Батаевень, Павел Петрович

Павел Батаев
Павел Батаев
чачома лем	Павел Петрович Батаев
чачома чись	1915
Чачома тарка	Од Пиче, Велень эрямо тарка Клявля станциясь, Клявлянь буе Самарань ёнкссоБатаевень, Павел Петрович эли ; Бугурусланский уезд[d], Самарская губерния[d], Россиянь империясь;
Кулома чись	якшамковонь 24 чи 1942
Кулома тарка	Медынь[d], Смоленэнь ёнкс, Российянь Советэнь Федеративной Социалистической Республикась[d], Советэнь Вейсэндявкс[d];
Мастор	Советэнь Вейсэндявкс[d];
Важодема ёрокчизе	валморозей

Батаевень Павел Петрович (1915 иестэ Самарань ёнксонь Од Пиче велесэ ) — эрзянь валморонь ладсий, куляньсёрмадей^[1].

Эстедензэ

Павел Батаев чачсь сокиця-видицянь семиясо Клявлянь буень Од Пиче велесэ ^[1]^[2]. Пек рана сонзэ кулось авазо, уроз цёрынесь 9 иестэ кармась стадань ваномо. Зярдо сонензэ топодсть 12 иеть, сон тусь Московов ды тосо эйкакшнеде Советень правительствань заботань лескэнть вельде кармась тонавтнеме куншка школасо, конань прядызеть 17 иесэ. Теде мейле сон одов сась тиринь буев, ды кувать важодсь буень кулялопанть редакциясо. Тосо жо ушодсь валморонь сёрмадомо, конатнеде ламо печатазь секе кулялопасонть.

1933 иестэ Батаев сась Саранов ды кармась важодеме васня Мордовской государственной Издательствасо, мейле «Ленинэнь киява» комсомолонь кулялопасо. Кода лецтнесть вейсэважодицятьне Павел Петрович ульнесь вадряседеень, весёла ды ёжов-важововикс ломанекс, тевень топавтыцякс ды дошлоекс. Тесе сон ламо важодсь эсинзе литературной сёрмадовксонзо ланксо, вастневсь содавикс се шкасто валморозейтнень марто: Я. Григошинень, И. П. Кривошеевень, Никул Эркай. Тесэ сон сёрмадыньзе эсензэ сехте виев валморонзо.

Ульнест маштозь 1942 иень якшамковонь 24 чи Медынь ошсо^[3] Смоленэнь ёнксо.

Сёрмадовксонзо

САДСО

Течияк, истя жо, кода исяк,
Валдо-сэнь июнень сакшнось чи.
Течияк, кодак ушов тон лисят
Тантей коштось эйсэть копачи.
Течияк мазыйстэ цвети садось,
Лопасонзо цяпи укшторось.
Умаринанть ашо цветнэ срадозь –
Ашо ловокс ацазь масторось.
Зяро чувт касыть те мазый садсонть
Алкинеть, сэрейть ды кодат парт!
Ведь а стяк теезь ней сон од ладсо –
Сон оймсемань ды культурань парк.
Ведь а стяк пижелды течи маекс,
Седеяк парсте карми ванды.
Легендарной героенть Чапаень
Лемензэ мельс-паросо канды

ПАРАДСО

Варминесь эзь ойма кольнемадо,
Кутмори чевтестэ эрьвейкень.
Физкультурникень моли парадось,
Прок мерят ломань эскелькшны вейке.
Васолов парадонть эйстэ маршось
Покш изнямонь гимнакс кайсети.
Стадиононть велькска варманть каршо
Од пилот самолётонть вети.
Певтеме сэнь коштонь океанонть
Сельмензэ алмаз ладсо керить.
Парашютонть лангс кенярдозь ваннось,
Коштсонть понгавтозь конась нури.
Се сонзэ вечкевикс тейтерезэ
Менельстэнть валгомстонзо лыки.
Секс истя од пилотонть верезэ
Рунгованзо кенярдозь яки.

АРСЕМА

Минь мартот эринек вишка пингстэ,
Ве таркасо ютась одкс шканок.
Ульнинек сюлмавозь буто пинкссэ, -
Певтеме покшоль вечкеманок.
Ней ютксонок ацавозь покш тарка,
Аштить сравтозь сэрей пандт ды ведть.
Мон сынст трокс, вечкевикс оям, Варка,
Сталень нармуньсэ ливтян тонеть.
Тон, паряк, се шканть зэрни тракторот
Ветясак колхозонь паксяванть,
Ангелина Пашакс морат моро,
Кода вадрясто эри авась.

БУТИ ВАСТОМС МАРТОТ ТЕНЬ А ЛЕТИ…

Сандей ютксо шольнезь чуди леесь,
Ведьгев чаротне галакс шлёпить,
Горниповнекс кудрянзо килеенть
Нуваргадозь масторов токить.
Ашо лёмзёрокс почоды цветсэ,
Сиянь човсонзо ковось пургси.
Тундонь вармась пувси лембстэ, сэтьстэ, -
Каль тарадтнэ стамбарнэ нурсить.
Минь ванылинек лёмзёрксонть ало
Лейганть уиця ковонть сулейс.
Мон нильнинь тонь салавине валот,
Конат чудесть, буто шольни лейсь.
Тон саилить кедезэть цецине
Мельс-паросо сялгилик монь мештьс.
Ковоськак, мерят, редимизь минек,
Сонгак буто кедьстэнек тень вешсь.
Нейгак мельсэнь, кода лёмось цвети
Ды тейтерень весёла кужот.
Бути вастомскак мартот а лети, -
Вечкеманок илязо пужо.

Анкине (1934)^[4]
Карман эрямо (1934)^[5]
Ков валдоне (1933)^[6]

Сёрм.:

Келей паксят. Великой Отечественной войнасо (1941-1945 ие) чавозь эрзянь поэтнень ды писательтнень произведенисят. Пурныцязо П.Гайни Мордовской Государственной издательствась. — Саранск, 1952 128 с. — с. 99-100
Батаев, П. Валскень стязь. / П. Батаев // . - 1995.- N4

Лисьмапрят

↑ ^1,0 ^1,1 «Эрзянь Мастор», №257, САМАРА ЁНКСОНЬ СОДАВИКС ЭРЗЯТНЕ Архивировазь 13 Даволковонь 2019 иестэ.(эрз.)
↑ История Мордовии в лицах: биографический сборник, Том 1. В. С. Лунин, П. Д. Грузнов, Научно-исследовательский институт языка, литературы, истории и экономики при Совете Министров--Правительстве Республики Мордовия. Тип. "Красный Октябрь", 1994 - Всего страниц: 241 (руз.)
↑ http://www.obd-memorial.ru/html/info.htm?id=1386148 Архивировазь 4 Эйзюрковонь 2016 иестэ. ОБД Мемориал
↑ «Сятко» 5-це №, Мокшоэрзянь Государственной Издательствась, Саранск 1935. П. Батаев Анкине 41-43 лоп.(эрз.)
↑ «Сятко» 1-це №, Саранск 1935. П. Батаев Карман эрямо 25 лоп.(эрз.)
↑ «Сятко» 21-22 №, Саранск 1933, П. Батаев Ков валдоне 48 лоп.(эрз.)

[«Эрзянь_Мастор»-1] 1,0 ^1,1 «Эрзянь Мастор», №257, САМАРА ЁНКСОНЬ СОДАВИКС ЭРЗЯТНЕ Архивировазь 13 Даволковонь 2019 иестэ.(эрз.)

[История_Мордовии_в_лицах-2] История Мордовии в лицах: биографический сборник, Том 1. В. С. Лунин, П. Д. Грузнов, Научно-исследовательский институт языка, литературы, истории и экономики при Совете Министров--Правительстве Республики Мордовия. Тип. "Красный Октябрь", 1994 - Всего страниц: 241 (руз.)

[3] ttp://www.obd-memorial.ru/html/info.htm?id=1386148 Архивировазь 4 Эйзюрковонь 2016 иестэ. ОБД Мемориал

[«Сятко35»-4] «Сятко» 5-це №, Мокшоэрзянь Государственной Издательствась, Саранск 1935. П. Батаев Анкине 41-43 лоп.(эрз.)

[«Сятко35_»-5] «Сятко» 1-це №, Саранск 1935. П. Батаев Карман эрямо 25 лоп.(эрз.)

[«Сятко33_»-6] «Сятко» 21-22 №, Саранск 1933, П. Батаев Ков валдоне 48 лоп.(эрз.)

[1]

[2]

[3]

[4]

[5]

[6]