Нармунень кундсицят ды гулят

Нармунень кундсицят ды гулят — эрзянь пакшатнень телень ды кизэнь чийнема-чарамо налксема.

Налксить 10-шка ломанть.

Налксемань кой-кирдатне

Налксема паксянть лангс черькстави кирькс 5 м диаметрасо ды ниле ужосо кундо 4х4 м покшолмасо. Кундось ули нармунень кундсицянть кудокс, кирьксэсь — нармунень оймсема таркакс.

Весе налксицятне васняяк пуромить кирьксэнть потс. Жеребеень коряс кочкавить нармунень кундсицясь ды нармунень полконь прявтось. Кундсицясь туи эсензэ кудос.

Гулятне явновить кавтонь-кавтонь. Эрьва налксицясь кепедьсы вить кедензэ верев ды конянзо икелев аравтсы мендязь кедьлапушканзо. Те ули гулянь нерекс. Керш кеденть налксицясь мендясы удалов. Те — гулянть сёлмозо. Нармунень паратне вастовома шкасто токше􏰀 вить нерде нерьс, кулдордыть: «Кулдыргук, кулдыргук». Налксицятненень эряви содамс нармунтнень иласт-кирдаст ды налксемстэ маштозь сынст невтнемс.

Ве пильге лангсо кирнявтнезь, кирьксэнтень сови кундсицясь. Кедьсэнзэ — нармунень кундсема пель: илёвонь пинкс 50 — 60 см диаметрасо. Налксемань койтнень коряс, кундсицясь весе тевензэ теи ве пильге лангсо. Прявтось пштистэ ваны кой-кирдатнень ильведькстэме топавтомаст мельга. Кундсицянть лисемстэ нармунтне каштмолезевить, арсить «либордамс» таркастост. Тень теемстэ сынь бойка арсить колоннас ды сыргить «ливтямо» кирьксэнть потмова, чиремкшнезь ды ве сёлмсо аволязь. Нармунень полконь прявтось сти кирьксэнть куншкас ды ванкшны кундсицянть тевензэ мельга. Тона норови сасамс меельце гулянть ды каямс лавтовонзо трокс кундсема пинксэнть. Прявтось полконть ванстомсто скири нерьсэнзэ кундсицянть, а максы тензэ кундсеме нармунтнень. Ансяк тень теемстэ а эряви путнемс вий, а тюремс.

Зярдо кундсицянтень удалы ёртомс гульканть лавтовс кундсема пинксэнть, сон ветясы сонзэ эсь кудозонзо ды стявтсы ужос. Эсь кудосонзо кундсицясь сти кавонест пильгтнень лангс, оймси. Теде мейле кундсицясь таго лиси кирьксэнть потс нармунень кундсеме. Те тевенть сон ютавты эрьва кода манчезь: туи чиеме, нармунтнень каршо, сови полконть куншкас. Бути эшкеви куншказост, сестэ нармунтне явовить кавтов, ды кавтов сезезь полктнестэ эрьвась туи «ливтямо» эсензэ киява—кершев эли витев кирьксэнть потмова. Бути прявтось редясы, што кундсицясь нолдызе кепедезь пильгенть масторов, сон сеске пижакады: «Кулдыр, кулдыргук!». Весе нармунтне сеске пурнавить кундсицянть перька кеме пинксэкс ды, кежейстэ кулдордозь, тулкадьсызь сонзэ кирьксстэнть ушов. Теде мейле васенцекс кундазь гулькась (бути истямось ули) ары кундсицякс, а бути улить кундазь лия гулькаткак, сетне туить эсь полкозост. Бути ве гулькаяк арасель кундазь, сестэ кундсицясь кочкави, кода налксеманть ушодомсто, жеребеень коряс. Налксемась поладови.

Бути кундсицянтень удалы кундамс мельга-мельцек ниле гулькат, сон сынст стявтнесынзе ниленест ужотнес ды ушоды мартост ютавтомо башка налксема, конанень мерить «кедьс-коморс саема». Сонзэ смустезэ вана мейсэ: нармунень кундсема пинксэсь путови моданть лангс. «Гуль-гуль» мерезь кундсицясь сурсо манясынзе эстензэ ниленест гулькатнень ды максы тенст тев. Гулькатне арыть пинксэнть ваксс ды мельга-мельцек ушодыть кирнявтнеме ве пильге лангсо пинксэнть ушо ёндо потмозонзо ды мекев. Истя сынь ютыть весе пинксэнть перька. Те тевенть теемстэ пинксэсь пильгсэ а токама, лангозонзо а чалгама. Кинень те тевесь тееви, сень кундсицясь нолдасы «оляв» — кирьксэнть куншкас, козонь пурнави башка полк. Кинень те тевесь эзь тееве, сень кундсицясь мекев аравтсы ужос. Кундсицясь ушодсы «охотанзо» одс.

Налксемась прядови сестэ, зярдо нармунень ойсема паксяванть кармить якамо ансяк «кедьс-коморс саезь» гулькат ды нармунень полконь прявтось. Налксемстэ эйкакштнэнень а эряви стувтнемс налксема образонть — свал кирдемс мельсэ нармунтнень ливтнемаст, кулдордомаст, кирдемс неренть ды сёлмонть эрявикс таркасо.

Сёрм.:

Брыжинский Василий Сергеевич 2002: Сиянь рисьминеть. Мордовской книжной издательствась. Лл.61-63.