Ломанень прават — прават, конатне улить ломаньсэнть, ды конатневтеме сон а эряви кода биосоциодуховной существа; государствасо эрямосонть формальнойстэ ды закононь вельде кемекстазь[2][3].

Ломанень прават
Артовкс
Хештег StandUp4HumanRights[1]
Код WordLift data.thenextweb.com/tnw/…
Commons-logo.svg Ломанень прават

Вейсэндязь Раськетнень Организациянь ЯволавтомасьВитнемс-петнемс

Ломанень праватнень коряс Весень-вейсэнь яволавтомась (примазь ВРО Генеральной Ассамблеянь колмоце сессиянь 1948 и. декабрянь 10 чистэ 217 А (III) резолюциясонть)


Преамбулась

Сенень мелень явозь, олячись, вейкетьксчись ды весе мастортнэсэ торпингевтеме эрямось аштить масторлангонь ломанень кудораськесэнть эрьва эрицянзо туртов каштанчинь, сынст вейкетьксчинь ды а нельгевикс праваст улемань юрокс; ды сенень мелень явозь, ломанень праватнень мезекскак а ловомаст ды пильге алов чалгсемаст пачтясть варваронь коень тевтнес, конат молить масторлангонь весе ломантнень мелест-арсемаст каршо, ды истямо мирэнь-эрямонь теемась, конанть пингстэ ломантнень карми улеме олячист валонь ды вановтост-кемемаст коряс ды сынь кармить олят пелемадо ды нужачиде, мезесь яволявтозь ломантнень сехте покш бажамокс; ды сенень мелень явозь, ломанень праватне эрявить ванстомс закононь вийсэ, ломанентень, прок эсь прянь идемань меельце тев, илязо саво стямс тираниянть ды лепштямонзо каршо; ды сенень мелень явозь, эряви лездамс раськетнень ютксо ялгаксчинь кемекстамосонть; ды сенень мелень явозь, Вейсэндязь Раськетнень нациятне Уставсонть кемекстызь ломанень сехте покш праватненень кемемаст, ломанень личностенть каштанчинзэ ды питнейчинзэ, цёратнень ды аватнень вейкеть праваст ды арсизь-путызь седе покш олячисэ улемстэ лездамс эрямонть паролгавтомасо ды социальной икелев молемасо-прогрессэ; ды сенень мелень явозь, эсь лангс саезь алтамотнень педе-пес топавтомасонть неть праватнень ды олячитнень эрявиксчист коряс весень-вейсэнь чарькодеманть пек покш смустезэ, Генеральной Ассамблеясь яволявты ломанень праватнень коряс те Весень-вейсэнь яволавтоманть истямо тевекс, конанть топавтомо бажаст весе раськетне ды весе государстватне сень кисэ, эрьва ломанесь ды ломаньюктонь эрьва органось, те Яволавтоманть мельсэ свал кирдезь, сёрмас содамонть ды тонавтоманть вельде бажавольть-лездавольть неть праватнень ды олячитнень арнеме ды сынст топавтомо эрьва нациянь ды раськеютконь икелев ветиця мероприятиятнень пингстэ, весе вейсэ сынст покш эрявиксчист ловозь ды тевс нолдазь кода государстватнень — Организацияс совийтнень раськест ютксо, истя жо сынст юрисдикцияст ало территориятнесэ эриця раськетнень ютксояк.


1 статьясь

Весе ломантне чачить олякс ды правасост весе вейкетекс. Сынст улить превест-чарьксчист ды визькстэ чарькодемаст, вейке-вейкень коряс прясь тенст ветяма братонь ёжо марто.

2 статьясь

Эрьва ломанентень максовить весе праватне ды весе олячитне, конат яволявтозь те Яволавтомасонть, а нолдавить кодаткак явовомат расань, киськень тюсонь, цёракс эли авакс улемань, келень, пазнэнь кемемань, политикань эли кодаткак лия вановттнэнь кувалма, ломаньютксонть кодамо-бути социальной пелькссэ эли кодамояк сословиясо улемань, национальностень, парочинь эли мезеньгак лиянь коряс. Теде башка, а нолдавить кодаткак явовомат ломаненть масторонзо эли эрямо тарканзо политикань, правань эли мирсэнть статусонзо кувалма, сень лангс апак вано, кодамо те территориясь: кинь эйстэяк а аштиця, лездамонь саиця, аволь эсензэ власть марто эли кодаяк лиякс киртязь суверенитет марто.

3 статьясь

Эрьва ломаненть ули правазо эрямос, олячис ды кинь эйстэяк а аштиця эсь прянь кирдемас.

4 статьясь

Киненьгак а улема урексчисэ эли вийсэ кирдевиксэкс; урексчись ды урень микшнемась-рамсемась кардавить, кодамо парцунсо илязт уле.

5 статьясь

Киньгак кувалма а мереви ютавтомс нарьгамот-пыткат, кандовомс тензэ казямосто, прок а ломанненьгак эли пачтямс майсевтемас, конат чалгсевельть бу пильге алов ломанень ёжонзо ды ломанекс прянь марямонзо.

6 статьясь

Эрьва ломаненть, косо илязо уле, кадови правань коряс субъектэкс лововомазо.

7 статьясь

Весе ломантне закононть икеле вейкеть ды весень, лиятнеде мейсэяк апак явово, ули праваст законсонть вейкетьстэ ванстомантень. Весе ломантнень ули праваст вейкетьстэ ванстовомс куш кодамо дискриминациядо, кона колы те Яволавтоманть, ды истямо дискриминацияс жигардомадонть.

8 статьясь

Эрьва ломаненть ули правазо эсензэ колазь сехте покш праватнень, конатне максозь тензэ Конституциясо эли законсо, компетенция марто национальной судтнэсэ мекев велявтомантень.

9 статьясь

Киньгак а мереви тувталтомо арестовамс, вийсэ косо-бути кирдемс эли панемс эрямо таркастонзо.

10 статьясь

Эрьва ломаненть, праванзо ды эрявиксчинь тевензэ аравтоманть кисэ, кода уголовной чумондомсто видечинть кемекстамонь кисэяк, ули правазо, весе марто вейкеть юрсо, ломань сельме икеле, кидеяк а аштиця ды кинь лангскак а ваныця, видечинь весе вешематнень топавтыця судсо тевензэ ванкшномантень.

11 статьясь

1. Эрьва ломаненть, кона чумондови преступлениянь теемасо, ули правазо лововомс а чумокс се шкас, зярс чумочизэ а кемекстави закононь лувсо судсо ломань пингстэ ванкшномасо, конань шкасто сонензэ максови весеме ёндо прянь идемань олячи. 2. Кияк а чумондови преступлениянь кисэ, конанть пингстэ мезе-бути теевсь эли, мекевлангт, эзь тееве, ды мезесь се шкастонть эзь ловово преступлениякс раськень эли раськеютконь правань коряс. Истя жо а максови наказамо седе стака сень коряс, кодамо сон ульнекшнесь преступлениянь теема шкастонть.

12 статьясь

Киненьгак тувталтомо а эцнема ломаненть кода сонсензэ, истя семиясо эрямозонзо, тувталтомо, ансяк кинь-бути эсензэ мелензэ коряс вийсэ эцнемс эрямо тарказонзо, коламс корреспонденциянзо салавачинть эли чалгсемс ванькс паро лемензэ. Эрьва ломаненть ули правазо закононть пельде вешемс идема истят эцнематнеде ды колсематнеде.


13 статьясь

1. Эрьва ломаненть ули правазо олясто кочкамс эстензэ эрямо тарка ды полавтомс сонзэ эрьва государствасонть. 2. Эрьва ломаненть ули правазо кадномс куш кодамо масторонть, сень ютксо эсензэнтькак, ды мурдакшномс эсь масторов.

14 статьясь

1. Эрьва ломаненть ули правазо мельганзо эрьва кодат пансематнеде вешнемс прянь идема лия мастортнэсэ ды ванстомс прясь муезь таркасонть. 2. Те правась а максови, бути мельганзо пансема юрсонть ашти аволь политикань коряс преступления эли тев, кона моли Вейсэндязь Раськетнень Организациянть лувонзо-коензэ каршо.

15 статьясь

1. Эрьва ломаненть ули гражданствас правазо. 2. Кинь кедьстэяк мельтемензэ а нельгеви гражданствазо эли гражданстванзо полавтома правась.

16 статьясь

1. Цёратненень ды аватненень, кинь топодсть тень туртов иест, арасть кодаткак кардамот полаямонь ды эсест семиянь теемань праваст коряс расань, национальностень эли пазнэнь кемемань кувалма. Сынст вейкеть праваст урьвакстомсто-мирденень лисемстэяк, полакс улема шкастонтькак ды полаксчистэ явомстояк. 2. Урьвакстомась-мирденень лисемась кемекстави, ансяк бути теденть эсь олясо ды эсь мельсэ яволявтыть кавонест полаиця ёнкстнэ. 3. Семиясь эрямосонть ашти ломаньютконть юронзо теиця кеме пелькскекс ды сонзэ ули ломаньютконть ды государстванть пельде идемань вешемс правазо.

17 статьясь

1. Эрьва ломаненть ули правазо кода эсензэ ськамонзо парочис, истя жо лиятнень марто вейсэнь парочискак. 2. Киньгак парочизэ а саеви сонзэ мельтемензэ.

18 статьясь

Эрьва ломаненть ули правазо эсь арсемань-вановтонь, прянь ветямонь ды пазнэнь кемемань олячис; те правантень совить пазнэнь эсь кемемань, вановтонь ды эсь религиянь кода ськамонзо, истя лиятнень марто вейсэ полавтомань коряс олячись, пазнэнь кемемадонзо эли вановттонзо кода ськамонзо, истя лиятнень марто вейсэ ёвтнемань-тонавтомань олячись, пазнэнь кемемань лувтнень ды койтнень-кирдатнень ськамонзо эли ломань икеле топавтомаст олячись.

19 статьясь

Эрьва ломаненть ули правазо эсензэ вановтонзо коряс олячис ды олясто сынст ёвтамос; те правантень сови эсь вановтонзо коряс кинь ёндояк апак карда эрямось ды государствань границятнень лангс апак вано информациянь ды идеянь куш кодамо парцунсо вешнемань, муемань ды максомань олячись.

20 статьясь

1. Эрьва ломаненть ули правазо мирной промксос ды ассоциацияс. 2. Киньгак а мереви вийсэ совавтомс кодамо-бути ассоциацияс.

21 статьясь

1. Эрьва ломаненть ули правазо ветямс эсь масторонь тевтнень эли эстензэ, эли тень туртов олясто кочказтнень вельде. 2. Эрьва ломаненть ули, лиятнень марто вейкеть, эсь масторсо государствань службас нолдамонтень правазо. 3. Раськенть мелезэ ашти правительстванть властензэ юрсо; те мелесь ливтеви лангс манчемавтомо кочкамотнесэ, конат ютавтовить весень-вейсэнь ды вейкеть кочкамонь праванть лувсо вайгелень салавань максомань эли тень кондямо парцун вельде олясто ютавтовикс кочкамотнень шкасто.

22 статьясь

Эрьва ломаненть, прок ломаньюткос сови ломанень, ули правазо социальной лезксэс, каштанчинзэ ванстомань ды эйсэнзэ личностенть олясто кастомань туртов праванзо экономикань, социальной ды культурань ёнкстнэсэ национальной вийтнень ды раськеютконь вейсэнь тевтнень вельде ды эрьва государстванть аравтозь эрямо лувонзо ды сюпавчинзэ вельде.

23 статьясь

1. Эрьва ломаненть ули правазо важодемас, важодема тевень олясто кочкамос, весенень вейкеть-видеть, шумбрачинтень зыянонь а кандыця важодема тарка ды важодемавтомо кадовомадо ванстома. 2. Эрьва ломаненть, кодамояк дискриминациявтомо, ули правазо вейкеть тевтнень кисэ вейке секе покшолмасо пандомантень. 3. Эрьва важодицянть ули правазо истямо виде ды сатышка пандомас, кона максоволь бу ломанентень кажовтомо эрямо кода эстензэ, истя семиянстэньгак, ды кона, бути те эряви, топавтоволь социальной лезксэнь лия пандоматнесэ. 4. Эрьва ломаненть ули правазо теемс-пурнамс профессиянь коряс вейсэндявкст ды совсемс профессиянь коряс истят вейсэндявкстнэс эсензэ эрьва кодат бажамонзо-мелензэ ванстомань кисэ.

24 статьясь

Эрьва ломаненть ули правазо оймсемас ды оймсема шканть эсь мелензэ коряс ютавтомас, те правантень совавтовить важодема чинть икелепелев аравтозь кувалмозо ды аравтозь ламочисэ максовиця оймсемань оля читне, конатнень кисэ истя жо пандови.

25 статьясь

1. Эрьва ломаненть ули правазо эрямосонзо истямо эрьва мезень сатышкачис, сень ютксо ярсамопелень, оршамопелень, эрямо таркань, медицинань ды социальной лездамонь, конатась сатоволь бу эсензэ ды семиянзо шумбрачинть ды уликсчинть ванстомас, ды истя жо ули правазо лездамос важодема таркавтомо кадовомсто, сэредема шкасто, инвалидэкс теевемстэ, довакс кадовомсто, сыредезь-маштозь улемстэ эли ломаненть эйстэ а аштиця лия кодамояк лисезь апак учонь апаро тевтнень кувалма эрямонь туртов ярмактомо кадовома шкастонть. 2. Аваксчись ды эйкакшчись максыть права сыненст башка мелень явомас ды лезксэнь максомас. Весе эйкакштненень, конат чачозь полаязь тетяст-аваст марто семиясо эли апак полая семиясо, социальной лезксэсь ды ванстомась максовить вейкетьстэ.

26 статьясь

1. Эрьва ломаненть ули тонавтнемас правазо. Тонавтнемантень улема питневтемекс, седеяк пек бути те ушодксонь ды общей школасо тонавтнемась. Ушодксонь тонавтнемась яволявтови весенень, эйстэнзэ киньгак апак яво. Техникань ды профессиянь коряс тонавтнемань кинтень улема панжадокс весенень вейкетьстэ, ды тёкш школасо тонавтнемантеньгак улема-аштема весенень вейкетекс, эрьванть эсензэ превензэ-ёроконзо юрсо. 2. Тонавтнемантень улема аравтозекс ломанень личностенть кода седе домкасто кастомантень-панжомантень, ломанень праватнень ды олячитнень арнемаст покшолгавтомантень. Тонавтоманть вельде кастовозо весе раськетнень, расатнень ды пазнэнь кемицянь вейсэндявкстнэнь ютксо вейке-вейкень чарькодемась, коронь кирдемась ды торпингевтеме эрямонь коряс Вейсэндязь Раськетнень Организациянть тевсэнзэ лездамось. 3. Тетятнень-аватнень ули праваст эстест кочкамс вишка эйкакшост туртов тонавтнемань парцунонть.

27 статьясь

1. Эрьва ломаненть ули правазо эсь олясо явомс мель ломаньютксонть культурань эрямонтень, искусствантень, путомс вий науканть седе тов кастомасонзо ды нолдамс тевс сонзэ лезэвчитнень. 2. Эрьва ломаненть ули правазо ванстомс моральной ды материальной питнечинзэ, конат аштить цётавксокс наукань, литературань эли художественной важодевкстнэсэ, конатнень авторост сон.

28 статьясь

Эрьва ломаненть ули правазо социальной ды раськеютконь эрямонь истямо лувс, конанть пингстэ те Яволавтомасонть ёвтазь праватне ды олячитне топавтовить допрок.

29 статьясь

1. Эрьва ломаненть улить эсензэ эрявикс топавтома тевензэ ломаньютконть икеле, конасонть домкасто ды весеме ёндо олясто панжовияк сонзэ личностезэ. 2. Эсензэ праватнень ды олячитнень топавтомсто эрьва ломаненть икелев аравтовить ансяк истят кардамот, конат тешкстазь законсонть лиятнень праваст ды олячист ванстоманть ды арнеманть кисэ, демократиянь лувсо эриця ломаньютконть моралень ды вейсэнь-паро лувсо эрямонь вешематнень топавтомаст кисэ. 3. Неть праватнень ды олячитнень топавтомаст зярдояк ды мейсэяк илязо моле Вейсэндязь Раськетнень Организациянть икелепелев арсезь-аравтозь тевензэ ды принципензэ каршо.

30 статьясь

Те Яволавтомасонть весе ёвтазенть эйстэ мезеськак илязо чарькодеве-толковаво, прок кодамо-бути государстванень, зяро-бути ломаннень эли вейке башка ломаннень максови права топавтомс истят тевть, конатне аравтозь те Яволавтомасонть ёвтазь праватнень ды олячитнень истожамос.


Вн. истяжоВитнемс-петнемс

ЛисьмапрятВитнемс-петнемс