Пештязесь нардазь Пештязесь путозь
Шкавсь-теевсь од лопа Ловнок Меельце шкасто кона-кона эрзятне ушодсть сёрмадомо соцмедиясо латиниц... марто
(Арасть явовомат)

05:21, 14 Медьковонь 2020-нть эйстэ версия

Ловнок

Меельце шкасто кона-кона эрзятне ушодсть сёрмадомо соцмедиясо латиницасо. Монень те тунь а меши, -- фольклоронь пек ламо материал пурназь латиницасо, лия масторсо, ловнан эйсэст. 1920-це ды 1930-це иетнестэ, зярдо Россиянь ломантне кундасть сёрмадомо тонавтома кинигат, школань кинигат, газетт эсест кельсэ, арсезельть од орфографият, конат седе вадрясто максовольть сёрмас а содыця раськенень тонавтнемань, касомань-кепедемань кедьёнкст. 1920-це иетнень прядовомсто -- 1930-це иетнень ушодомсто ламо вишка кельть кармасть сёрмадомо латиницасояк. Ансяк мекс-бути эрзянь кельсэ вейкеяк кинига, сёрмадовкскеяк эзь лисе арабикасо эли латиницасо – татартнэ ютасть арабикасто латиницас ды мейле кириллицас.

Библиянь Од Вейсэньлувозо лиссь васенцеде 1820-це иетнестэ – 1821 Ёнкулясь ды 1827 лиядыксэсь – кириллицасо. Зярдо 1880-це иетнестэ нолдасть зярыя кинигат ломанень эрямопингеде, фольклорсо литература, сёрмадсть весе кириллацасо – малав теке кириллицань орфографиясо, конаньсэ 50 иеде мейле (1930-це иетнестэ) мольсь эрзянь келенть популаризациязо-популарнойкстомтомазо. Лиякс меремс, аволь 1930-иетнестэ арсизь эрзянь сёрмадома лувонть, пель пингеде икеле (1880-це иетнестэ) кемекстазель вишка ломанькуронь туртов чарькодевикс лув.

1910-це иестэ, зярдо Шахматов нолдызе эрзянь кортавксонь покштояк покш пурнавксонзо, авторось вешнесь мейсэ келень ёнксонзо мазыйстэ, куратнойстэ невтемс – нолдась тевс лиясто диакритика марто латиница лиясто ташто кириллицаяк. Эрзянь келесь совась вийс ды ёртовсть ве ёнов ташто тексттнэсэ вастневицятне: џ, ѣ, ҥ, ѕ, ў, є, ѷ, ѵ, ѳ, ӓ... Латиницасо сёрмадоманть кутьмерьс сёлмот эзть касо. 1930-иетнес молемс од сёрмадыцятнеяк кармасть сёрмадомо малав теке лувсо кода и 1880-це иетнестэ.

Мезекс, мерят, мон теде сёрмадан. Малав 200 иень перть пурнавсь эрзянь келень литературань тонадкст, лув. Пурнындерясынек весе те материалонть вейс, ламо карми улеме мезде ловномс. Секскак ушодынь ламо иеде икеле эрзятнень марто Википедияс сёрмадомо (https://myv.wikipedia.org/ «myv» те теке эрянь велесь Мывало). Википедияс сёрмадомась киненьгак ярмак кудос а канды, те ансяк паро арсема-бажамо кепедемс-кастомс эрзянь кельсэ содамочинть весенень. Проектсэ кото тёжадо ламо сёрмадовкст, арсетяно седе тов кастомс эйсэнзэ, ды секскак тердтяно эрзянь ломанть совамо минек юткс, сёрмадомо, вадрялгавтомо минеккак сёрмадовкстнэнь. Ансяк вейке энялдомам ули, сёрмадодо эрзянь мазы чарькодевикс кельсэ-лувсо: Лезэ кандодо кириллицасо, илинк калавто а берянь те медиянть соцмедиянь латиницасо.

Улить эрзянь келень сёрмадома лувонь витнема-петнема программат (http://divvun.org/proofing/proofing.html ) ды косо сёрмадомс эрзякскак (https://ru.libreoffice.org/), эрявиндеряйть. Кавксошка ие уш кастан-кепедян эрзянь келень сёрмадома лувонь программа. Ули клавиатураяк, косто муевить эрзянь ташто сёрмадовкстнэсэ буквинетькак.

Rueter (кортнема) 05:21, 14 Медьковонь 2020 (UTC)Максомс меквал