголонть тевтеемадонзо икеле.Невтемга: 1. Васолдо серьгедсь пурьгине. Серьгедсь аволь кежейстэ, вайгелезэ апак капша срадсь пельтнеде чополгадозь менельганть (Н. Эркай). 2. Паксянть велькска ливтнесть чинь валдосонть экшелязь сиянь нармунть, сияжарокс палсь сёксень виресь (Н. Эркай). 3. Сурасто таргсезь калтнэнь Трофим сонсь салты-копти (А. Доронин).
Неень шкань кельсэнть сехте вастовицят -зь суффиксэнть марто причастиятне. Невтемга: 1. Марязь валтнэде Игорь натой якстерьгадсь. 2. Веденть кружкань-кружкань явшесть валске ланга, зярдо кандыльть ярсамка – салтозь калонь пря ды човазь модамарьстэ кшисускомо. 3. Ведезэ (Суранть) – теке ванькс пацясо нардазь зеркала (Весе валрисьметне А. Доронинэнь).
Причастиятне, конат теевить -нь, -вт/-вть суффикстнэнь вельде, неень кельсэнть тевс нолдавить аволь пек келейстэ: Вирьстэ кандовт цецянь пусмонть капшамонь пачк ёвкстыя ведь марто кедьгес ды кадыя вальмалангс… (Т. Разгуляева). Сынь седе муевить эрзянь художественной литературанть чачома иетнестэ нолдазь сёрмадовкстнэсэ.Невтемга: 1. Голець кепедизе прянзо… ды икелензэ сравтовсть ютань-потань тевтне. 2. Стиль (Татю) пелеветь, мадиль аштень чокшне. 3. Голець мизолдовт чамасонзо прясто пильгс варштызе Сеелень. 4. Сон кувакасто укстазевсь ды стамбарнэ серьгедсь моро. Васня марявсь авардевть, сорныця сельведев вайгель. Мейле аламонь-аламонь лиссь седе пштистэ (Весе валрисьметне Т. Раптановонь).
Причастиятнень арасьчинь формаст витнемс
Сынь теевить а, апак, аволь арасьчинь частицатнень вельде (Кода ёвтазель икеле, аволь валось – арасьчинь глагол. Ялатеке, причастия марто сюлмавозь, сон топавты частицань тев).
А ды аволь частицатне саевить истя.
1. Неень шкань действительной залогонь причастия марто:
а) а кунсолыця эйкакш, а покшкавтниця ломань, а каваниця азор;
б) аволь кунсолыця эйкакш, аволь покшкавтниця ломань, аволь каваниця азор.
2. Неень шкань страдательной залогонь причастия марто:
а) асодавикс цёра, аютавикс ки, а вечкема тюс;
б) аволь содавикс цёра, аволь ютавикс ки, аволь вечкема тюс.
3. Ютазь шкань действительной залогонь причастия марто:
а) а кенерезь атямарть, а талакадозь вановт;
б) аволь кенерезь атямарть, аволь талакадозь вановт.
Апак частицась теи арасьчинь формат:
а) ютазь шкань действительной залогонь причастиятнестэ; б) ютазь шкань страдательной залогонь причастиятнестэ. Тень пингстэ причастиянь -зь суффиксэсь керяви, -нь суффиксэсь ванстови. Невтемга:
а) апак кенере кстыйть, апак лисе видьмекст, апак сола сал, апак чуде ведь;
б) апак виде сюро, апак пурна эмежть, апак каваня инже, апак прядо тев, апак учонь зыян, апак тердень инже.
Валрисьмесэ невтевкст: 1. Сынь (анисовкатне) ламо ведь эзть веше, пельсть ансяк пекень апештявиця сукстнэде (А. Доронин). 2. Коське, амаштовикс тарка… Амаштовикс ды, теке марто, певтеме вечкевикс (А. Доронин). 3. …Паксянть лангсо кизэнь пизементь алоначконить апак нуе розь, скирдас вачказь пултт ды пельспреязь олгокуцинеть (К. Абрамов). 4. Розесь нуевсь, тия-тува аштить апак уско пултт, велькскаст раужо полксо ливтнить письмарт (К. Абрамов). 5. Сынь (Саша ды Витя) кассть теке патят-ялакст… Ансяк обуцяст а вейкеть. Витя – сэтьме, аволь капшиця. Саша – вармань кондямо (Т. Разгуляева). 6. «Кода валот чарькодемс, мазыйка?» ‒пецькачалгамонтень кутьмерьсэнзэ нежедезь… пшкадсь апак тердень инжеськак (А. Доронин). 7. Апак учонь яволявксось абунгавтызе Ферапонтонть (А. Доронин). 8. Те апак учонь цярахманось прась кавонест седейс аёвтавиця сталмокс (К. Абрамов).
Причастиянть существительноень таркас саемась витнемс
Причастиясь ёвтавкшны существительноенть таркас. Те эрси сестэ, зярдо причастия + существительной валсюлмавксстонть существительноесь ёртови ды причастиясь карми топавтомо аволь ансяк эсензэ, существительноентькак тевензэ. Тень пингстэ сон полавтневи падежга, прок существительной:
ловныця цёрынесь – ловныцясь
морыця эйкакштне – морыцятне
сёрмадыця ломантненень – сёрмадыцятненень
артозь ал – артозесь
тердезь инжетне – тердезтне
соказь паксява – соказьга
Причастиятнень падежга полавтнемань невтевкс витнемс
Аволь невтемачинь полавтнемась витнемс
Им. идиця стазь
идицят стазть
Род. идицянь стазень
Дат. идицянень стазнень
Отл. идицядо стазде
Мест. идицясо стазьсэ
Исх. идицясто стазьстэ
Внос. идицяс стазьс
Перем. идицява стазьга
Превр. идицякс стазекс
Сравн. идицяшка стазешка
Изъят. идицявтомо стазтеме
Валрисьмесэ невтевкст: 1. Пётр Иванович ды Наташа вастовсть килангсо. Сон ардыль, несь молиця (А. Брыжинский). 2. Музыкань а вечкицят ней, бульчом, косояк арасть (А. Брыжинский). 3. Виресь музгордсь сыре атякс, нать, секс, мекс алкукс сырель, мекс тей эзть пачколе чувтонь керицяткак (Т. Разгуляева).
Превратительной падежень формась сеедьстэ вастови сказуемоень пельксэнь тевсэ: 1. Трофим лововсь … лесничествасо ули-паронь ванстыцякс (А. Доронин). 2. Надя ды Виктор теевсть содавиксэкс вейксэце классо (Т. Разгуляева). 3. Тон (Володя) – веженсесь, тонеть кадовомскак кудонь кирдицякс (А. Брыжинский).
Невтемачинь полавтнемась витнемс
Им. идицясь идицятне
Род. идицянть идицятнень
Дат. идицянтень идицятненень
Отл. идицядонть идицятнеде
Мест. идицясонть идицятнесэ
Исх. идицястонть идицятнестэ
Внос. идицянтень идицятнес
Перем. идицяванть идицятнева
Превр. – идицятнекс
Сравн. идицяшканть идицятнешка
Изъят. идицявтомонть идицятневтеме
Валрисьмесэ невтевкст: 1. Те, нама, чарькодеви: верев кузицясь алов чуросто варштни… (А. Доронин). 2. Вай, пакся-андыця, кода тон кувать учить сокицянть… Телень перть! (А. Доронин). 3. Молицятне веленть пестэ пурдасть ташто тингекияванть ды тусть вере ульцянть удалга (К. Абрамов). 4. Сыцятнеде Пахом Васильевичнень ёвтась Вася… (К. Абрамов). 5. Ней весе вийсэст цветясть ансяк умонь озавтозтне (умаринатне), раужо ды якстере шукшторовтне, инзейтне (А. Доронин). 6. Виде, ульнесь умарьпиресэнек онстон неезенть кондямо свадьба (Т. Разгуляева). 7. Печтязесь сеедьстэ эрьванть туртов эрси онкстамокскак, икелев кинь невтиця тештекскак (Т. Разгуляева).
Азорксчинь полавтнемань невтевкс витнемс
Сонзэ кужось
Им. идицязо Исх. идицястонзо
идицянзо Внос. идицянстэнь
Род. идицянзо Перем. идицяванзо
Дат. идицянстэнь Превр. –
Отл. идицядонзо Сравн. идицяшканзо
Мест. идицясонзо Изъят. идицявтомонзо
Валрисьмесэ невтевкст: 1. Сак тень мекев, норовжорч! Сак, зорява монь вастыцям. Сак, паксясо монь кастыцям, Ливтяк таго зорянь коштс (А. Мартынов). 2. Тейтернесь педязь педясь кирьгазонзо (лишменть), сонсь секе тев чевте вайгельсэ кортась: «Буяннэ, вечкевиксэм, оймак, оймак…» (Т. Разгуляева). 3. Чись – масторонть эждицязо, Валдонь, лембень максыцязо. 4. А сеске понгсь Кечаев содавиксэнстэнь, тона командировкасоль (А. Брыжинский). 5. «Кие, кие ярмактнень саицяст?» – велясть Лидия Васильевнань пряпотмосо арсематне (А. Брыжинский)
Сёрм. витнемс
Мария ИМАЙКИНА, филологиянь наукань кандидат, доцент
Саезь: "СЯТКО", №9 (719), 2017