Кемень меремат

Кемень меремат (Кеменьвал, ансяк Пазонь Кой) (ивр. עשרת הדברות, «асерет-ха-диброт» — кемень ёвтамот; кез.-грек. δέκα λόγοι, «декалог» — кеменьвал) — те кемень сех покш койть, кона, Ветеконёвксонь коряс, сонсь Паз макссь Мисейнень Израилень цёра ютксо Синай-пандосо Египетстэ лисемадо мейле ведьгеменце чисэ. Библиянь коряс, максомань шкасо Синай-пандо ульсь толсо ды качамосо, мода тарнось, зэрнесь пурьгине ды кившкадсть ёндолт. Пурьгине опавтомсто, Паз ёвтсь сонзэ меремат ды мейле сёрмадсь кемень валт кавто кевлазт лангсо. Ниленьгемень чиде мейле Мисей валгсь пандосто ды нейсь, мезе Пазонть стувтозь раськесь кишти Сырне ваз перька, кежиявтсь ды порксась кевлазт. Весе раськень витемадо мейле, Паз теевтсь кевлазт Кемень меремань од сёрмадомань туртов.