«Авань поза» ознома
Авань поза — сон сови пазпалонь коинзамонь ярсамопелекс. Анокстави ниле чис Инечиде икеле, куншкачинь чокшнэстэ.
Васенце чись (авань)
витнемсСе кудосонть косо ванстовсь атянь штатолось, кавто ават сыргить буень аватнень ванды позань човорямо тердеме. Эрьва кудосонть сыцятненень максови вейке сараз ал.
Калоньчистэ аватне пурнавить тердицятнень кудос, эрьвась туи почт ды ламбавтома (солод). Ушодови позань теемась, кирвазтеви штатолось ды сехте сыресь аватнестэ пшкади истямо озолмасо:
Инешкипаз! Веречипаз, Чангодть! Лездак тенек, улезэ паро позанок, Уцяскавсто ды шумбрачисэ ютазо иенек! Паз, Чангодть!
Штатолсонть теи кавксо колот поза парень велькска. Покш пачалгосо реставить исень чистэнть максозь алтнэ. Аватне пурнавить морганть икелев, косо палы атянь штатолось, сехте сыресь эйстэст ютавты а покшке озкске:
«Инешкипаз! Веречипаз, Чангодть! Тон трицянок ванстыцянок, макст тенек Шумбрачи! Чачост касост сюронок, Раштаст ракшанок, чачтыцят улест аванок, Шумбрат-превейть касост пакшанок, Покшолгадозо парочинек, Улезэ мейсэ ливамс Покштянок-Сэрдянок. Паз Чангодть! Инешкипаз! Чангодть»
Эрьва авась саи пенчсэ рестазь алтнэде ды ливи кунды лемест кулозь Покштянзо. Кудазоравась каванясынзе весе пуромозь аватнень, мейле туить кудова, Шлямочисэ кой-кона эздэст сы лездамо брагань пидемстэ.
Таргочистэ од мазы оршамосо пурнавить весе озкужонь-буень аватне, туить мартост Шумбракшить-лувкшить, пачалксеть, панжакайть, ды артозь алт . Сынст весе путсызь коинзамонть моргантень. Озавась теи эрий тол ды кирвазтьсы Атянь буень штатолонть, конаньстэ эрьвейке авась сувтасы бень штатолонзо. Штатолтне весе аравтневить коинзамо морганть ланга озкспалтнень юткова. Мейле Озавась ды озкс сыцятне ёвтасызь Ине Озолманть ды Покштятнень ливамо Ине Озолманть:
Инешкипаз! Вере-Чипаз!
Тон, марицясь, кода тикше касы!
Тон, неицясь кода пеште панжи!
Неимизь, марямизь,
Сюконятяно пильгезеть,
Пшкадтяно валдо оймезеть.
Верев кепедьсынек кеденек,
Масторов нолдасынек сюкпрянок.
Ознотано эрицянок кис,
Ознотано раськенек кис,
Ознотано эйденек кис,
Паксясо видезенть кис,
Кардазсо ракшанок кис.
Инешкипаз! Макст тенек
Сэтьме лембе пиземеть,
Чачост-касост сюронок,
Касост-кепедевест тяканок,
Раштыцят, улест аванок,
Макст Масторонтень ладямо,
Вейкень-вейкеь вечкема,
Лисьмакс парот лисезэ,
Леекс эрьметь чудезэ.
Кенкшпряваяк совазо,
Кеншалгаяк ютазо.
Минь Тонеть — Шумбракши!
Тон миненек – шумбрачи!
Ванстомизь, идемизь
Ятонь ломанде, ормадо-тармодо,
Апародо-зыяндо,
Даволдо-цярахмандо.
Вана пидинек ашо кеднесэ,
Вана панинек шожча мельнесэ,
Зяро кашасонть ямкстнэде,
Зняро макст эрьвантень ули паро.
Инешкипаз! Чангодть! Паз Чангодть! Паз Чангодть!
Знярдо озолматне евтавить аватне каванить вейкест–вейкест коинзамо озкспалсо ды авань позасо (брагасо), кундыть Покштяст лемест. Мейле Атянь штатолонть марто озныцятне келейстэ панжсызь кудонь кенкштнень ды ортатнень ды серьгедьсызь куринкасо учиця од аватнень ды эйкакштнэнь кудов. Од Аватне арыть кавто ёнга ортанть ды сюконить сыретненень. Знярдо совить кудов Озавась ютазь иестэ лисезь мирденень аватнень тердьсынзе коинзамо морганть икелев ды эрьбасо колмоксть вачкодьсы од аванть кутьмерь ланга ды мери:
«–Алыяк! Алыяк!».
Од авась тарги зепстэнзэ пидезь артозь сараз ал ды путсы морганть лангс. Тензэ кандыть брага ды нолдасызь ушов, косо анокставозь эземне — лангозонзо ливтить озкспалт, ды весе од аватне эйкакшнте каванявить.
Моравить коень морот, пазморот, ютавтовить раськень налксемат. Од аватнень туевть алтнэ сеске керсевить ды явшевить сыре аватненень, конатне сынст сэвсызь ды арсить од аватненень ламо шумбра–превей эйкакшт, Пазчангодт ды шумбрачи.
Эрьва велесэнть пурнавить истят 4-5 озкскужот, конатненень совсить 10-40 кудот. Эрьва озкскужонь аватне киштезь-моразь якить инжекс вейкест-вейкест туртов, икеле ардыть «алашасо» палмань, коната мазылгавтозь: викшнезь нардамосо ды палманенть прясо чувтосто керязь алашань пря. Те палманенть лангс озы наян ава ды моразь, киштезь куринкатнева «иго-гокснезь» озкскужотне каванить вейкест-вейкест.
Ламо киштемат, морамот, нурька морынеть, — велева жой моли моли кенярьксчи-покшчи.
Омбоце чись (атянь)
витнемсОмбоце чистэ (атянь чистэ) весе таго, од аватнеде башка пурнавильть озкскужотнева, ютавтови озкс, озкспалсо каванямка. Чокшне Атянь штатолонть тапарясызь коинзамо викшнезь нардамо потс ды сундерьгадозь совавтсызь шабра кудос, коната совси те озкскужонтень, ды косо сон ванстови сы иес.
Икелев молить колмо ават, конатнень кедьсэ чувтосто керязь мандот конатнене понгавтозь баягинеть, ды эрьва тюсонь лентат. Мейле мельгаст (алашасо) таго колмо ават ласте палмань лангсо, мельгаст азоравась Атянь штатолонть марто конань кудос ванставомо кандови Атянь штатолось, мартонзо шумбракши, поза марто ютазь Покшчинь азоравась. Атянь штатолонь ванстамо кудазортне вастыть ды каванить коень ютавтыця аватнень. Мейле Пазчангонь ды паронь арсезь озкскужонь ломатне туить эсь кудоваст.