Кечказсо

Кечказсо — эрзянь пакшатнень телень ды кизэнь чыйнема-чарамо налксемась.

Налксицятнеде 9 — 15 иесэ цёрынеть. Умонь шкане «Кечказсо» налксильть ансяк тельня. Ансяк сестэ понгиль эрявикс кедьёнксось, телень эйпоколь эли алашань шояк (кельмезь навоз). Неень шкане те налксемась икельценть коряс лиякстомсь. Сонзэ эйсэ арасть сеть эшксематне, конат теить томбавкст налксицятненень. Ней налксить эйсэнзэ тельняяк, кизнаяк.

Налксемань кедьёнкстнэ

1. Нурькинестэ мендязь пе марто чувтонь цётмарт (налксицятнень ламочисэ). 2. Эльницянь цётмар, мендязь пезэ седе кувака. Песь кавто ёндо ацазь ватасо эли поролонсо ды тапарязь нардев коцтсо. 3. Моцюдалкссо эцезь коцтонь оска. Моли резинань оскаськак.

Налксемань кой-кирдатне

Налксема паксясонть черькстави кирькс (истя жо, кода «Бабань киресэ» налксемасонть). Кирьксэнть лангс чувновить а покш латкинеть-варят (налксицянь ламочисэ, эльницядонть башка). Покш кирьксэнть куншкас тееви а покш кирькске. Эльницясь кочкави истя жо, кода «Рузонь кока» налксемасонть: весе ёртнесызь эсь цётмарост лавтовонь трокс удалов. Конань цётмарозо пры сехте малас, се карми эльницякс. Эльницянть мелезэ — токамс киньгак пильге ланга. Налксемась ушодови пакся куншкасто. Оскась путови вишка кирькскентень, мейле, эрьва кодамо ёжовчисэ ды манчезь, терявтомс ютавтомс «Ванькс оска», лиякс меремс, эшкемс оскасонть киньгак пильге ланга. «Ванькс оскась» — те истямо пильге ланга каямо, зярдо налксицясь эсь цётмарсонзо а кенери тееме каршо эшкема эльницянть каршо. «Ванькс осканть» панемадонзо мейле эльницясь кепедьсы верев цётмаронзо ды серьгеди волшебной вал: «Чикалай!». Тень теезь, эльницясь ары налксицянть таркас. Бути эльницясь эшксы налксицянть оскасонть, а тонась эрязасто эшксы осканть каршонзо, сестэ эльницясь а полавтови ды налксемась карми молеме седе тов. Налксицятне ванстыть пряст осканть эйстэ кода маштыть: эшксить эйсэнзэ цётмарсонть, кирнявтнить эйстэнзэ верев, те-тона ёнов. Ансяк а эряви стувтнемс вейкенть: бути кадсызь латкинест мик а куватьс, эльницясь капшазеви арамс тарказост эли стявтомс латкинезэст эсь цётмаронзо, мезесь невти: латкинесь саезь. Налксиця ялгаст идеме лиснить лиятнеяк. Лиясто мик зярыянест. Ансяк стувтнемс те шкане латкинедест налксицятненень а эряви. Эльницясь совси налксицятнень юткс эрьва ёндо: удалдо, боксто, икельде. Секс эрьвантень савкшны велямс латкинест перька кирьксэкс. Эряви ваномс сень мельга, штобу цётмартнэсэ тейнемс ансяк нолаштозь мастор малава эшксемат. А мереви тейнемс цётмарсонть верде алов келейстэ яхмат — те вети томбавомас. Налксемась моли путозь шканть самс.

Сёрм.:

Брыжинский Василий Сергеевич 2002: Сиянь рисьминеть. Мордовской книжной издательствась. Лл.28-29.