Метьказт

Метьказт (лат. Lacertilia, икелень лем Sauria) — те ёзныцянь отрядалксто лукшонь отрядсто.

Метьказонть лангонь строениязо

Минек пельга понгонить кирнявтнезь ладсо молиця метьказт. Сех сеедьстэ сынь понгонить кизэнь лембе шкане, чуваров эли кевев коське таркава, косо касыть куракшт.

Метьказонть вете сур марто пильгензэ нуркинеть ды аволь виевть. Рунгост сыненст а кепедеви верьга, секс метьказось моли мода ланга ёзмолдозь ладсо.

Метьказонть рунгокедезэ вельтязь роговой лукшкесэ, сынь аравтнезь вейкест-вейкест лангс черепица ладсо. Прязо вельтязь роговой щитоккесэ. Метьказонть рунгонь кедьсэнзэ железат малав арастькак, секс сонзэ кедезэ коське. Нама, истямо кедентень а кода лездамс лексемантень.

Метьказонть камбразось

Метьказонть эрьге ловажась ашти ламо каряз ловажасто, кона-кона метьказтнэнь эрсить малав сядошка. Сех ламо каряз ловажат пулосонть. Каряз ловажатне икельде мендезь, удалдо седе лепштявозь. Истят ловажатне ладить вейкезэст-вейкезэст, секс метьказонть рунгозо ды пулозо пек меншевицят. Мештень ды карксамонь каряз ловажатнэнень нежедезь ирдикстнэ.

Мештень икельсе ирдекстнэ сюлмавозь ловажанть марто каворьсэ, лиси, сон перть пельга пирязь ловажасто.

Касозь метьказонть прянь ловажанзо вейс педявозь, сонзэ пиле бокань ловажанзо ютксо ули варя, те варянть велькссэ ули колмоце сельме ушодкс. Те варянть пачк юты нерва, кона моли пря удемстэ те сельментень. Сельмесь пузырнень кондямо, сон кекшезь кедь ало. Арсить, те сельменть кувалт метьказось фати чоподантень ды валдонтень. Сонзэ алсе пей ловажазо васодстязь пря ловажань коробканть марто квадратной ловажасо.

Карксамонь ды пильгень ловожанзо метьказонть аштить истя жо, кода мода лангсо эриця ракшатнень.

Верень якавтомань ды лексемань органонзо

Метьказонть седеезэ, кода весе лияяк мода лангсо эриця ракшатнень, колмо камера марто, но желудочказо явозь кавтов — керш ды вить пельксэсь. Явозь сон аволь сплошь пирявкскесэ.

Секс сонзэ артериянь ды венань верензэ човорявкшновить седе а ламот ведьсэ ды мода лангсо эриця ракшатнень коряс. Тевелявонзояк сонзэ седе парсте касозь ведьсэ ды мода лангсо эрицятнень коряс. Сонзэ тевелявонзо аштить ячейкань-ячейка. Эйсэст ламо верень кандома капиллярт. Секс тевелявтнэнь лангост пек покш. Теде ламо кошт сови капилляртнэнень. Те истя секс, метьказтнэнь кедень лексемаст арась, сыненст эрявикс чапамо чачтыйесь сови ансяк тевелявонь пачк.

Метьказонть рунгозо истя жо, кода ведьсэ ды мода лангсо эрицятнень теласост, лембе а ламо, температуразо сонзэ полавтневиця атмосферань температуранть коряс. Кизна пси чине метьказось пек ардтниця, кода седе якшавты, сон эньгами. Тельня метказось уды.

Нервань системазо ды ёжонь марямо органонзо

Метьказонть пря удемсэнзэ зяро жо пелькст, зняро ведьсэ ды мода лангсо эриця ракшатнеде, ансяк метьказонть удемензэ седе келейть. Покшт сонзэ удемень полушариянзо.

Метьказонть рунго кедезэ вельтязь роговой лукшкесэ, секс сонзэ пачк метьказось ёжо а мари. Ежонь мариця органокс метьказонтень ашти сонзэ кавтов явозь келезэ.

Те кельсэнть метьказось щупи предметтнэнь эйсэ. Кулсономань органонзо метьказонть ведьсэ ды мода лангсо эриця ракшатнень коряс седе вадрят. Сонзэ барабанной перепонказо ашти аволь прянть лангсо, а ламодо седе потсо (сонзэ ули пиле раковинань кондямозо). Куншкасо пилезэ истямо жо, кодамо ведьсэ ды мода лангсо эриця ракшатнень: евстахиевои трубка вельде сон истя жо васодстезь кирга паренть марто, сонзэ ули кулсономань ловажинезэ, но потмозо теезь а ламодо лиякс. Кулсономань пузырнестэнть лисезь отростка. Сонзэ эйсэ ашти кулсонома нерванть пезэ. Те отросткадонть мерить улитка.

Раштамозо

Калтнэ, ведьсэ ды мода лангсо эриця ракшатне эсь алост эйсэ чачтыть ведьсэ. Метказтнэ лиякс. Метьказтнэнь раштомась моли аваканть потсо яйцеводтнэсэ. Те эрьва кинень чаркодеви: метьказось — мода лангсо эриця ракша. Бути метьказонть лисевельть апак плодыявт алнэнзэ ушов, сынь бу коськевельть ды ёмавольть. Яйцеводтнэнь потсо неть раштазь алнэтне васня вельтявить ашо слойсэ, кодамо саразонь ал ашось, мейле калгодо кедень кондямо лукшсо. Теде мейле метьказ авакась сынст путсынзе чувар лангс, истямо таркас, козонь токи чи валдо. Метьказ авакась путни 5—8 алт. Лисевксэсь (зародышесь) карми касомо алонть потсо. Ярсамопельксэнь веществат саи теке жо алстонть: ал лукшонть потсо лисевксэсь карми касомо истя жо, кода касы пакареесь. Шкань ютазь алонть потсто лиси од метьказнэ, кона ансяк седе вишкине покш метьказтнэнь коряс.

Кода эри метьказось

Метьказтнэ — сывельде ярсыця, сынь ярсыть вишка ракшадо, сех пек шанжавксовт. Сынь пек бойкасто ардтнить сынст мельга. Теньсэ сыненст лезды пулост ды кенжтнэ, конатнень эйсэ сынь недякшныть модантень ды кевтненень. Нё кенжтнэ лездыть метьказонтень крута чирева кузнеме. Ярсамо пеленть метьказось кундасы пейнесэнзэ, конат озавтнезь пей ловажанть крайга.

Кундындерясак ардыця метьказонть пуло пенензэ, сон пулонзо каясы, оргоди пуло певтеме. Мейле те пулось касы одов.

Истя метьказось оргоди ятонть эйстэ эсь прянзо калечазь. Кулозь метьказонть пек стака сеземс пулонзо. Жив нетьказось теи тень эсензэ пулонь мышцанзо эйсэ виевстэ таргазь, конат сезьсызь конаяк лавшо каряз ловажанть. Тень эйсэ метьказось теи аволь эжосонзо: эсь прянзо эйсэ калечи метьказось сестэяк, бути керямс сонзэ пря удемензэ.

Истя пулост эйсэ кайсить ламо ракшат, конатнень лангс каяви ятось. Минек леень ракатне истя кайсить эсь клешняст эйсэ.

Кодат метьказт эрсить СССР-сэ

Кирнявтниця метьказтнэде башка минек пелеве ёнга вастневить живстэ левксыиця метъказт, обед ёнга — пиже метьказт. Живстэ левксэнь левксыиця метьказось алнэсэнзэ касты левксэнзэ эйсэ яйцеводтнэсэ зярс, знярдо касы зародышесь. Алтнэнь эйсэ сон путы ансяк сестэ, зярдо потстост кармить лисеме од метьказт. Истят метьказт эрить ансяк якшамо таркава, косо а саты чилембесь алтнэнь эждемс. Азиянть обед ёнксонь пустыняванзо эрить эрьва кодат метьказт. Конат-конат эйстэст пек покшт. Узбекистансо ды Туркменистансо эрить варант, конатнень кувал — мост эрсить омбоце пель метрашка. Сынь ярсыть насекомойде, вишка ёзмолдыця животнойде ды вишка звернеде.

Минек таркава улить метьказт, конатнень арасть пильгест. Истямокс ловсызь веретенницанть, эли медяницанть. Лангс ванозь сон моли гуень пелев, яла теке овсе аволь зыянов. Обед ёнга Крымсэ ды Кавказсо эри малав метрань кувалмсо пильгевтеме оволь зыянов метьказ желтопузик, конань улить отросткань кондят удалсе пильгинензэ.

Классификациясь

Метьказонь отрядалксонть 6 инфраотрядт 37 семия марто :

• Инфраотрядось Игуананьчачонь
  • Семиясь Agamidae
  • Семиясь Chamaeleonidae —Хамелеонт
  • Семиясь Corytophanidae
  • Семиясь Crotaphytidae — Киргаксонь игуант
  • Семиясь Dactyloidae
  • Семиясь Hoplocercidae
  • Семиясь Iguanidae — Игуанонь
  • Семиясь Leiocephalidae — Маскань игуанат
  • Семиясь Leiosauridae
  • Семиясь Liolaemidae
  • Семиясь Opluridae
  • Семиясь Phrynosomatidae
  • Семиясь Polychrotidae — Анолисэнь
  • Семиясь Tropiduridae
• Инфраотрядось Gekkota — Геккононькондямот
  • Семиясь Gekkonidae — Геккононь
  • Семиясь Carphodactylidae
  • Семиясь Diplodactylidae
  • Семиясь Eublepharidae — Эублефаронь
  • Семиясь Phyllodactylidae
  • Семиясь Sphaerodactylidae
  • Семиясь Pygopodidae — Лукшпильгть
• Инфраотрядось Scincomorpha — Сцинконьконлямот
  • Семиясь Cordylidae — Каркспулот
  • Семиясь Gerrhosauridae — Геррозаврат
  • Семиясь Gymnophthalmidae
  • Семиясь Teiidae — Тейидат
  • Семиясь Lacertidae — Алкуксонь метьказт
  • Семиясь Scincidae — Сцинкондят
  • Семиясь Xantusiidae — Вень метьказт
• Инфраотрядось Diploglossa — Штеренькондямот
  • Семиясь Anguidae — Штереницят
  • Семиясь Anniellidae Пильгевтеме метьказт
  • Семиясь Xenosauridae — Ксенозаврат
• Инфраотрядось Dibamia
  • Семиясь Dibamidae — Суксоньконьдямо метьказт
• Инфраотрядось Varanoidea Вараноньчачо
  • Семиясь Helodermatidae — Ядоньпейть
  • Семиясь Lanthanotidae — Пелевтеме варант
  • Семиясь Varanidae — Варант
  • Семиясь (ёмась-кулось) Mosasauridae — Мозазаврат
• Семиянть лангсо Shinisauroidea
  • Семиясь Shinisauridae

Сёрм.

• Зоология: средней школань 6-7 классо тонавтнема книга. Омбоце нолдавкс, витнезь. Сёрмадызэть Цузмер, М. Я. Эрзякс сёрмадызе Ф. М. Чесноков. РСФСР Наркомпроссо кемекстазь тонавтнема книганть эрзякс сёрмадовксонзо кемекстызе МАССР Наркомпросось. Москов: Педагогикань ды тонавтома книгань государствань издательствась, 1935 (эрз.)