Втулкин, Михаил Алексеевич
Втулкинэнь Михаил Алексеевич ( 1929 эйзюрковонь 24 чи Самарань ёнкссо Дунаевка велесэ — 1991 умарьковонь 16 чи Саранскойсэ ) — эрзянь[1] валморонь ладсийть[2], куляньсёрмадей, сёрмадей.
| Михаил Втулкин | |
|---|---|
| чачома лем | Михаил Алексеевич Втулкин |
| чачома чись | эйзюрковонь 24 чи 1929 (95 иеть) |
| Чачома тарка | |
| Кулома чись | умарьковонь 16 чи 1991 (62 иеть) |
| Кулома тарка | |
| Мастор | |
| Важодема ёрокчизе | сёрмадей |
| Тетязо | Втулкин Алексей Гаврилович |
| Авазо | Втулкина Анна Нефедовна |
Эстэдензэ
витнемсЧачсь 1929 иень эйзюрковонь 24 чистэ Дунаевка велесэ Похвистневань буэсе Самарань ёнкссо. Сисем иесэ цёрынесь кадовсь тетявтомо. Тетязо, Алексей Гаврилович, ульнесь ламонь содыця ломань — важодсь бухгалтерэкс, авазо, Анна Нефедовна, чарась-велясь кудоютконь тевтнесэ. Втулкинтнэнь ульнесть ниле эйкакшост. Миша ульнесь меельцесь. Эрясть Самара ёнксонь Покш Толкан велень Дунаёвка велинесэнть. Ней те велиненть юртозояк эзь кадово. Ялатеке валморозеенть оймесь свал тердсь чачома таркантень. Зярдо прыль ютко шка, Михаил Алексеевич сыль тей, пульзиль латконь икелев, косо зярдо-бути ульнесь чачома кудозо, паласы моданть, ды сельведензэ поцерьсэ туильть чамаванзо. Велинесь вишкинель, вейке ульцясоль. Сестэ тосо ульнесь школаяк. Тесэ ушодсь тонавтнеме Миша Втулкин. Мейле сисем иень школав якась Яблоновкав. Мольсь война, Мишань ялганзо ниле классонь прядомадо мейле лоткасть тонавтнеме. Миша прядсь сисем класст. Мейле сась Покш Толканонь педтехникумов, конань прядызе 1948 иестэ.
Валморонь ловнома ёрокчись
витнемсКортыть, эрьва ломаненть морозо чачи мартонзо. Паряк, те алкукс истя: Михаил Алексеевич моронь морамо кармась ниле иесэ. Сестэ лелязо тонавтнесь школасо ды кандтнесь тосто мазый книгинеть. Ловнось сынст марямга. Куроксто Мишаньгак пря потс совиль ловнозесь. Цёрынесь кармась содамост «Муха-Цокотуха», «Диван-Чемодан» стихсэ сёрмадозь ёвкстнэнь. Миша сынст кармась ловномост шабрань атятненень-сырькайтненень. Весе дивсесть: кодамо вишка цёрынесь ды кодат кувакат моронзо.
Сехте куроксто чарькодсь моронть тевс нолдамо завхозось А. А. Радаев. Вейке маней валскене сон алашасо ардсь Втулкинтнэнь кудонть ваксс ды серьгедсь:
— Эй, моронь морыця, ёвксонь ладсиця! Оршак ашо панар, ардтнетяно паксяв, лобогрейкасо ледицятнень оймавтсынек!
Велень ломантнень икеле Миша ловнось валморот, морась эрзянь морынеть. Весе тензэ цяпасть... Мейле Миша стихень ловномо якась буень олимпиадав, мейле ёнксонь-областевгак.
Косто саевсь моротнес бажамось? Истямо кевкстема макснесь М. А. Втулкин эсь пиянтеньгак. Сонсь прыль виде арсемас: весемеде покш лезэ тесэ кандсь сонзэ сырькаезэ Екатерина Еремеевна Пыряева. Втулкинэнь валонзо коряс те ульнесь певтеме лисьмапря, косто Миша эйкакш шкасто саезь кармась симеме эрзянь ёвксонь тантей веденть. Кода мейле поэтэсь чарькодсь, Екатерина Еремеевна ульнесь алкуксонь эрзянь ава: превей, важов, видечинь вечкиця, чевте седей. Зяро ёвкст, морот, лайшемат сон содыль! Мейле Михаил Алексеевич сынст ёвтнинзе содавикс писателентень В. К. Радаевнень. Сон сынст совавтынзе кезэрень ёвтамот сборникентень.
Втулкин вечксь сцена лангсо валморонь ловномо. Те тевенть эзизе кадно армиясо служамстояк. Мейле эрзянь цёрась тонавтнесь Саратовасо юристэкс, филологокс. Сёрмадомасо сонензэ покш лезэ макссь В. К. Радаев. Сон мерсь тензэ:
«Кадык, цёра, рузонь кельсэ сёрмадомат ды ушодыка эрзякс».
Те превс путомась ульнесь М. А. Втулкинэнь туртов пек питнеекс. Зярдо сон ушодсь сёрмадомо эрзякс, чарькодсь: окойники, муевсь, мезе вешнесь, муевсь тензэ эрямонь кизэ. Кись валморозеенть а шождынель. Сонзэ стяконь кисэ покордакшнызь. Истямо шкасто кадовкшнось лездыцявтомо, ськамонзо. Домкасто, кежень апак невтне панжи сёрмадыцясь минек сэретьксэнть, сардонть, кона пезнась кой-кона эрзятнень обуцяс: сонзэ эряви таргамс ды седе курок стувтомс. Вана те валморось:
Бутрав эрькес татар ваясь,
Татар тензэ жердя каясь,
Лиссь татарось, мерсь: «Рахмет».
Чуваж мольсь пиземе алга,
Нолаштсь — прась...
Ды чуваж ялгась
Венстясь тензэ лесксэнь кедь.
Вана вейке эрзянть «ватксить»,
Ниленьгемень лият раксить,
Цяхи Яхим, цяхи Устя:
«Истя тензэ, истя, истя...»
Дрига арси эцемс килькшс,
Тюма поны тензэ пикс.
Ортя, Пазонть апак стувто,
Вешни крёстокс тензэ чувто.
Валдочистэ сокортано —
Вейке-вейкенек сэвтяно.
Истя «олячисэ» эрязь,
Минек корёнонок керязь.
Шкинемазо
витнемсЛитературасо эрямонзо перть М.А. Втулкин вастневсь ламо эрзянь сёрмадыця марто. Сон вадрясто содылинзе Артур Моронь, Александр Мартыновонь, Андрей Куторкинэнь ды лиятнень. Эсензэ стихензэ лиснесть башка книгасо:
- «Сиянь пей» (руз. «Серебряный зуб», 1977 ие)
- «Сырнень шка» (руз. «Золотое время», 1981 ие)
- «Ведьбайгине» (руз. «Росинка», 1992 ие)
Лия зярыя авторонь пусмосо - 1986 иесте сонзе валморонзо совасть «Светлячок» пусмонь пурнавксос. В.К. Радаевень марто анокстась эрзянь коень ды ёвксонь пурнавкс (1977).
Сермалесь ёвтемат, баснят — «Али-баба ды ниленьгемень разбойникть» (руз. «Али-баба и сорок разбойников»), «Овтонь кежть» (руз. «Медвежья злость»), «Кши» (руз. «Хлеб»), «Няка» (руз. «Кукла») ды лият.
1991 иестэ зярыя авторонь марто нолдась «Рав лангонь богатырь» (руз. «Волжский богатырь») пусмо — эрзянь бороцицядо Боровонь Михаилдэ. М.А. Втулкин — «Эрзямас» (руз. «Арзамас») поэманть сёрмадыцязо, ды «Эрзянь ава, зоря ава» (руз. «Эрзянка, заря-женщина»), «Од таркав» (руз. «На новые места») ды лият.
1991 иень умарьковонь 16 чистэ М. А. Втулкин кулось. Калмазь Саранскойсэ.
Лисьм.:
витнемс- Эрямонь вайгель: Эрзя-мокшонь литературань антология.- Саранск. - 2001
- ↑ Время и события. 2014: библиографический указатель / Нац. б-ка им. А.С. Пушкина Респ. Мордовия; [сост. А.Н. Маланьчева]. – Саранск, 2013. – 148 с. (руз.)
- ↑ «Эрзянь Мастор», №257, САМАРА ЁНКСОНЬ СОДАВИКС ЭРЗЯТНЕ Архивировазь 13 Даволковонь 2019 иестэ.(эрз.)