Вирь сараз

Вирь сараз (лат. Lyrurus tetrix) — те покш нармунь, фазанонь семиясто (Phasianidae), эри вирень ды вирь марто степень таркатнева, Россиянь марсторгаяк.

Кизна сынь эрить семиянь-семиянь, сёксня пурнавить покш стадас. Сонзэ ланкс оцинить: кундыть петлясо, алтымасо ды леднить ружиясо. Атяка вирь саразось лира ёнов молиця пулонзо, раужо толганзо кувалт, конат сэнежат, молить читниця металл ёнов, ды якстере сельме чирькензэ кувалт пек содави аваканть эйстэ, конань лангозо аволь истямо мазый.

Авака вирь сараз

Нармунтнень «васодема шкастост»  эрси токовамост. Сестэ сынь турить, «киштить», морыть, атякатне пижнить. Вирь саразтнэ валске рана пурнавкшныть кужонть куншкас токовамо: атякась веер ладсо сравтнесы пулонзо, нолдтнесынзе сёлнонзо, венстнесы киргянзо ды моткоди выжнэзь-пижнезь.